31 Mart - Azərbaycanlıların Soyqırımı Günü təhsil müəssisələrində qeyd olundu

31 Mart - Azərbaycanlıların Soyqırım Günü ölkəmizin hər yerində olduğu kimi, təhsil müəssisələrində də geniş qeyd edilib.

Martın 31-də Bakı Pedaqoji Kadrların İxtisasartırma və Yenidənhazırlanma İnstitutunda 31 Mart - Azərbaycanlıların Soyqırımı Gününə həsr edilmiş anım mərasimi keçirildi.

Toplantını giriş sözü ilə açan BPKİYİ-nin tədris və elmi işlər üzrə prorektoru, pedaqoji elmlər namizədi Mönsüm Alışov ermənilər tərəfindən xalqımıza qarşı 1918-ci ilin martında törədilmiş soyqırımı haqqında məlumat verdi. Həmin faciələrdə misli görünməmiş qəddarlıqla qətlə yetirilmiş soydaşlarımızın əziz xatirəsi bir dəqiqəlik sükutla yad edildi.

çıxışına davam edən natiq azərbaycanlıların soyqırımına ilk dəfə siyasi qiymət verən ümummilli liderimiz Heydər Əliyevin bu tarixi addımının ədalətin üzə çıxarılmasına xidmət etdiyini və bundan sonra dünya azərbaycanlılarının sıx birləşərək həlli vacib problemlərin aradan qaldırılmasına səy göstərəcəklərinə bir təkan olduğunu qeyd etdi.

Əsrlər boyu Azərbaycan xalqının başına gətirilən müsibətlərdən söz açan çıxışçı məlum hadisələrin kökünün I Pyotrun tövsiyələri əsasında qoyulduğunu, bu mənfur siyasətə qoşulan çar Nikolayın, Leninin, mikoyanların, şaumyanların, aqambekyanların, qorbaçovların, polyaniçkaların səyi azərbaycanlıları soyqırıma məruz qoymaq, bir millət kimi məhv edib doğma torpaqlarında vassalları olan erməniləri yerləşdirib böyük ermənistan respublikası yaratmaq olduğunu diqqətə çatdırmışdır. Natiq həmçinin bildirmişdir ki, onların apardıqları mənfur siyasət nəticəsində millətimiz daim təcavüzə məruz qalmış, xüsusilə 1918-ci ilin martın 31-də erməni ordu birləşmələri himayədarlarının köməyi ilə azərbaycanlılara qarşı tarixdə misli görünməmiş soyqırımı həyata keçirərək insanları vəhşiliklə qətlə yetirmiş, Bakı, Şamaxı, Quba, Gəncə, Lənkəran və bir sıra rayonlarda qətlianlar törətmişlər.

Mərasimdə 1988-ci ildə qərbi azərbaycanlıların doğma yurd-yuvalarından qovulduğu, 1992-ci ilin fevralın 26-da Xocalı soyqırımının həyata keçirildiyi, torpaqlarımızın 20 faizinin işğal edildiyi, gəlin və qızlarımızın əsir alındığı, bütün bunların erməni qəsbkarlarının alçaqlığı və ikiüzlülüyü nəticəsində baş verdiyi bir daha vurğulandı. Xalqımıza qarşı yeridilən soyqırımı siyasəti pislənilərək işğal altında qalan torpaqlarımızın ulu öndər Heydər Əliyevin layiqli davamçısı Prezident İlham Əliyevin qətiyyəti və səyi nəticəsində geri alınacağına və müstəqil Azərbaycan Respublikasının daha da inkişaf edərək öz tərəqqi, çiçəkli dövrünü yaşayacağına əminlik ifadə edildi.

***

31 Mart - Azərbaycanlıların Soyqırımı Günü münasibətilə Naxçıvan özəl Universitetində keçirilən konfransı giriş sözü ilə universitetin tədris işləri üzrə prorektoru İbrahim Kazımbəyli açaraq  xalqımızın ağrılı və acılı mövzusu olan soyqırımından, onun ağır nəticələrindən və onların dərk edilməsi sayəsində həyata keçirilən və keçiriləcək tədbirlərdən danışdı.

Qeyd olundu ki, XX əsrin əvvəllərindən başlayaraq istər İrəvan quberniyasında, istərsə də Naxçıvan, Şərur-Dərələyəz və Ordubad qəzalarında daşnak erməniləri tərəfindən qanlı soyqırımı siyasətinə dair Naxçıvan MR Dövlət Arxivində yüzlərlə sənəd mühafizə olunur. Bu sənədlər qərbi Azərbaycanda, həmçinin Naxçıvan bölgəsində ermənilərin azərbaycanlılara qarşı etdikləri vəhşilikləri, qırğınları, dağıntıları, öz dədə-baba torpaqlarından qovulan azərbaycanlıların aclıq və xəstəliklərdən məhv olmalarını əks etdirir.

Humanitar fənlər kafedrasının dosenti Elçin Zamanov "1948-1952-ci illər azərbaycanlıların qərbi Azərbaycandan deportasiyası - ermənilərin "Böyük Ermənistan" yaratmaq siyasətinin tərkib hissəsidir", Naxçıvan özəl Universitetinin tərbiyə işləri üzrə prorektoru Əli Yusifov "Erməni daşnaklarının yeni iddiaları-köçürmə, deportasiya soyqırımı 1988-1994-cü illər" mövzularında məruzələr etdilər.

Sonda soyqırımı qurbanlarının xatirəsinə həsr olunmuş sərgiyə baxış keçirildi.

***

Bakıdakı 95 nömrəli orta məktəbin  direktoru Tahir Süleymanov bildirdi   ki, məktəbdə   31 Mart Soyqırımı Gününə həsr olunmuş anım mərasimi keçirilib. Mərasimdə  ilk öncə Azərbaycan Respublikasının Dövlət himni səsləndirilib  və  sonra 31 mart  soyqırımı  şəhidlərinin  xatirəsi   bir dəqiqəlik  sükutla  yad edilib.

***

176 nömrəli orta  məktəbin  direktor müavini Palmira Nəbiyeva  qeyd etdi ki, 31 Mart soyqırımı gününə  aid bütün siniflərdə söhbətlər aparılmış,   bu mövzuda  siniflər üzrə inşa yazı müsabiqələri keçirilmiş   və soyqırımı abidəsinin önünə şagirdlər çiçək dəstələri qoymuşlar.

***

261 nömrəli orta məktəbdə  də 31 Mart - Soyqırımı Gününə həsr olunmuş tədbir kçirilib . Məktəbin direktoru Abuzər Əsədov  çıxışında 31 Mart soyqırımını xalqımızın tarixinin qanlı səhifəsi  adlandırıb və Azərbaycan xalqının başına gələn  bu dəhşətlərin   azğın ermənilər tərəfindən dəfələrlə törədildiyini qeyd edib.

Məktəbdə soyqırımı gününü əks etdirən divar qəzetləri buraxılıb, siniflərdə söhbətlər aparılıb.

***

Bakıdakı 178 nömrəli orta məktəbdə 31 Mart - Azərbaycanlıların Soyqırımı Gününə həsr olunmuş tədbirdə əvvəlcə Dövlət himni səsləndirildi və  ölkənin  üçrəngli bayrağı səhnəyə gətirildi.

Məktəbin  direktoru Yusif  Məmmədov  ermənilər  tərəfindən xalqımızın başına  gətirilən müsibətləri, vəhşilikləri xronoloji ardıcıllıqla  qeyd etdi. 

Sonra  məktəbin  müəllimi Xatirə Rüstəmova  1905-ci ildən başlayaraq bu günə kimi azərbaycanlıların tarixi ərazilərində etnik təmizləmə və soyqırımına məruz qalması, daşnaqlar tərəfindən kütləvi surətdə qətlə yetirilməsi haqqında  danışdı. Bildirildi  ki, Xocalı faciəsi müasir dövrün azərbaycanlılara qarşı  törədilmiş ən dəhşətli soyqırımıdır. Tədbir şagirdlərin ifasında vətənpərvərlik şeirləri ilə başa çatdı.

***

Həmin gün Bakının 299 nömrəli orta ümumtəhsil məktəbində də soyqırımı qurbanlarının anım mərasimi  keçirildi. Tədbirdə məktəbin direktoru Solmaz  Kazımova qeyd etdi ki, bu gün bütün siniflərdə keçirilən dərslərin  ilk saatları soyqırımı  gününə həsr olunub və azərbaycanlılara qarşı  yeridilən  soyqırımı siyasətinin tarixi kökləri bir daha şagirdlərin  nəzərinə çatdırılıb.

Tədbirin sonunda yuxarı sinif şagirdləri and içərək,  erməni faşizminə qarşı daim mübarizə aparacaqlarına söz verdilər.

"Azərbaycan müəllimi"