Azərbaycan Texniki Universiteti (AzTU) növbəti dəfə ilkə imza atıb.

 

“Azərbaycan müəllimi” xəbər verir ki, Rəqəmsal İnkişaf və Nəqliyyat Nazirliyinin tabeliyində İnnovasiya və Rəqəmsal İnkişaf Agentliyinin təşəbbüsü ilə AzTU-da 5G texnologiyaları əsasında qurulan tədris laboratoriyasının açılışı olub.  AzTU-nun İnformasiya və telekommunikasiya texnologiyaları fakültəsində açılan yeni laboratoriya XPON texnologiyası və daha aşağı maliyyə ilə 5G stansiyaları üçün transmissiya təmin etmək imkanı verir.

 

Açılış mərasimində AzTU və İnnovasiya və Rəqəmsal İnkişaf Agentliyinin rəhbər heyəti, şirkət rəhbərləri və digər qonaqlar iştirak edib. Onlar laboratoriyada yaradılan şəraitlə yaxından tanış olublar.

Laboratoriya haqqında məlumat verən AzTU-nun Radiotexnika və telekommunikasiya kafedrasının müdiri professor Mehman Həsənov bildirib ki,  5 G yalnız mobil texnologiyalara aid olmayıb, eyni zamanda son mildə işləyən müasir ağıllı ev, tibb, nəqdliyyat, hərb və sənaye əşyalarının idarə olunması üçün geniş istifadə olunur. Laboratoriyanın açılmasında məqsəd əmək bazarının tələblərinə uyğun yerli kadrların hazırlanmasıdır. Laboratoriyada müvafiq istiqamət üzrə tədqiqatlar da aparılacaq. 

Daha sonra keçirilən görüşdə yeni laboratoriyanın ölkənin texnoloji inkişafında əhəmiyyətindən söz açılıb. Bildirilib ki, bu təşəbbüs yeni həllərin və tədqiqatların inkişaf etdirlməsi üçün geniş imkanlar yaradacaq.

 

İlkin mərhələdə universitetin İnformasiya və telekommunikasiya texnologiyaları fakültəsinin 800-ə yaxın tələbəsinə və müəllim heyətinə avadanlıqlardan düzgün istifadə qaydalarına dair təlimatlar veriləcək. Eyni zamanda, istifadəyə veriləcək laboratoriya yerli şirkətlərə açıq olacaq ki, bununla da şirkətlər avadanlıqlar üzərində sınaq və təcrübə prosesləri həyata keçirə biləcəklər.