Bakı Ali Neft Məktəbinin (BANM) Cenevrə Biznes Məktəbi (GBS) ilə birgə həyata keçirdiyi Neft və Qaz Menecmenti üzrə MBA proqramı çərçivəsində Azərbaycanda ilk dəfə “Dizayn təfəkkürü” dərsində robotlardan istifadə edilib.
“Dizayn təfəkkürü” dərsini tədris edən Rüfət Əzizov bu cür dərslərin Azərbaycanda ilk dəfə BANM-də keçirildiyini vurğulayıb. O, dizayn təfəkkürünün 5 mərhələdən ibarət olduğunu bildirib:
I mərhələdə hər hansı bir problemin həlli istiqamətində qət edilən yol müəyyənləşir. Bu zaman müştərini tanımaq və onun istəklərini nəzərə almaq lazımdır;
II mərhələdə toplanmış məlumatlar əsasında problemin nədən ibarət olduğu müəyyənləşir;
III mərhələdə problem üçün süzgəcdən keçmiş ideyalar və real həll yolları toplanılır;
IV mərhələdə süzgəcdən keçirilmiş ideyalar əsasında prototiplər hazırlanır;
V mərhələdə prototiplər testdən keçirilir.
Dərsin sonunda tələbələr robotlar vasitəsilə praktiki biznes oyun keçiriblər. Tapşırığa əsasən, tələbələr zəlzələ zamanı dağıntılar altında qalan insanları xilas edən robotun prototipini qurmağa çalışıblar. Rüfət Əzizov bildirib ki, bu cür praktiki metodla tələbələrin canlı emosiyaları, real ünsiyyət qabiliyyəti, real planlama vərdişləri, idarəetmə bacarığı, komanda ilə birgə problemi həlletmə imkanları üzə çıxır və bu cür yanaşma nəticəsində tələbələr səhvlərini daha aydın görə, nəticə çıxara bilirlər.
Məlumat üçün bildirək ki, Bakı Ali Neft Məktəbinin (BANM) Cenevrə Biznes Məktəbi (GBS) ilə Neft və Qaz Menecmenti üzrə birgə MBA proqramı barədə Əməkdaşlıq Razılaşması 2019-cu ilin aprelində imzalanıb. Əməkdaşlıqdan əsas gözlənti BANM tələbələrinin daha çox sosial bacarıqlarının inkişafı və praktiki biznesdə tətbiq edilməsinə nail olmaqdır.
GBS İsveçrənin nüfuzlu tədris müəssisələrindən biridir və dünyanın altı şəhərində bakalavr, magistratura və doktorantura üzrə təhsil verir.