Məktəb direktorları üçün seminar 

Müasir Təhsil və Tədrisə Yardım Mərkəzi Təhsil Nazirliyinin dəstəyi ilə 4-6 avqust tarixlərində məktəb rəhbərləri üçün "Məktəb direktorları: peşəkarlıq, liderlik və səmərəlilik" mövzusunda seminar keçirib. Məktəb direktorlarının peşəkarlığını artırmaq, onları məktəbin idarə olunması sahəsindəki dünya təcrübəsi ilə, mütərəqqi modellərlə tanış etmək məqsədi daşıyan seminarda paytaxtdan və bölgələrdən 17 məktəb direktoru iştirak edib.

Seminarın məşğələlərini ABŞ-ın Cənubi Konnektikut Universitetinin professoru xanım Ketrin Magno aparıb. Seminarda "Liderlik ehtiyaclarının müəyyən edilməsi", "Liderliyin sahələri", "Şəxsi liderlik keyfiyyətləri və bacarıqları ilə əlaqəli fəaliyyətlər", "Məktəbin təkmilləşməsinin yeni modelləri: ABŞ təcrübəsi", "Məktəb liderinin qiymətləndirilməsi", "Valideynlərin təhsil prosesində iştirakı" və s. mövzu və istiqamətlər ətrafında müzakirələr aparılıb, təqdimatlar olub.

Avqustun 6-da Müasir Təhsil və Tədrisə Yardım Mərkəzində üçgünlük seminarın başa çatması və iştirakçılara sertifikatların təqdim olunması ilə bağlı mərasim keçirildi. Mərasimdə təhsil naziri Misir Mərdanov, nazirliyin Strateji təhlil, planlaşdırma və kadrların idarəolunması şöbəsinin müdiri Fərzəli Qədirov, Bakı Şəhəri üzrə Təhsil İdarəsinin müdiri Nailə Rzaquliyeva iştirak edirdilər.

Mərasimi giriş sözü ilə açan təhsil naziri Misir Mərdanov seminar üçün seçilmiş mövzunun aktuallığını qeyd etdi, Müasir Təhsil və Tədrisə Yardım Mərkəzinin təhsilimizin inkişafı naminə fəaliyyətini, irəli sürdüyü təşəbbüsləri təqdir edən nazir seminarın keçirilməsini, onda şəhər məktəbləri ilə yanaşı, bölgələrdən də xeyli ümumtəhsil müəssisə rəhbərinin iştirakını yüksək dəyərləndirdi. Bütövlükdə təhsil sistemində idarəetmə məsələlərinin öyrədilməsinə böyük ehtiyac duyulduğunu deyən Misir Mərdanov indiyədək ölkəmizin ali məktəblərində təhsilin idarəolunması ilə bağlı ayrıca ixtisasın öyrədilməməsini, təhsil menecerlərinin hazırlanmamasını təəssüf hissi ilə qeyd edib, bu məqsədlə yaxın gələcəkdə Azərbaycan Respublikası Prezidenti yanında Dövlət İdarəçilik Akademiyasında müvafiq şöbə və ya bölmənin yaradılması mümkünlüyü barədə fikirlərini tədbir iştirakçıları ilə bölüşdü.

Məktəbi idarə etməkdən ötrü xüsusi istedad və qabiliyyət tələb olunduğunu söyləyən təhsil naziri məktəb direktoru üçün zəruri olan liderlik keyfiyyətlərindən söz açdı, bu keyfiyyətləri hər bir məktəb rəhbərinin özündə aşılamasının vacibliyini vurğuladı. Məktəb direktorluğuna təyinat məsələsinə toxunan təhsil naziri yaxın gələcəkdə direktorluğa namizədlərin məktəbin icması tərəfindən irəli sürülməsi barədə təşəbbüslə çıxış ediləcəyini söylədi.

Misir Mərdanov çıxışının sonunda seminarın təşkilatçılarına minnətdarlığını bildirdi, onun aparıcısı, ABŞ-ın Cənubi Konnektikut Universitetinin professoru xanım Ketrin Magnoya təşəkkür etdi.

Seminarda söz alan xanım Ketrin Magno Azərbaycana gəlməsindən, belə bir xeyirxah, öyrədici tədbirdə təlimçi kimi iştirakından məmnun qaldığını söylədi.

Sonra seminarda iştirak etmiş direktorlara sertifikatlar təqdim olundu.

Yusif ƏLİYEV