Bakı Mühəndislik Universitetində (BMU) Himayəçilər Şurasının növbəti iclası keçirilib.
Şuranın sədri, Təhsil nazirinin müavini İdris İsayev ötən dövr ərzində Himayəçilər Şurasının tərkibində dəyişikliklərin baş verdiyini, Şuranın əsasnaməsinin təsdiq olunduğunu və bunun birgə səmərəli fəaliyyətə öz müsbət təsirini göstərəcəyini vurğulayıb.
İ.İsayev bildirib ki, hazırda bütün təhsil pillələrində aparılan islahatlar ali təhsil pilləsində də uğurla gerçəkləşdirilməkdədir. O, ötən dövr ərzində ali təhsil sisteminə əlçatanlığın artırılması, ali təhsil sistemində akademik potensialın gücləndirilməsi, ali təhsil sisteminin dünya təhsil sisteminə inteqrasiyası, ali təhsil sisteminin məzmun və keyfiyyət göstəricilərinin müasirləşdirilməsi, təhsilalanların və təhsilverənlərin sosial müdafiəsinin gücləndirilməsi ilə bağlı görülən tədbirlər barədə məlumat verib.
Ali təhsil sahəsində akademik potensialın artırılması istiqamətində ciddi tədbirlərin görüldüyünü vurğulayan nazir müavini Prezident İlham Əliyevin müvafiq Fərmanı ilə“2019-2023-cü illər üçün Azərbaycan Respublikasında ali təhsil sisteminin beynəlxalq rəqabətliliyinin artırılması üzrə Dövlət Proqramı”nın təsdiq edildiyini xatırladıb. O, Dövlət Proqramının birinci komponentində ali təhsil sisteminin məzmun və keyfiyyət göstəricilərinin beynəlxalq ikili diplom proqramları, xarici mütəxəssislərin cəlb olunması yolu ilə təkmilləşdirilməsini, yeni akademik mühitin yaradılmasının nəzərdə tutulduğunu, ikinci komponentində isə ölkəmizin ali təhsil müəssisələrinin akademik potensialının gücləndirilməsi məqsədi ilə milli kadrların hazırlanması üçün xaricdə doktorantura səviyyəsində təhsilin maliyyələşdirilməsini əhatə etdiyini söyləyib. Nazir müavini BMU-nun bu istiqamətdə işə başladığını, artıq Cənubi Koreyanın İnha Universiteti ilə anlaşma memorandumu imzaladığını diqqətə çatdırıb.
İ.İsayev gündəlikdə yer alan məsələlərə toxunaraq, Şuranın iclasında digər məsələlərlə yanaşı, BMU-nun inkişafına dair 2020-2023-cu illər üçün Strateji İnkişaf Proqramının müzakirə olunacağını deyib. Nazir müavini vurğulayıb ki, sənədin hazırlanmasının məqsədi ən qabaqcıl elmi nailiyyətlərdən,innovativ təlim-tədris texnologiyalarından yararlanaraq işəgötürənlərlə sıx əməkdaşlıq edərək əmək bazarının daim inkişaf edən tələblərinə uyğun mütəxəssislərin hazırlanması, universitetdə tədris prosesinin, məzmun və keyfiyyət göstəricilərinin beynəlxalq standartlara uyğunlaşdırılması, akademik potensialının, elmi-tədqiqat və innovasiya fəaliyyətinin gücləndirilməsi, universitet-iş dünyası əlaqələrinin genişləndirilməsi, sosial və ictimai fəaliyyətlərinin təkmilləşdirilməsidir.
Sonra BMU-nun rektoru, professor Havar Məmmədov 2017-2019-cu illər üzrə universitetin fəaliyyəti haqqında hesabatla çıxış edib. Rektor hesabatında son 3 ildə əldə olunan nailiyyətlərdən, mövcud problemlərdən, onun həlli yollarından bəhs edib. Universitetdə şəffaflıq, dəqiqlik, dürüstlük və hesabatlılığın təmin olunması məqsədilə elektron məlumat sisteminin mövcudluğunu, tədrisdə innovativ texnologiyaların tətbiq olunduğunu bildirən H.Məmmədov BMU tələbələrinin müxtəlif proqramlaşdırma müsabiqələrində və yarışmalarda qazandıqları nailiyyətlərdən söz açıb.
Elm sahəsində görülən işlərə toxunan rektor BMU-nun professor-müəllim heyətinin məqalələrinin “Web of Science” platformasında, “Scopus”da, digər xarici elmi jurnallarda dərc olunduğunu nəzərə çatdırıb. Xarici universitetlərlə ikitərəfli əlaqələrin qurulmasından danışan H.Məmmədov universitetin beynəlxalq təhsil proqramlarında, o cümlədən Erasmus+ KA1, Almaniyanın DAAD tələbə-müəllim mübadilə proqramı, ABŞ-ın Fulbrayt elmi-tədqiqat işi üzrə mübadilə proqramlarında iştirakını vurğulayıb.
Daha sonra iclasda BMU rektorunun universitetin 2017-2019-cu illər üzrə fəaliyyəti haqqında hesabatı, ali məktəbin 2020-2023-cü illər üçün strateji inkişaf proqramı, BMU-nun 2019-cu il büdcəsinin icrası və büdcənin 2020-ci il üçün proqnozu, 3 illik maliyyə fəaliyyəti barədə, həmçinin Audit Komitəsinin 2018-2019-cu illəri əhatə edən hesabatı dinlənilib, maliyyə məsələlərində effektivliyin artırılması imkanları, Himayəçilər Şurasının 2020-ci il üçün iş planı ətraflı müzakirə olunub.
Gündəlikdəki məsələlərlə bağlı Şuranın üzvləri - Təhsil Nazirliyinin Aparat rəhbərinin müavini Yaqub Piriyev, AMEA-nın Fizika İnstitutunun direktoru, akademik Nazim Məmmədov, “Azərkimya” İstehsalat Birliyinin baş direktoru İmran Arzumanzadə və “SAP Azerbaijan” şirkətinin baş meneceri Rüfət Hacıəlibəyov çıxış edərək təkliflərini irəli sürüblər.
Sonda gündəlikdə olan məsələlər səsə qoyularaq təsdiq edilib.
