Azərbaycan Dillər Universitetinin (ADU) rektoru akademik Kamal Abdulla Birləşmiş Ərəb Əmirliklərinin Azərbaycandakı səfiri Məhəmməd Əl Bluşi ilə görüşüb.

Səfiri universitetdə görməkdən məmnun olduğunu deyən rektor K.Abdulla tələbələrin ərəb dilinə olan marağı haqqında danışıb, ərəb dilinin tədrisi istiqamətində yeni addımların atılacağını diqqətə çatdırıb.

Görüşdə ADU-da Ərəb dili və mədəniyyəti mərkəzinin açılması istiqamətində fikir mübadiləsi aparılıb. Qeyd olunub ki, mərkəzin açılışından sonra əməkdaşlıq daha sıx və səmərəli olacaq, tələbələr üçün yeni perspektivlər açılacaq.

Səfir Məhəmməd Əl Bluşi dəvət üçün ADU-nun rektoruna təşəkkürünü bildirib, universitetdə ərəb dilinə olan marağı yüksək qiymətləndirib.

Diplomat iki ölkə arasında bütün istiqamətlərdə, o cümlədən, təhsil sahəsində əməkdaşlığın yüksələn xətlə inkişaf etdiyini diqqətə çatdırıb, Ərəb dili və mədəniyyəti mərkəzinin açılması üçün bütün zəruri addımların atılacağını qeyd edib.

Sonda rektor K.Abdulla səfir Məhəmməd Əl Bluşini universitetin “Səfir saatı” layihəsi çərçivəsində tələbələrlə görüşə dəvət edib.