Sənəd müəllim-tələbə mübadiləsi, yay məktəblərinin, konfransların təşkili, beynəlxalq layihələrdə iştirak və s. məsələləri özündə əks etdirir

Bakı Dövlət Universitetinin (BDU) rektoru, akademik Abel Məhərrəmov Rusiyanın Həştərxan Dövlət Universitetinin (HDU) rektoru, professor Konstantin Markelov və həmin universitetin Siyasi elmlər və Beynəlxalq Münasibətlər Departamentinin direktoru, professor Rafik Usmanov ilə görüşüb. Qonaqları universitetdə görməkdən məmnunluğunu ifadə edən akademik Abel Məhərrəmov Azərbaycanda son illər ərzində bütün sahələrdə, həmçinin təhsil sferasında yüksək nailliyyətlərin əldə olunmasından bəhs edib. Rektor BDU-nun beynəlxalq əlaqələrindən, Rusiyanın bir çox universitetləri ilə uğurlu əməkdaşlıqdan danışıb, HDU ilə birgə layihələrin genişləndirilməsinin önəmini vurğulayıb.

Professor Konstantin Markelov 100 illik yubileyi ərəfəsində olan bu ali təhsil ocağında xoş qarşılanmaya görə rektora təşəkkür edib. Azərbaycanın Rusiya, o cümlədən Həştərxan regionu ilə səmərəli əlaqələrinin olduğunu qeyd edib, təmsil etdiyi universitetin BDU ilə fundamental elmlər sahəsində mövcud əməkdaşlıq əlaqələrini humanitar elmlər üzrə genişləndirməkdə maraqlı olduqlarını söyləyib.

Görüşdə müəllim-tələbə mübadiləsi, yay məktəblərinin, konfransların təşkili, beynəlxalq layihələrdə iştirak və s. məsələləri özündə əks etdirən Anlaşma Memorandumu imzalanıb.

Səfər çərçivəsində qonaqlar universitetin elmi-tədqiqat mərkəzlərində olub, yaradılan münbit şəraitlə yaxından tanış olublar.

Qeyd edək ki, 1996-cı ildə Həştərxan Dövlət Pedaqoji İnstitutu kimi yaradılan HDU-nun 12 mindən artıq tələbəsi, 8 institutu, 20-dək elmi-tədris mərkəzi, 21 fakültəsi, 60-dək şöbəsi var.