Ali məktəblərə qəbul olunanların adları açıqlandı

Tələbə Qəbulu üzrə Dövlət Komissiyasından AzərTAc-a bildirmişlər ki, 2008-2009-cu tədris ili üçün respublikanın ali məktəblərinə keçirilən qəbul imtahanları nəticəsində müsabiqə şərtlərini ödəyən abituriyentlərin İnternet vasitəsilə ixtisas seçimi avqustun 5-də gecə saat 00:00-da başa çatmışdır.

Ali təhsil müəssisələrinə yerləşdirmənin nəticələri avqustun 6-da saat 16.00-da TQDK-nın İnternet saytında verilmişdir. Abituriyentlər ali məktəblərə qəbul olunub-olunmamaları barədə məlumatı mobil telefonla "İmtahancell" xidməti vasitəsilə də öyrənə bilərlər. Bunun üçün onlar iş nömrələrini 7727 nömrəsinə göndərməlidirlər.

Bu il ali məktəblərə ayrılmış 28 min 132 plan yerinə 26 min 571 nəfər qəbul olunmuşdur. Ali təhsil müəssisələrinə qəbul olunanların siyahısı avqustun 7-də "Abituriyent" jurnalının 5-ci nömrəsində dərc ediləcəkdir.

Tələbə adını qazananlar avqustun 11-dən 21-dək sənədlərini daxil olduqları təhsil müəssisəsinə təqdim etməli, TQDK tərəfindən ali məktəblərə təqdim olunmuş qəbul olunanların siyahısında imza etməklə qeydiyyatdan keçməlidirlər. Müəyyən edilmiş müddətdə qeydiyyatdan keçməmək abituriyentin müvafiq ixtisasa yerləşdirilməsindən imtina etməsi kimi qiymətləndiriləcək və onun qəbul haqqında əmri ali məktəbə göndərilməyəcəkdir.

Dövlət Neft Şirkəti bu il 22 tələbəni xaricə təhsil almağa göndərəcək

Azərbaycan Respublikası Dövlət Neft Şirkətinin Təqaüd Proqramı çərçivəsində bu il daha 22 tələbə xarici ölkələrin ali təhsil ocaqlarında oxumağa göndəriləcəkdir.

Dövlət Neft Şirkətindən bildirmişlər ki, artıq həmin tələbələrin 5 nəfərdən ibarət ilk qrupu Almaniyaya yola salınmışdır. Onlardan 4-ü ikiillik magistr dərəcəsi, 1-i isə üçillik bakalavr pilləsi üzrə müxtəlif universitetlərdə oxuyacaqdır.

Əvvəlcə Berlində iki aylıq kurslara cəlb olunacaq bu tələbələr, əsasən, iqtisadiyyat və neft mühəndisi ixtisası üzrə təhsil alacaqlar. Növbəti 2 qrupun yola salınması isə avqustun axırı, sentyabrın əvvəllərinə planlaşdırılır. Onlar Almaniya ilə yanaşı, Fransa, Böyük Britaniya, Hollandiya və Amerikanın nüfuzlu universitetlərinə göndəriləcəklər.

Şirkətin 2006-cı ildən həyata keçirdiyi Təqaüd Proqramı çərçivəsində hazırda 29 tələbə təhsilini xaricdə davam etdirir. Artıq onlardan 4-ü Vətənə qayıtmış və ixtisasları üzrə işlə təmin olunmuşdur.

Beynəlxalq elmi-praktik konfrans keçiriləcək

Oktyabrın 7-də Ukraynanın Vinnitsa şəhərində "İnternet-Elm-Təhsil - 2008" mövzusunda altıncı beynəlxalq elmi-praktik konfrans keçiriləcəkdir.

Vinnitsa Milli Texniki Universitetində keçiriləcək tədbirin təşkilatçıları Bakı Dövlət Universiteti, Rumıniyanın Stefan çel Mare Universiteti və Ukrayna İnformasiya Texnologiyalarına Dəstək və Onların İnkişafı Assosiasiyasıdır.

Konfransın məqsədi elm, təhsil və sənayedə informasiya texnologiyaları və İnternetdən istifadənin son elmi və praktik nəticələrini müzakirə etmək, yeni əlaqələrin qurulmasına nail olmaq və gəncləri elmi axtarışlara cəlb etməkdir.

AzərTAc

İstedadlı uşaqlar üçün yay təlim - istirahət düşərgəsi açılıb

Avqustun 4-də paytaxtın Şüvəlan qəsəbəsindəki 16 nömrəli internat məktəbin bazasında ümumtəhsil məktəblərinin xüsusi istedada malik şagirdləri üçün yay təlim-istirahət düşərgəsi açılıb. Təhsil Nazirliyinin müvafiq əmrinə əsasən təşkil olunmuş düşərgədə hazırda 43 uşaq dincəlir.

 Təhsil Nazirliyi Kənd rayonları üzrə ümumi təhsil və məktəbəqədər tərbiyə şöbəsinin müdiri Aydın Əhmədovdan aldığımız məlumata görə, belə düşərgələrin təşkili "Xüsusi istedada malik uşaqların (gənclərin) yaradıcılıq potensialının inkişafı üzrə Dövlət Proqramı (2006-2010-cu illər)"nın icrası ilə əlaqədar nazirliyin Fəaliyyət Planında nəzərdə tutulub. Belə ki, planın 17.1. bəndində Bakı şəhərində və digər kurort zonalarında fəaliyyət göstərən internat tipli müəssisələrdə istedadlı uşaqlar üçün yay və qış təlim - istirahət düşərgələri yaradılması xüsusi olaraq qeyd edilib. Şüvəlanda açılmış yay təlim - istirahət düşərgəsi bu sahədə ilk təşəbbüsdür. Düşərgəyə riyaziyyat, fizika, kimya, biologiya fənləri üzrə yerlərdə aşkara çıxarılmış istedadlı şagirdlər arasından ən layiqlilərini  müəyyənləşdirmək məqsədi ilə 2008-ci ilin mayında Bakı şəhərində  aparılmış təkrar seçimdə fərqlənənlər, respublika fənn olimpiadası və digər bilik yarışlarının qalibləri cəlb olunmuşlar. Onlar ölkənin müxtəlif bölgələrini təmsil edir. Bir neçə il əvvəl Heydər Əliyev Fondu tərəfindən yüksək səviyyədə təmir olunmuş 16 nömrəli internat məktəbdə istedadlı uşaqların öz istirahətlərini mənalı keçirmələri üçün hər cür şərait var, burada kompüter sinifləri fəaliyyət göstərir.

Düşərgədə uşaqlar istirahət etmək, vaxtlarını mənalı keçirməklə yanaşı, bir-birləri ilə yaxından  tanış olmaq, ünsiyyətə girmək, görkəmli alimlərlə görüşmək imkanı qazanacaqlar. Tanınmış alimlər tərəfindən onlarla təlim məşğələlərinin keçirilməsi nəzərdə tutulub. Bütün bunlar istedadlı uşaq və gənclərin alimlərlə təmas qurmasına, tədqiqatçılıq qabiliyyətlərinin üzə çıxarılması üçün mütəxəssislərin onlarla daha yaxından məşğul olmasına imkan verəcək. Uşaqlara şərait yaradılacaq ki, müəyyən problemlər haqqında yaş xüsusiyyətlərinə və bilik səviyyələrinə uyğun öz fikirlərini bildirsinlər, diskussiyalarda iştirak edib fikir mübadiləsi aparsınlar. İstedadlı  uşaqları qarşıda bir-birindən maraqlı mədəni-kütləvi tədbirlər də gözləyir.

Yay təlim - istirahət düşərgəsi 2 həftə davam edəcək.

Yusif ƏLİYEV

Yeni dərs ili qarşısında

Bakıdakı Əsəd Əhmədov adına 308 nömrəli ümumtəhsil məktəbi ötən dərs ilində istifadəyə verilmiş təhsil ocaqlarındandır. 1296 şagird yerlik məktəbdə 511 şagirdin təlim-tərbiyəsi ilə 50 müəllim məşğul olur. Təhsil ocağında akt zalı, yeməkxana, rəqs studiyası, idman zalı, üzgüçülük hovuzu şagirdlərin istifadəsinə verilib.

Tədris ilini uğurla başa vurmuş məktəbin dəhlizlərində şagirdlərin davranışına nəzarət etmək üçün kameralar  qurulub, I-Xl sinif şagirdləri üçün ədəb qaydaları asılıb.

Məktəbdə müəllimlər ayrı-ayrı fənn kabinetlərində  interaktiv təlim metodlarından istifadə etməklə dərslərini yüksək səviyyədə qura bilirlər.

Direktor Təranə Məmmədova bildirdi ki, sentyabrda bu təhsil müəssisəsinin istifadəyə verilməsinin bir ili tamam olacaq. - İndi yeni dərs ilinə hazırlıq işləri gedir. Keçən illə müqayisədə qarşıdakı dərs ilində şagirdlərimizin sayı çoxalacaq. Məktəbin təchizat sahəsində də elə bir problem yoxdur, su, istilik sistemi saz vəziyyətdədir.

Tətil günləri davam etsə də müəllimlərdən Zərifə Hidayətova, Aidə Əfəndiyeva, Tahirə Əsədova və Həcər Əliyeva tez-tez məktəbə  gəlir, yeni dərs ilinə hazırlıqla  əlaqədar köməkliklərini əsirgəmirlər.  

Şakir CƏFƏROV     

Daxili imkanlar hesabına

Sumqayıt Dövlət Universitetində yeni dərs ilinə hazırlıq çərçivəsində cari təmir işləri aparılır. Universitetin təsərrüfat işləri üzrə prorektoru Rafiq Səfiyevdən aldığımız məlumata görə, iyul ayının əvvəllərindən başlamış təmir daxili imkanlar hesabına təhsil ocağının texniki işçiləri tərəfindən həyata keçirilir.

Dördmərtəbəli iki korpusdan ibarət təhsil müəssisəsinin bütün dəhlizlərində və auditoriyalarında döşəmələr təmir edilir, qapı və pəncərələr dəyişdirilir, ağartma və rəngləmə işləri aparılır. ümumilikdə ağacdan hazırlanmış 311 qapının, plastik materialdan istehsal edilmiş 400-dən yuxarı pəncərənin dəyişdirilməsi nəzərdə tutulub.

Həmçinin istilik sistemi, su boruları, elektrik xətləri dəyişdirilir, sanitar qovşağı müasir tələblər səviyyəsində yenidən qurulur.

Universitetin akt zalı da əsaslı təmir olunaraq yeni oturacaqlarla təchiz edilib, həyətyanı sahədə səliqə-sahman yaradılıb. Abadlaşdırılmış idman meydançasında yeni qurğular qurulub. Tələbələr üçün soyunub-geyinmə otağı və şırnaqlar quraşdırılmış hamam inşa edilib.

Universitetin I korpusu təzə stol və stullarla tam təchiz ediləcəkdir. Təmir yeni dərs ilinə kimi başa çatacaq.

Nizami MİRZƏ

Rusiyanın ən yaxşı pedaqoqlarının adı açıqlanıb

Rusiya Federasiyasının Təhsil və Elm Nazirliyi 2008-ci il müsabiqəsinin qalibləri olan 10 min ən yaxşı müəllimin adını təsdiq edib. Onların hər biri "Təhsil" milli layihəsi çərçivəsində 100 min rubl miqdarında dövlət yardımı alacaqdır.

Xatırladaq ki, müsabiqə üçüncü ildir ardıcıl keçirilir. 2006 və 2007-ci illər ərzində 20 min Rusiya müəllimi dövlətdən yardım alıb. 2008-ci ildə mükafata əvvəlki müsabiqələrdə qalib gəlməyən pedaqoqlar iddia edə bilərdilər.

ölkənin bütün regionlarında ən yaxşı müəllimləri hamilərin assosiasiyalarının, məzunların, ümumi təhsil məsələləri üzrə ekspertlərin və məsləhətçilərin, rektorlar şurasının, peşə təhsili müəssisələri rəhbərlərinin, işə götürənlər birliklərinin, valideynlərin və digər ictimai təşkilatların iştirakı ilə xüsusi yaradılmış komissiyalar seçmişlər.

Seçim kriteriyaları kimi son 3 ildə şagirdlərin təlim nailiyyətlərinin müsbət dinamikası, uşaqların tədris fənləri üzrə dərsdənkənar fəaliyyətdə uğurları, müəllimlərin sinif rəhbəri kimi işinin nəticələri, müasir təlim texnologiyalarından, o cümlədən İKT-dən istifadə, şəxsi pedaqoji təcrübənin ümumiləşdirilməsi və yayılması, peşə müsabiqələrində iştirak, ixtisasın artırılması götürülmüşdür.

Qaliblər RF Təhsil və Elm Nazirliyinin mükafatını və diplomlarını ənənəyə uyğun olaraq peşə bayramı - Müəllim Günü ərəfəsində alırlar.

 Şəkidə 6 məktəb üçün yeni bina tikilir

Azərbaycanın bütün bölgələrində olduğu kimi Şəkidə də məktəb tikintisinə və təmirinə böyük diqqət yetirilir. Son illər rayonda 11 məktəb üçün yeni bina və əlavə tədris korpusu tikilib istifadəyə verilmiş, 4 kənd və qəsəbə məktəbi əsaslı təmir olunmuşdur.

Rayonda məktəb tikintisi bu il də sürətlə davam etdirilir. Hazırda rayonun Baş Göynük 2 nömrəli, Kiçik Dəhnə 2 nömrəli kənd orta məktəblərinin hər biri  üçün 640, Aydınbulaq və Dərəcənnət kənd orta məktəbləri üçün 240, Kosalı və Aşağı Kəldək kənd məktəbləri üçünsə hərəsi 80 şagird yerlik yeni binalar tikilir. Dövlət proqramı çərçivəsində büdcə vəsaiti hesabına inşa olunan məktəb binalarının yeni dərs ilinə istifadəyə verilməsi nəzərdə tutulub.

Eyni zamanda rayonda 9 məktəbin istilik sisteminin müasir tələblər səviyyəsində yenidən qurulması  işi  başa çatmaqdadır. Bunlardan əlavə, rayonun digər təhsil ocaqlarında da daxili imkanlar hesabına cari təmir işləri aparılır. Bu məqsədlə 140 min manat vəsait ayrılmışdır.

Təzə inşa olunan bütün məktəblər müasir tədris avadanlıqları ilə təmin olunacaqdır.

Y.ƏLİYEV

Əsaslı təmir işləri aparılır

Yeni dərs ilinə hazırlıqla əlaqədar Bakının Nizami rayonunda yerləşən 62 nömrəli orta məktəbdə əsaslı təmir-tikinti işləri aparılır. Belə ki, Təhsil Nazirliyinin ayırdığı vəsait hesabına təhsil ocağı binasının çöl  və içəri divarları qaşınıb. Məktəbin bütün otaqlarının qapı və pəncərələri, istilik qurğuları, tavan və döşəmələr təzələri ilə əvəz olunub. Məktəbin direktoru Mətanət  Cabbarlıdan aldığımız məlumata görə, 46 ildir ki, fəaliyyət göstərən təhsil ocağı bu günə kimi əsaslı təmir olunmayıb. Təhsil ocağında 40 sinif otağı, 2 laboratoriya, idman və akt zalları, 3 informatika kabineti var. Yeni dərs ilinə kimi məktəb tam təmir olunaraq şagirdlərin və müəllimlərin ixtiyarına veriləcək. 

Rəşad  ZİYADOV

Muzeyin restovrasiyası başa çatıb

2005-ci ildə Azərbaycan Respublikasının Prezidenti İlham Əliyevin göstərişi və Milli Məclisin qəbul etdiyi "Azərbaycan Respublikasının muzeyləri haqqında" qanun çərçivəsində Nizami adına Ədəbiyyat Muzeyinin əsaslı şəkildə rekonstruksiya edilməsinə başlanıldı. üç il müddətində bina  təmir olundu, fondun qlobal inventarizasiyası aparıldı, müasir qurğular  yerləşdirildi, dünya standartlarına cavab verən ən yeni texnologiya tətbiq edildi.

Binanın çölünün və içərisinin, döşəmə və tavanın, pəncərə və qapıların təmiri üçün ən bahalı materiallardan istifadə olunub.  Muzeyin mükəmməl soyutma və istilik sistemləri yaradılıb. Kompüterlərlə təmin olunan muzeydə artıq bir çox dövrlər və şəxsiyyətlər layiqincə təqdim olunub. Muzeyin zallarında çoxlu ədəbi süjetli  xalçalar, tətbiqi sənət nümunələri, rəsm əsərləri, bu və ya başqa bir dövrü əks etdirən mebellər vardır. Binanın perimetri boyunca Azərbaycanın ən görkəmli sənətçilərinin portretləri və qısa şəkildə onların əsərləri haqqında annotasiya yerləşdirilib. Fəvvarələr meydanında quraşdırılmış monitorda tarixi mövzulara aid süjetlər nümayiş etdiriləcək. Bu da nəinki  bakılılara, həmçinin şəhərimizin qonaqlarına Azərbaycan xalqının tarixinə və mədəni dəyərlərinə bələd olmağa imkan yaradacaq.

L.ƏLİYEVA

 Pekin olimpiadasında ölkəmizi  təmsil  edən idmançılarımıza uğurlar arzulayırıq

Bu gün Pekində Yay Olimpiya  Oyunları öz işinə başladı. Bununla əlaqədar "Təhsil" Respublika İdman Mərkəzindən aldığımız məlumatda bildirilir ki, XXIX Yay Oimpiya Oyunlarında ölkəmizdən 27 idman növü üzrə - güləş (sərbəst güləş 7, yunan-Roma güləşi 6 və qadın güləşi 3), taekvando (1), gimnastika(qrup hərəkətləri üzrə  komanda 6, fərdi yarışlarda 2), boks (2),  atıcılıq(1), atçılıq (1), üzgüçülük (2), cüdo (6), atletika (2)  və ağırlıq qaldırma (5) idman növlərində cəmi 44  idmançı iştirak edir. İdman tariximizdə  ilk dəfə olaraq  atletlərimiz olimpiadanın atçılıq yarışlarında və bədii gimnastika üzrə qrup hərəkətlərində öz qüvvələrini sınayırlar. Həm də "Pekin - 2008" qadın güləşçilərimizin mübarizə aparacağı ilk  olimpiya kimi tarixə düşəcək.

ölkəmizi  təmsil edən  idmançıların 8 nəfəri "Təhsil" Respublika İdman  Mərkəzinin nümayəndəsidir.  Onlardan Ramil Quliyev (atletika, 73 kq, məşqçisi Eldar Quliyev) 5 nömrəli Bakı şəhər İOEUGİM-nin, Vəfa Hüseynova (bədii gimnastika, 49 kq, məşqçisi Nina Qasımova), Valeriya Yeqay (bədii gimnastika, 57 kq, məşqçisi  Valentina Ukleina) 4 nömrəli  Bakı şəhər İOEUGİM-nin və Əfqan Bayramov (ağırlıqqaldırma, 69 kq, məşqçisi Soltan Kərimov), İlqar Abdulov (yunan-Roma güləşi, 74 kq, məşqçisi Bəhram  Mürvətov), Oksana Hətəmxanova (üzgüçülük, 49 kq, məşqçisi Vaqif  Nəsibov), Şalva Qadabadze (yunan-Roma güləşi, 84 kq, məşqçisi Bəhram  Mürvətov), Tural Abbasov (üzgüçülük, 76 kq, məşqçisi Vaqif Nəsibov) isə 1 nömrəli  Respublika  İxtisaslaşdırılmış Olimpiya Ehtiyatları Uşaq - Gənclər İdman Məktəbinin  yetirmələridir.

Biz də idmançılarımıza uğurlar arzulayırıq. 

Dərsliklər avqustun sonuna kimi hazırlanaraq yerlərə göndəriləcək

Təhsil Nazirliyindən aldığımız məlumatda bildirilir ki, 2008-2009-cu dərs ilinə nəşri nəzərdə tutulan 68 adda dörd milyon nüsxəyə yaxın  dərsliyin çapı başa çatmaq üzrədir. Dərsliklərin 70 faizdən çoxu təchizat  bazasına təhvil  verilib. Hazırda bu dərsliklər təsdiq olunmuş bölgü əsasında   respublikanın rayon və şəhərlərinin təhsil şöbələrinə  göndərilir.

I siniflər üçün Milli Kurrikulum əsasında dərslik hazırlığı da yekunlaşmaq ərəfəsindədir. Bütün dərsliklər avqustun sonuna kimi  hazırlanaraq yerlərə göndəriləcək.

Şakir CƏFƏROV

Yeni kurrikulumun tələblərinə uyğun hazırlanacaq II sinif dərslikləri üçün tender elan olunub

Təhsil Nazirliyi 2009-2010-cu dərs ilinə ümumtəhsil məktəblərinin II sinifləri üçün dərslik komplektlərinin yeni kurrikulumun tələblərinə uyğun olaraq hazırlamasını və çapını təşkil etmək məqsədi ilə tender elan edib. Komplektə dərslik, müəllim üçün vəsait və iş dəftəri daxildir.

Tender iki mərhələdə 14 lot üzrə keçiriləcək. Tender yolu ilə ibtidai məktəbin II sinfi üçün Azərbaycan  və rus bölmələri üzrə 21 dərslik komplektinin hazırlanması və çapı nəzərdə tutulur. Tenderdə dərsliklərin hazırlanması və çapı sahəsində təcrübəsi, texniki və maliyyə imkanları olan nəşriyyat-poliqrafiya müəssisələri (müəllif və ya müəlliflər qrupu ilə birlikdə) iştirak edə bilərlər. "İddiaçı" statusu alanlar 2008-ci il sentyabrın 1-dən sonra məlum olacaq.

Y.ƏLİYEV