Azərbaycan Texniki Universiteti (AzTU) ilə “AzerGold” Qapalı Səhmdar Cəmiyyəti (QSC) arasında əməkdaşlıq haqqında memorandum imzalanıb.

Universitetdən bildirilib ki, videoformatda təşkil olunan tədbirdə hər iki tərəfin məsul şəxsləri ilə yanaşı, Türkiyənin İstanbul Texniki Universitetinin prorektoru Hüseyin Kızıl və digər nümayəndələri iştirak edib.

Sənədi rektor Vilayət Vəliyev və QSC-nin İdarə Heyəti  sədrinin müavini Xəyyam Fərzəliyev imzalayıb.   

Memorandumda  qarşılıqlı razılıq əsasında ölkə ərazisində əlvan və qara metal filizi yataqlarının öyrənilməsi, tədqiqi, kəşfiyyatı, bu sahədə yeni texnologiyaların tətbiqi, ixtisaslı kadr hazırlığı konsepsiyalarının birgə layihələndirilməsi və tətbiqi nəzərdə tutulur.

Bundan başqa, sənəddə universitetin müxtəlif fakültələrinin bakalavriat və magistratura pillələrində təhsil alan tələbələrinin şirkətdə  istehsalat təcrübəsinə cəlb olunması da öz əksini tapıb. İstehsalat təcrübəsində seçilmiş tələbələrin elmi-tədqiqat və layihələndirmə işlərinə cəlb edilməsi, diplom, elmi işlər, digər tədqiqat layihələri üçün tələb olunan mövzuların birgə tərtibi, həmçinin fərqlənən tələbələrə QSC-nin təqaüd və mükafatlarının verilməsi də nəzərdə tutulub.