Xəbər verdiyimiz kimi, tam (11 illik) orta təhsil səviyyəsi üzrə martın 10-da keçirilmiş buraxılış imtahanının nəticələri açıqlanıb. Maksimal bal toplayan 39 abituriyent arasında Naxçıvan ümumtəhsil məktəblərindən 4 şagird yer alıb. Naxçıvan şəhər 1 nömrəli tam orta məktəbin şagirdi Hafizə Hüseynzadə, 12 nömrəli şəhər tam orta məktəbin şagirdi Leyla Nağıyeva, Şərur rayon Fizika- riyaziyyat təmayüllü liseyin şagirdi Ziya Əbilov və Culfa rayon 3 nömrəli tam orta məktəbin şagirdi Kənan İsmayıllı 300 bal toplayıblar.
Adlarıçəkilən məktəblilər qazandıqları uğurlarla bağlı təəssüratlarını “Azərbaycan müəllimi” ilə bölüşüblər.
“Arzum Bakı Ali Neft Məktəbinə qəbul olmaqdır”
Ziya Əbilov,
Şərur rayon Fizika- riyaziyyat təmayüllü liseyin şagirdi
Ziya Əbilov buraxılış imtahanından 300 bal topladığını biləndə sevincinin hədd-hüdudu olmayıb. Hisslərini ailəsi və müəllimləri ilə bölüşüb:"Əslində 300 balı qazanacağıma əmin idim. Çünki suallara düzgün cavab verdiyimə inanırdım. Dərslərimə həmişə diqqətli olmuşam. 3 il repetitor yanına hazırlığa getmişəm. Riyaziyyat müəllimim Elnurə Əhmədovaya və mənə Azərbaycan dilinin bütün incəliklərini öyrədən müəllimim Tərlan Əhmədovaya təşəkkürümü bildirirəm”.
Ziya liseydə oxuduğu müddətdə bütün fənləri həvəslə öyrənib. Olimpiadalara qatılıb, müsabiqələrdə iştirak edib. Hər dəfə uğura imza atdıqca daha da ruhlanıb. Riyaziyat olimpiadasında yaxşı nəticələr qazanıb. Onun arzusu Bakı Ali Neft Məktəbinə qəbul olmaqdır: "İnformasiya təhlükəsizliyini dərindən bilmək istəyirəm. Təhsilimi gələcəkdə xaricdə davam etdirmək barədə də düşünürəm”.
“Hüquqşünaslıq ixtisasında oxumaq istəyirəm”
Hafizə Hüseynzadə,
Naxçıvan şəhər 1 nömrəli tam orta məktəbin şagirdi
İmtahanda 300 bal toplayan digər Naxçıvan məktəblisi Hafizə Hüseynzadə yüksək nəticə qazanmaq üçün daim çalışıb. Deyir ki, özünə qarşı həmişə tələbkar olub: "Sosial şəbəkələrdən uzaq durmağa çalışmışam ki, vaxtımın çox hissəsini hazırlıqlara yönəldə bilim. İmtahan çox məsuliyyətli bir prosesdir, ona görə fasiləsiz çalışmaq lazımdır”.
O, qarşıdakı blok imtahanlarına da ciddi yanaşır: “İstəyirəm ki, “Hüquqşünaslıq” ixtisasında təhsil alım”.
“Müəllimlərimə və ailəmə minnətdaram”
Leyla Nağıyeva,
Naxçıvan şəhər 12 nömrəli tam orta məktəbin şagirdi
İmtahanda maksimal nəticə əldə edən Leyla Nağıyeva isə deyir ki, balını öyrəndiyi ilk anda gözünün önünə valideynlərini, müəllimlərini, yaxınlarını gətirib. Onların bu nəticədən necə sevinəcəklərini düşünüb. 11 illik təhsil həyatında ona dəstək olan ailəsinin və müəllimlərinin etimadını doğrultduğu üçün özünü xoşbəxt hiss edib. O, 9-cu sinifdən imtahanlara ciddi hazırlaşmağa başlayıb:”Məktəbdə öyrəndiklərimi təkmilləşdirmək üçün repititor yanına getmişəm. Yaxşı nəticəmə görə müəllimlərimə, hər zaman yanımda olan ailəmə minnətdaram”.
“Çalışan hər bir şagird istədiyi uğuru qazana bilər”
Kənan İsmayıllı,
Culfa rayon 3 nömrəli tam orta məktəbin şagirdi
Kənan İsmayıllı da nəticəsi ilə qürur duyur. Hədəfi blok imtahanlarında da yüksək nəticə göstərməkdir. Hesab edir ki, çalışan hər bir şagird istədiyi uğuru qazana bilər. Əla nəticə göstərməyində həm məktəb müəllimlərinin, həm də repetitorların əməyini yüksək qiymətləndirir: "Müəllimlərim Sahibə Nəzərova və Vüsalə Ələkbərovanın zəhməti danılmazdır. İstər fənn olimpiadalarında, istərsə də buraxılış imtahanlarında hər zaman mənə dəstək olublar. X və XI siniflərdə isə repititor müəllimlərimin dəstəyi ilə bilik və bacarıqlarımı möhkəmləndirmişəm”.
O, Azərbaycan dili və ədəbiyyat fənnlərindən Respublika fənn olimpiadalarında yarımfinal mərhələsinə qədər gəlib. Deyir ki, sosial şəbəkələrdən istifadə etmir. Dərs hazırlıqları ilə yanaşı, idmanla da məşğul olur. Xaricdə təhsil almaq fikri yoxdur: "Öz ölkəmdə “Hüquqşünaslıq” ixtisasında təhsil almaq istəyirəm”.
Sifai SƏFƏROVA