Artıq 10 ildən çoxdur Azərbaycanda ənənəvi olaraq keçirilən “İslam Əməkdaşlıq Təşkilatı (İƏT) Modeli - Beynəlxalq Münasibətlər Akademiyası” layihəsinin 2024-cü il mərhələsinə start verilib.
Bu barədə “Azərbaycan müəllimi”nə Azərbaycan Dövlət İqtisad Universitetindən (UNEC) məlumat verilib.
İslam Əməkdaşlıq Gənclər Forumunun Bakıda yerləşən Avrasiya Regional Mərkəzi və Gənclər və İdman Nazirliyinin birgə tərəfdaşlığı ilə həyata keçirilən layihədə iştirak üçün müsahibə əsasında Azərbaycanın bir sıra aparıcı ali məktəblərini təmsil edən, 600-dən çox tələbə arasından xüsusi istedadı, xarici dil bacarıqları ilə fərqlənən 100-dən çox gənc seçilib.
Bu il proqram çərçivəsində tədbirlər “Yaşıl dünya naminə həmrəylik” ideyası altında keçiriləcək.
Qeyd etmək lazımdır ki, "Yaşıl gələcəyin planının tərtib edilməsi: iqlim dəyişikliyi ilə mübarizədə və qorunmasında İƏT-in rolu" proqramın bu ilki əsas mövzusudur. Eləcə də keçirilən təlimlərdə əsas diqqət Bakıda noyabrda keçiriləcək COP29 konfransı çərçivəsində gənclərin qlobal iqlim problemləri sahəsində maarifləndirilməsinə, onların potensiallarının üzə çıxarılmasına və bu istiqamətdə gənclərin əməkdaşlıq perspektivlərinin öyrənilməsinə yönəlib.
Qeyd etmək lazımdır ki, bu ilki sessiyalarda 10-a yaxın əcnəbi tələbə iştirak etmək hüququ əldə edib. İştirakçıların 2 ay ərzində hər həftə baş tutacaq mühazirələrdə və sonda təşkil olunacaq “İƏT Modeli XİN konfransı” simulyasiyasında iştirakı nəzərdə tutulub.
Akademiyanın bu ilki buraxılışının Azərbaycan Dövlət İqtisad Universitetində (UNEC) keçirilmiş açılış mərasimində layihənin koordinatoru Möminə Mehdi “İƏT Modeli” proqramının məqsəd və vəzifələri haqqında, eləcə də bununla bağlı keçən illər ərzində əldə olunmuş təcrübəni özündə əks etdirən təqdimatla çıxış edib.
Daha sonra İslam Əməkdaşlıq Gənclər Forumunun Avrasiya Regional Mərkəzinin (İƏGF-ARM) Baş direktoru Rafiq İsmayılov layihənin tərəfdaşı kimi Azərbaycan Respublikası Gənclər və İdman Nazirliyinə, eləcə də tədbirlərə təşkilati dəstək göstərən UNEC rəhbərliyinə Mərkəz adından təşəkkürünü bildirərək, təmsil etdiyi təşkilatın fəaliyyəti haqqında məlumat verib.
İndiyə qədər keçirilən mühazirələr çərçivəsində Fələstin dövlətinin Azərbaycandakı fövqəladə və səlahiyyətli səfiri cənab Nəssir Əbdül Kərim Əbdül Rəhim “Orta Şərqdəki münaqişələrin ətraf mühitə təsiri”, Qazaxıstanın Azərbaycandakı səfiri Alim Bayel “Qazaxıstanın çoxtərəfli diplomatiyası – Şərq və Qərb arasında münasibətləri tənzimləyərək”, Azərbaycan Respublikası elm və təhsil nazirinin müşaviri Nicat Məmmədli “Orta Şərqdə yeni geosiyasi reallıqlar” Beynəlxalq Münasibətlərin Təhlili Mərkəzinin şöbə müdiri Cavid Vəliyev “Beynəlxalq münasibətlərdə cari vəziyyət: İƏT üzv-dövlətləri arasında strateji münasibətlər” mövzuları üzrə çıxışlar ediblər. Mühazirəçilər tələbələrin müxtəlif suallarını cavablandırıb.
Xatırladaq ki, İƏT Modeli proqramının əsas məqsədi İƏT məkanında gənclərin beynəlxalq əməkdaşlığının güclənməsinə dəstək vermək, gənclərin və gənclər təşkilatlatları rəhbərlərinin və üzvlərinin diplomatiya, idarəetmə, kommunikasiya sahəsində yeni bilik və təcrübə əldə etməsinə yardım göstərməkdir.
2 ay ərzində keçirilən mühazirələrdən sonra tələbələr “İƏT Modeli XİN konfransı” adlanan simulyasiya oyunlarında iştirak edir və münsiflər heyətinin qərarı ilə xarici dil qabiliyyəti və xüsusi yaradıcılıq bacarığı ilə seçilən tələbələr “Beynəlxalq İƏT Modeli” yarışmasında Azərbaycanı təmsil etmək hüququ qazanırlar.
Ötən illər ərzində azərbaycanlı tələbələr dəfələrlə ümum-İƏT miqyasını əhatə edən və 40-dan artıq İƏT-ə üzv ölkə nümayəndələrinin qatıldığı “Beynəlxalq İƏT Modeli” yarışmalarında ölkəmizi layiqli şəkildə təmsil ediblər.
