Bakı Dövlət Universiteti Beynəlxalq Astronavtika Akademiyasında da təmsil olunacaq. Belə ki, BDU rektoru Elçin Babayev Beynəlxalq Astronavtika Akademiyasının (IAA) fundamental elmlər üzrə müxbir üzvü seçilib və 74-cü Beynəlxalq Astronavtika Konqresi (IAC) çərçivəsində Bakıda keçirilən Akademiya Günü tədbirində ona Akademiyanın diplomu təqdim olunub.

Qeyd edək ki, IAC dünyanın hər yerindən kosmos həvəskarlarını və mütəxəssisləri bir araya gətirən möhtəşəm tədbirdir. Aerokosmik ictimaiyyətin bu toplantısı çərçivəsində baş tutan bir çox əlamətdar hadisələr arasında IAA-nın Akademiya Günü xüsusi ilə seçilir. Zəngin tarixi və nüfuzlu iştirakçıları ilə Akademiya Gününün əsas məqsədi uyğun istiqamətdə ümumbəşəri nailiyyətlərə və kosmosun sonsuz imkanlarına nəzər salmaqdan ibarətdir.

1960-cı ildə yaradılmış Beynəlxalq Astronavtika Akademiyası astronavtika və astrofizika sahəsində seçilən elm adamlarının və mütəxəssislərin üzvü olduğu nüfuzlu təşkilatdır. Onun missiyası astronavtikanın dinc məqsədlər üçün inkişafını, beynəlxalq əməkdaşlığı və bilik mübadiləsini təşviq etməkdir. IAC-da Akademiya Günü IAA üçün bu nəcib məqsədlərə sadiqliyini nümayiş etdirmək baxımından unikal platforma hesab oluna bilər.

Akademiya Günü, eyni zamanda kosmik tədqiqatların və texnologiyanın müxtəlif aspektlərini özündə əks etdirən dinamik bir hadisədir. Günün proqramı kosmos siyasəti, Ayın davamlı tədqiqi, Marsın kolonizasiyası, qabaqcıl hərəkət sistemləri, kosmos və süni intellektin kəsişməsi kimi mövzuları əhatə edib.