Təhsil Nazirliyinin "Kurrikulum"  adlı yeni jurnalı nəşrə başladı

Demokratik prinsiplərə söykənən, plüralizmin, söz azadlığının, insan haqlarına hörmətin gündəlik yaşam normalarına çevrildiyi vətəndaş cəmiyyətinin qurulmasında mətbuatın böyük rolu vardır. 17 il öncə müstəqilliyini bərpa etmiş ölkəmizdə də hazırda belə bir cəmiyyətin qurulması prosesi gedir. Möhtərəm Prezidentimiz İlham Əliyevin rəhbərliyi altında ölkə həyatının bütün sahələrində uğurlu islahatlar aparılır, davamlı inkişaf strategiyasının öncül istiqamətlərindən biri olan təhsilin yeniləşdirilməsi, müasirləşdirilməsi, dünya təhsil məkanına inteqrasiyası istiqamətində mühüm addımlar atılıb. Görülən işlərin, atılan addımların səmərəli nəticələr verməsi, daha vüsətli inkişafa aparması onların mahiyyətinin, əhəmiyyətinin geniş ictimaiyyətə çatdırılmasından, əhalinin müxtəlif təbəqələrinin bu işlərə səfərbər edilməsindən çox asılıdır. Bu isə KİV-siz, mətbuatsız mümkün deyil, lakin müşahidə və təhlillər göstərir ki, ölkəmizdə informasiya-kommunikasiya vasitələrinin sürətli inkişafına, KİV-lərin, mətbuat orqanlarının sayının çoxluğuna baxmayaraq, təhsil sahəsində görülən işlərin, qazanılan uğurların ictimaiyyətə çatdırılması hələ də istənilən səviyyədə deyildir.

Hazırda təhsil sahəsində aparılan islahatların mühüm bir istiqamətini ümumi təhsilin məzmununun müasir tələblər zəminində yeniləşdirilməsi təşkil edir. Bu istiqamətdə görülən işlər "Kurrikulum islahatı" adı altında aparılır. Dövlətin ümumi təhsillə bağlı siyasətini, cəmiyyətin ehtiyac və tələbatını, habelə şagirdlərin maraqlarını üzvi şəkildə əlaqələndirən Azərbaycan Respublikasında ümumi təhsilin Konsepsiyası ("Milli Kurrikulum"u) hazırlanıb, hökumət tərəfindən təsdiq edilmişdir. Həmin konseptual sənəd əsasında fənn kurrikulumları yaradılır, onların tətbiqinə hazırlıq işləri aparılır. Bütün bu işlərin, habelə bu sahədə qəbul olunan yeni sənədlərin məzmun və mahiyyətinin, onlarla işin xüsusiyyətlərinin müəllimlərə, metodistlərə, məktəb rəhbərlərinə çatdırılmasına, onların elmi-metodik və psixoloji hazırlığının artırılmasına böyük ehtiyac vardır. Məhz bu ehtiyacı nəzərə alan Təhsil Nazirliyi özünün yeni nəşrini - "Kurrikulum" jurnalını təsis etmişdir. Jurnalın təsis olunması ilə həmçinin pedaqoji ictimaiyyət arasında maarifləndirmə və təbliğat işlərinin səmərəliliyinin artırılması, təhsil işçilərinə elmi, pedaqoji köməyin gücləndirilməsi, gələcəkdə kurrikulumların təkmilləşdirilməsi və keyfiyyətinin yüksəldilməsi ilə bağlı elmi-tədqiqat işlərinin nəticələrini işıqlandırmaq, ölkəmizdə və xaricdə qabaqcıl təcrübə nümunələrinin yayılmasını təmin etmək və s. kimi niyyətlərin gerçəkləşdirilməsi nəzərdə tutulur.

İri formatda rəngli, nəfis şəkildə çap olunan jurnalın baş redaktoru təhsil naziri Misir Mərdanovdur. Redaksiya heyəti təhsil və elm sahəsində tanınmış yerli və xarici alim və mütəxəssislərdən ibarət olan jurnal rübdə bir dəfə nəşr olunacaqdır.

Yeni jurnalın ilk nömrəsi bu günlərdə çapdan çıxmışdır. Oxuculara təqdim olunan birinci nömrədə baş redaktorun oxuculara müraciəti, təhsil nazirinin müavini, Təhsil Sektorunun İnkişafı Layihəsinin milli koordinatoru, respublikanın əməkdar müəllimi İsgəndər İsgəndərovun ölkəmizdə təhsil sahəsində aparılan islahatlara, onların əhəmiyyəti, prioritet istiqamətləri və nəticələrinə, nazirliyin şöbə müdiri, "Kurrikulum islahatı" üzrə alt komponent koordinatoru, jurnalın hazırlanmasında və nəşrində xüsusi zəhməti olan respublikanın əməkdar müəllimi Aydın Əhmədovun ümumi təhsil sistemində kurrikulum islahatına, Təhsil Problemləri İnstitutunun direktor müavini, Kurrikulum Mərkəzinin direktoru, respublikanın əməkdar müəllimi Ənvər Abbasovun yeni kurrikulumların səciyyəvi xüsusiyyətlərinə dair məqalələri və digər yazılar verilmişdir.

İlk nömrədəki yazılar "Kurrikulum nəzəriyyə və praktika", "Yeni pedaqoji və psixoloji yanaşmalar", "Monitorinq və qiymətləndirmə", "Təlim strategiyası", "Təhsil standartları", "İnformasiya" və "Rəsmi sənədlər" adlı rəngarəng rubrikalarla təqdim olunub.

ümumiyyətlə, jurnalda fənn və məktəb kurrikulumları ilə işin texnologiyasına, kurrikulumların tətbiqi sahəsində qabaqcıl iş təcrübəsinə, tədqiqatların yekunlarına, təhsilin məzmunu, təlim texnologiyaları və şagird nailiyyətlərinin qiymətləndirilməsi məsələlərinə həsr olunmuş yazılar, tərcümə materialları, fənn kurrikulumları əsasında müasir dərslik və dərs vəsaitlərinin tərtibi texnologiyaları, qabaqcıl məktəb rəhbərləri və müəllimlərinin iş təcrübələri, şagird nailiyyətlərinin milli və beynəlxalq qiymətləndirmə nəticələri, inkişaf etmiş ölkələrin mövcud ümumi təhsil modelləri və s. mövzularda məqalələr dərc olunacaqdır. Jurnalın redaksiyasında tanınmış mütəxəssislərin iştirakı ilə ümumi təhsilin aktual məsələlərinə həsr olunmuş "dəyirmi masa"ların, müzakirələrin təşkil edilməsi, müəllim və şagirdlər arasında tədqiqat xarakterli sorğuların aparılması və nəticələrin oxuculara çatdırılması nəzərdə tutulub.

Mətbuat ailəsinə yenicə daxil olmuş "Kurrikulum" jurnalının yaradıcı heyətini təbrik edir, jurnala uzun ömürlülük ,onun yaradıcı kollektivinə isə uğurlar, məqsədlərinin reallaşdırılması yolunda səmərəli fəaliyyət arzulayırıq.

Y.ƏLİYEV