Müvafiq tədbirlər həyata keçirilir

2009- 2010 -cu tədris ilində Ağsu  rayonunda fəaliyyət göstərəcək 70 ümumtəhsil məktəbində və 4 məktəbdənkənar müəssisədə yeni dərs ilinə  hazırlıq işləri  artıq başa çatıb. Ağsu Rayon Təhsil Şöbəsinin  müdiri Tahir Xasiyevdən aldığımız məlumatda  bildirilir ki,  Kəndoba orta,  Cəfərli, Sanqalan əsas  məktəblərində əsaslı təmir, Padarqışlaq orta məktəblərində isə cari təmir işləri aparılıb.Yeni dərs ilində təlim -tərbiyənin səviyyəsini yüksəltmək, əmək intizamını möhkəmləndirmək üçün müvafiq tədbirlər hazırlanmış və  həyata keçirilməsinə başlanılıb.

Bundan başqa, təhsil şöbəsinin şura iclasında ötən  dərs ilinin  yekunları ciddi  müzakirə  olunub və buraxılan nöqsanlar aidiyyəti   işçilərin nəzərinə  çatdırılıb.

Bu il I siniflərdə  işləyəcək 75  ibtidai sinif  müəllimi üçün 5 günlük öyrədici kurslar  təşkil olunmuş, keçirilən treninqlərdə fənn kurikulumlarının struktur və məzmunu, yeni təlim strategiyaları, yeni qiymətlənirmə mexanizmlərinin tətbiqi  və s. öyrənilmişdir.

Hazırda məktəblərdə şagirdlərin dərsliklərlə  təminatı yüksək səviyyədə təşkil olunmuş və  rayona təyinatla gəlmiş gənc müəllimlər üçün də hər cür şərait yaradılmışdır.

Yeni kafedralar fəaliyyət göstərəcək

 2009-2010-cu tədris ilindən Azərbaycan Dillər Universitetində təlimdə innovasiyalar və əlavə təhsil,  ibtidai sinif, rus dili və ədəbiyyatı müəllimliyi ixtisası üzrə yeni kafedralar fəaliyyətə başlayacaq.

Artıq Elmi Şuranın qərarı ilə iyundan bu istiqamətdə hazırlıq işlərinə başlanıb.

Həm də bu yeniliklər sırasında ADU-nun roman-german filologiyası fakültəsinin adı dəyişdirilərək filologiya fakültəsi adlandırılıb.

Şakir CƏFƏROV

ADU-da tərcümə fakültəsi yeniləşib

Azərbaycan  Dillər  Universitetinin tərcümə fakültəsində  əsaslı  islahatlar  aparılıb. 2009-2010-cu  tədris  ilinə  həsr  olunmuş  ilk  iclasda  ADU-nun  rektoru,  professor  Səməd  Seyidov  bildirdi ki, tərcümə  fakültəsi  və  tərcümə  ixtisası  Azərbaycanın  dövlət  müstəqilliyini  əks  etdirən  strateji  ixtisaslardan  biridir. Tərcümə  ixtisasına  yiyələnmək  dövlətin, millətin  dilini  bütün  dünyaya  çatdıraraq  Azərbaycanı  dünyada  tanıtmaq  və  onların  mədəniyyətlərini  Azərbaycana  gətirmək  deməkdir. Tərcümə  fakültəsində  baş  verəcək yeniliklər  gələcəkdə  bütün  universiteti, ADU-nun  Azərbaycan  təhsil  sistemində  simasını  dəyişdirəcək.

Tərcümə  fakültəsinin  yenidən  qurulması  üçün  lazımi şəraitin  yaradıldığını  söyləyən  rektor  S.Seyidov  nəzərə  çatdırdı  ki, bu tədris  ilində tərcümə  fakültəsində  auditoriyadankənar  saatlar  artacaq.

 2009-2010-cu tədris ilində eksperimentin hələlik I kurslara şamil ediləcəyini vurğulayan professor S.Seyidov qeyd etdi ki,  2009-2010-cu  ildə  ADU-nun tərcümə fakültəsinə daxil  olan tələbələr tərcümə  ixtisası  üzrə bizim tələblərimizə uyğun öz fəaliyyətlərini təşkil edəcəklər.

S.Seyidov onu da bildirdi ki, Azərbaycanın təhsil sistemində aparılan islahatlar, yeniliklər prosesində ADU öndə gedən ali təhsil müəssisəsinə çevrilib və bu istiqamətdə görülən işlər bütün fakültələrdə aparılır.