Uşaq Gənclər İdman Məktəbi şagirdlərin istifadəsinə verildi

Martın 12-də Nəsimi rayonundakı 12 nömrəli İxtisaslaşdırılmış Olimpiya Ehtiyatları Uşaq Gənclər İdman məktəbinin açılış mərasimi oldu.

Mərasimdə təhsil naziri Misir Mərdanov, təhsil nazirinin müavini Elmar Qasımov,  gənclər və idman nazirinin müavini İsmayıl İsmayılov, Nəsimi Rayon İcra Hakimiyyətinin başçısı Nəsib Məhəməliyev, Milli Məclisin deputatı ülvi Quliyev, Təhsil Nazirliyinin İctimaiyyətlə əlaqə şöbəsinin müdiri Bayram Hüseynzadə  və başqaları iştirak edirdilər.

Açılış mərasimini  təhsil naziri Misir Mərdanov açaraq son illərdə idman sahəsində həyata keçirilən tədbirlərdən, bu sahədə qazanılan uğurlardan söhbət açdı. Nazir bildirdi ki, son illər Azərbaycan idmançılarının qazandığı qələbələr bu sahəyə ölkə başçısı cənab İlham Əliyevin diqqət və qayğısı sayəsində mümkün olmuşdur. İndi demək olar ki, rayonlarımızın böyük əksəriyyətində idman mərkəzləri fəaliyyət göstərir. Bu sahədə qazanılan uğurlarda məktəbli gənclərin də payı olduğunu vurğulayan nazir bu sahənin daim diqqət mərkəzində saxlanacağını bildirdi. 

Sonra nazir qırmızı lenti kəsdi və 12 nömrəli İxtisaslaşdırılmış Olimpiya Ehtiyatları Uşaq Gənclər İdman Məktəbinin gələcək fəaliyyətinə uğurlar arzuladı.

Təhsil naziri Misir Mərdanov və mərasimə gələn qonaqlar idman məktəbinin məşq, soyunub-geyinmə otaqları ilə tanış oldular. Məktəbin direktoru Elçin Mehdizadə qonaqlara məlumat verdi ki, hazırda məktəbdə iki idman növü üzrə - həndbol və taekvando bölməsi fəaliyyət göstərir. Cəmi 500 şagirdimiz var ki, bunlarla 15 məşqçi-müəllim məşğul olur. Şagirdlərimizdən Cahid Tağızadə 45 kq çəkidə 2007-ci ildə Almaniyada keçirilən dünya birinciliyində Şərq əlbəyaxa döyüş növləri üzrə gənclər arasında dünya birincisi olmuşdur. Digər şagirdimiz Elvin Şükürov isə yeniyetmələr arasında 3-cü yeri tutmuşdur.

Sonda məktəbin direktoru Elçin Mehdizadə 12 nömrəli İxtisaslaşdırılmış Olimpiya Ehtiyatları Uşaq Gənclər İdman Məktəbində yaradılan bu şəraitə görə Azərbaycan Respublikası Prezidenti cənab İlham Əliyevə, təhsil naziri Misir Mərdanova məktəbin şagird və pedaqoji kollektivi adından dərin minnətdarlığını bildirdi.

Şakir CƏFƏROV