Azərbaycan Respublikası Təhsil Nazirliyi və Bakı Mühəndislik Universitetinin (BMU) birgə təşkilatçılığı ilə Ümummilli lider Heydər Əliyevin anadan olmasının 97-ci ildönümünə həsr olunan “Gənc tədqiqatçıların IV beynəlxalq elmi konfransı” onlayn formatda keçirilib.
Qeyd edək ki, 29-30 aprel 2020-ci il tarixində keçirilməsi planlaşdırılan konfrans mövcud pandemiya vəziyyəti ilə əlaqədər olaraq təxirə salınıb və 5 iyun 2020-ci il tarixinə dəyişdirilib.
BMU-nun rektoru, professor Havar Məmmədov hər il ənənəvi olaraq təşkil edilən konfransın Ulu öndər Heydər Əliyevin təhsil sahəsində əvəzolunmaz xidmətlərinin gənc nəsillərə çatdırılması istiqamətində rolunu vurğulayıb. Konfransın elmi istiqamətlərinin mühəndislik, təbiət, iqtisadiyyat, filologiya elmləri və pedaqogika olduğunu diqqətə çatdıran rektor konfransın əsas məqsədinin dünyanın müxtəlif universitet və elmi-tədqiqat institutlarında fəaliyyət göstərən gənc tədqiqatçıları bir araya gətirmək, həmçinin bu sahədə əldə olunan elmi nailiyyətləri və təcrübələri paylaşmaq olduğunu bildirib.
Hazırda Prezident İlham Əliyevin rəhbərliyi ilə ölkənin iqtisadi həyatında əldə olunan uğurların davam etdiyini bildirən H.Məmmədov bu fəaliyyətlərin elmi müstəvidə müzakirəsi məqsədilə təşkil olunan konfransa 10-dan çox ölkədən 850-ə yaxın məqalə və tezis göndərildiyini, elmi heyətin qərarı ilə 450-ə yaxın tədqiqatın konfransın proqramına daxil edildiyini diqqətə çatdırıb.
Təhsil nazirinin müavini, BMU-nun Himayəçilər Şurasının sədri İdris İsayev 4-cü ildir keçirilən konfransın bu il pandemiya səbəbindən onlayn təşkil olunduğunu, bununla da elm və elmi-tədqiqatların sərhəd və məhdudiyyət tanımadığını diqqətə çatdırıb. Gəncliyimizin sağlam ruhlu, istedadlı və mənəvi tərbiyəyə malik olmasının dövlət üçün önəmliliyini qeyd edən nazir müavini cəmiyyətin aparıcı qüvvəsinin gənclər olduğunu vurğulayıb. İ.İsayev bildirib ki, Ümummilli lider Heydər Əliyevin hakimiyyəti dövründə yüzlərlə təhsil müəssisələri və gənclər mərkəzləri açılıb, 15 mindən artıq gənc azərbaycanlı sovet məkanının nüfuzlu ali təhsil müəssisələrində təhsil almaq imkanları qazanıblar. Həmin şəxslər müstəqil Azərbaycanın quruculuğunda iştirak edir, təhsil, elm, iqtisadiyyat və cəmiyyətin müstəqil sahələrində öz əvəzsiz xidmətlərini göstərməkdədirlər. İ.İsayev gənc tədqiqatçıların Ulu Öndərin ideyalarını öz fəaliyyətlərində daima rəhbər tutduğunu sözlərinə əlavə edib.
Nazirlik rəsmisi son onilliklərdə elmə, təhsilə, innovasiyalara yönəldilən investisiyaların artım sürətinin əsas fondlara ayrılan investisiyaların artım sürətini üstələdiyindən də danışıb və statistik göstəricilərə nəzər yetirib. İ.İsayev bir sıra dünya dövlətləri, xüsusən də inkişaf etmiş ölkələrin elmlərə ciddi vəsaitlər ayırdığına toxunub. Nazir müavini Azəbaycanda elmin inkişafına son dövrlərdə Prezident İlham Əliyev tərəfindən diqqət və qayğı göstərildiyini vurğulayıb.
Ölkədə həyata keçirilən islahatların mərkəzində elmi əsaslandırmaların durduğunu söyləyən İ. İsayev elmi tədqiqat və araşdırmalar istiqamətində ali təhsil müəssisələrinin aktivliyindən söz açıb. BMU-nun təşkilatçılığı ilə keçirilən konfansda səslənəcək fikirlərin elmimizin inkişafına müsbət töhfə verəcəyənə inamını ifadə edib. Çıxışının sonunda tədqiqatçıları aktiv olmağa çağırıb və onlara uğurlar azulayıb.
BMU-nun elmi işlər üzrə prorektoru, dosent Elçin Süleymanov universitetdə tədris fəaliyyəti ilə yanaşı, elmi fəaliyyətə də ciddi diqqət yetirildiyini bildirib. O, 2020-ci ilin ilk 5 ayı ərzində BMU müəllimlərinin Web of Science platformasında dərc olunan nəşrlərinin artıq ötən 1 ildəki nəşrin 80 %-i həcmində olduğunu diqqətə çatdırıb. E.Süleymanov son 3 ay ərzində BMU-nun Tələbə Elmi Cəmiyyəti və Texnopark və İnnovasiya Mərkəzi tərəfindən hər həftə təşkil olunan vebinarlardan söz açıb, onların əhəmiyyətini vurğulayıb.
Konfrans öz işini 4 seksiyada davam etdirib.
Qeyd edək ki, konfransa Azərbaycanın 30-a yaxın elmi-tədqiqat müəssisələrindən (Azərbaycan Dövlət İqtisad Universiteti, AMEA-nın müxtəlif institutları, Bakı Dövlət Universiteti və s.), eyni zamanda Türkiyə, İspaniya, Macarıstan, Gürcüstan, Özbəkistan və digər ölkələrdən olan elm adamları tədqiqatlarını göndəriblər. Təşkilat komitəsi tərəfindən seçilən və konfransa təqdim olunan məqalələr 800 səhifəyə yaxın həcmli 2 cildlik materiallar toplusu şəklində nəşr edilib və konfransın veb saytına yerləşdirilib.
