Türkiyənin təhsil işçilərindən ibarət nümayəndə heyəti Azərbaycanda səfərdədir.
Bakı şəhəri 18 nömrəli tam orta məktəb ilə Türkiyənin İzmir Çiyli Yıldız Tınas İzmiroğlu Anadolu Liseyi arasında “Qardaş məktəblərin əməkdaşlığı müqaviləsi” imzalanıb.
Bu barədə "Azərbaycan müəllimi"nə Bakı Şəhəri üzrə Təhsil İdarəsindən məlumat verilib. Bildirilib ki, səfər çərçivəsində qonaqlar Fəxri xiyabanı, Şəhidlər xiyabanını, “Türk şəhidliyi” abidəsini ziyarət edib, Heydər Əliyev Mərkəzi və mədəni-tarixi məkanlarda olublar.
Qonaqlar, həmçinin 18 nömrəli tam orta məktəblə tanış olub, dərslərdə iştirak edib, qarşılıqlı təcrübə mübadiləsi mövzusunda müzakirələr aparıblar. Bundan əlavə, qardaş ölkələrin məktəbliləri arasında dostluq münasibətlərinin inkişafına xidmət edən birgə intellektual-əyləncəli proqramlar təşkil edilir.
Qonaqların şərəfinə Əməkdar artist Aybəniz Haşımovanın rəhbərlik etdiyi “Sənət Akademiyası” üzvlərinin iştirakı ilə konsert proqramı təşkil olunub.
Konserti Bakı Şəhəri üzrə Təhsil İdarəsinin (BŞTİ) müdir müavini Xəyalə Əhmədzadə, İzmir Çiyli Yıldız Tınas İzmiroğlu Anadolu Liseyinin direktoru Eyüp Dağ, liseyin müəllim və şagirdləri, məktəb direktorları izləyiblər.
Tədbir Azərbaycan və Türkiyənin Dövlət himnlərinin səsləndirilməsi ilə başlanıb.
Məktəbin direktoru Leyla Fətiyeva bildirib ki, ortaq tarixi köklərə və qardaşlığa söykənən Azərbaycan-Türkiyə əlaqələri təhsil sahəsində də inkişaf edir. L.Fətiyeva məktəbin qonağı olan liseyin direktoru, 6 müəllim və 11 şagirddən ibarət heyətin iştirakı ilə təşkil olunan tədbirlərin qardaşlıq münasibətlərinə nümunələrdən biri olduğunu diqqətə çatdırıb.
Qardaş ölkənin təhsil işçilərindən ibarət nümayəndə heyətinin Azərbaycana səfəri davam edir.
