Beynəlxalq Avrasiya Təhsil İşçiləri Həmkarlar  İttifaqlarının III forumu keçirildi

Forum türkdilli dövlətlər arasında əlaqələrin möhkəmlənməsinə, təcrübə mübadiləsinin aparılmasına imkan verəcək

Noyabrın 3-də Bakıda Beynəlxalq Avrasiya Təhsil İşçiləri Həmkarlar İttifaqlarının III forumu keçirildi.

Forumdan əvvəl tədbir iştirakçıları Fəxri xiyabana gələrək ümummilli lider Heydər Əliyevin əziz xatirəsini ehtiramla yad etdilər, məzarı önünə əklil qoydular. İştirakçılar görkəmli oftalmoloq-alim, akademik Zərifə xanım Əliyevanın da məzarını ziyarət etdilər. Forum iştirakçıları  həmçinin Şəhidlər xiyabanına gedərək Azərbaycanın müstəqilliyi və ərazi bütövlüyü uğrunda şəhid olanların xatirəsini andılar.

Sonra forum Azərbaycan Həmkarlar İttifaqları Konfederasiyasının akt zalında öz işinə başladı.

Məlumat üçün bildirək ki, türkdilli dövlətlərin Beynəlxalq Avrasiya Təhsil İşçiləri Həmkarlar İttifaqları Birliyi 2006-cı ilin iyununda Türkiyə Respublikasının  paytaxtı Ankara şəhərində Azərbaycan, Türkiyə, Qazaxıstan  və Qırğızıstanın  Təhsil İşçiləri Həmkarlar İttifaqları rəhbərlərinin iştirakı ilə keçirilmiş forumda təsis  edilmişdir.

Birliyin əsas məqsədi üzv ölkələrdə təhsil işçilərinin əmək, sosial, iqtisadi hüquqlarının və qanuni mənafelərinin müdafiəsini, demokratiyanın və bərabərliyin inkişafını, əmək şəraitinin yaxşılaşdırılmasına nəzarəti, işləyənlərin peşə və sosial statusunun artırılmasını Beynəlxalq Avrasiya Təhsil İşçiləri Həmkarlar İttifaqları Birliyi səviyyəsində təmin etməkdir.   Birliyin II forumu 2007-ci ilin iyununda Qırğızıstan Respublikasının İssık-Kul vilayətində keçirilib və birgə əməkdaşlıq, fəaliyyət barədə müvafiq memorandum imzalanıb. Hazırda Bakıda keçirilən III forum daha bir türkdilli dövlətin - özbəkistan Respublikasının Elm və Təhsil İşçiləri Həmkarlar İttifaqının  Avrasiya Birliyinə daxil edilməsi ilə yaddaqalan oldu. Bu quruma gələcəkdə digər türkdilli dövlətlərin və muxtar respublikaların Elm və Təhsil İşçilərinin Həmkarlar  İttifaqlarının  daxil olması gözlənilir.

Tədbiri Azərbaycan Həmkarlar İttifaqları Konfederasiyasının sədri, millət vəkili Səttar Mehbalıyev açaraq forum iştirakçılarını Azərbaycan Təhsil İşçiləri Azad Həmkarlar İttifaqı Respublika Komitəsi adından salamladı. Bu mühüm tədbirdə iştirak edən Türkiyə, Qazaxıstan, Qırğızıstan və özbəkistandan olan  qonaqları burada görməyindən məmnunluq hissi keçirdiyini bildirdi. S.Mehbalıyev forum iştirakçılarını Azərbaycan Təhsil İşçiləri Azad Həmkarlar İttifaqı Respublika Komitəsinin fəaliyyəti ilə ətraflı tanış edərək dedi ki, qurum 360 min üzvü özündə birləşdirir. İttifaqda 5921 təşkilat, o cümlədən 75 şəhər, rayon komitəsi, 4959 ilk həmkarlar ittifaqı komitəsi, 886 təmsilçi var. Bütün bunlara rəhbərliyi Azərbaycan Təhsil İşçiləri Azad Həmkarlar İttifaqı Respublika Komitəsi həyata keçirir. ATİAHİ Respublika Komitəsi üzvlərinin əmək, sosial, iqtisadi hüquqlarının və qanuni mənafelərinin müdafiəsini təmin etmək üçün dövlət orqanları ilə qarşılıqlı əməkdaşlıq çərçivəsində fəaliyyət göstərir.

Millət vəkili Səttar Mehbalıyev  qeyd etdi ki, üzvlərin sosial-iqtisadi məsələlərinin həlli istiqamətində verilən təkliflər dövlət və hökumət tərəfindən hərtərəfli müdafiə olunur. Onların əmək hüquqlarının, sağlamlıqlarının qorunması, əmək haqlarının,  təqaüd və pensiyalarının, eləcə də işsizliyə görə müavinətlərinin həcminin artırılması  məqsədilə verilən təkliflərin əksəriyyətinin qəbul edilməsi isə olduqca təqdirəlayiqdir. Əmək Məcəlləsinə edilən bir sıra əlavə dəyişikliklər nəticəsində cəmiyyətdə həmkarlar ittifaqlarının rolu və statusu daha da artıb.

Son illər ölkəmizin iqtisadi cəhətdən gücləndiyini, dünyada qüdrətli bir ölkə kimi tanındığını deyən natiq bütün sahələrdə  inkişafın durmadan artdığını söylədi. Onu da xüsusi vurğuladı ki, artıq Azərbaycan kredit alan ölkədən kredit verən bir ölkəyə çevrilib. ölkəmizə maraq gündən-günə artmaqdadır. Bütün bunların ümummilli liderimiz Heydər Əliyevin siyasi kursunun layiqli davamçısı, ölkə başçısı cənab İlham Əliyevin məqsədyönlü fəaliyyətinin nəticəsi olduğunu bildirən S.Mehbalıyev daha sonra respublikamızda təhsil sahəsində görülən işlərə toxundu. Qeyd etdi ki, təhsil tarixində ilk dəfə olaraq 14 inkişafyönümlü Dövlət Proqramı təsdiq olunub və uğurla həyata keçirilməkdədir. Dövlət başçısı cənab İlham Əliyevin diqqət və qayğısı nəticəsində son illərdə 300 min şagird yerlik 1360 yeni məktəb binası tikilmiş, 300-dək məktəb əsaslı təmir edilmiş, 506 təhsil ocağı müasir avadanlıqlarla təmin olunmuşdur.

ölkəmizdə təhsillə bağlı görülən işlərdən söz açan S.Mehbalıyev Heydər Əliyev Fondunun prezidenti, YUNESKO- nun  və İSESKO-nun xoşməramlı səfiri, Milli Məclisin deputatı Mehriban xanım Əliyevanın təşəbbüsü ilə reallaşdırılan bir sıra proqramlardan, Fond tərəfindən həyata keçirilən tədbirlərdən geniş danışdı.

ölkəmizin bütün sahələrdə uğurlu inkişafından bəhs edən natiq xalqımızın ən ağrılı problemi olan Ermənistan-Azərbaycan, Dağlıq Qarabağ münaqişəsinə toxundu. Münaqişənin Azərbaycan təhsilinə zərbə vurduğunu söylədi. Bildirdi  ki, torpaqlarımızın 20 faizinin Ermənistan Respublikası tərəfindən işğal edilməsi nəticəsində Azərbaycan təhsilinə, onun maddi-texniki bazasına böyük ziyan dəymişdir. Belə ki, 1 milyondan artıq vətəndaşımız, o cümlədən 130 min şagird, 20 min müəllim öz yurd-yuvasından didərgin düşmüşdür.  Eyni zamanda  1000-dək təhsil müəssisəsi tamamilə dağıdılmışdır. S.Mehbalıyev bu ürəkağrıdıcı faktı forum iştirakçılarının nəzərinə çatdırdı. Onu da əlavə etdi  ki, ölkə başçısı cənab İlham Əliyevin bu problemin həlli yolunda apardığı məqsədyönlü işlər artıq dünya ölkələrinin diqqətindədir. O, respublika Prezidenti cənab İlham Əliyevin apardığı uğurlu daxili və xarici siyasət nəticəsində tezliklə torpaqlarımızın geri qaytarılacağına əminliyini ifadə etdi.

ölkəmizdə gedən inkişaf, tərəqqi haqqında qonaqlara ətraflı məlumat verən S.Mehbalıyev  daha sonra Beynəlxalq  Avrasiya Təhsil İşçiləri Həmkarlar İttifaqları Birliyinə üzv olan türkdilli dövlətlərin qarşısında duran mühüm vəzifələrə toxundu.

Forumda çıxış edən Türkiyə Respublikasının Təhsil İşçiləri Həmkarlar İttifaqı Komitəsinin sədri İsmail Koncuk, Qazaxıstan Respublikasının Elm və Təhsil İşçiləri Həmkarlar İttifaqı Komitəsinin sədri Mayra Amantayeva, Qırğızıstan Respublikasının Elm və Təhsil İşçiləri Həmkarlar İttifaqı Mərkəzi Komitəsinin sədri Asılbek Toktoqulov, özbəkistan Respublikasının Elm və Təhsil İşçiləri Həmkarlar İttifaqı Mərkəzi Şurasının sədr müavini Muratcan Şarifcanov Azərbaycan xalqının qonaqpərvərliyini xüsusi  vurğulayaraq burada özlərini vətənlərində olduğu kimi hiss etdiklərini söylədilər.

Onlar bildirdilər ki, keçirilən forumlar türkdilli dövlətlərin təhsil işçilərinin bir araya gəlməsinə, respublikaların təhsil sahəsində əldə etdikləri təcrübənin öyrənilməsinə, ittifaq üzvlərinin sosial, iqtisadi rifahının gücləndirilməsi istiqamətində görülən işlərlə yaxından tanış olmağa, ölkələrarası əməkdaşlığın genişləndirilməsinə, ən əsası isə xalqlarımızın daha da yaxınlaşmasına əlverişli imkanlar yaradır. çıxış edənlər həmçinin öz ölkələrində təhsil işçiləri həmkarlar ittifaqlarının fəaliyyətindən, bununla bağlı görülən işlərdən danışdılar.

Sonra Beynəlxalq Avrasiya Təhsil İşçiləri Həmkarlar İttifaqları Birliyinin III forumunun iştirakçıları tərəfindən qətnamə qəbul olundu.

Qətnamədə adıçəkilən birliyə daxil olan Təhsil İşçiləri Həmkarlar İttifaqları arasında informasiya və təcrübə mübadiləsi aparmaq məqsədilə ikitərəfli əlaqələrin genişləndirilməsi, türkdilli xalqların bir-birilə dostluğunu daha da möhkəmləndirmək məqsədilə təhsil işçiləri və ya təhsil alanlardan ibarət kollektivlərin bədii yaradıcılıq festivalının keçirilməsi, quruma  bütün türkdilli dövlət və muxtar respublikaların qəbul edilməsi istiqamətində fəaliyyətlərin gücləndirilməsi və digər məsələlər öz əksini geniş tapmışdı.

Qəbul edilmiş qətnamədə Ermənistan Respublikasının Azərbaycan ərazilərinin işğalı nəticəsində 130 mindən artıq şagirdin və 20 min müəllimin hüquqlarının pozulması faktı pislənildi.

Sonda Beynəlxalq Avrasiya Təhsil İşçiləri Həmkarlar İttifaqları Birliyinin növbəti, IV forumunun Qazaxıstan Respublikasında keçirilməsi qərara alındı.

Samirə KƏRİMOVA