|
Qazaxıstanda karate-do idman növünün WKF versiyası üzrə
“Aktau kuboku” beynəlxalq turniri keçirilib.
Azərbaycanın Aktau şəhərindəki baş konsulluğundan
AZƏRTAC-a bildiriblər ki, yerli idmançılarla yanaşı,
Azərbaycan, Gürcüstan, Qırğızıstandan 400-dən artıq
karateçinin qatıldığı turnirdə 6-18 yaşadək və böyüklər
arasında yarışlar keçirilib.
Azərbaycanlı idmançılar turnirdə uğurla çıxış ediblər.
Fərdi yarışlarda Firdovsi Fərzəliyev, Rəfael Ağayev,
Ayxan Mamayev, Şahin Atamov və İnci Əzimova öz çəki
dərəcələrində turnirin qalibləri olublar. Renata
Ələkbərli, Elvin Əhmədli, Pənah Abdullayev, Orxan
Heydərli və Murad Hacızadə ikinci yeri, Tural Ələkbərli,
Turqut Həsənov və Əli Cəfərov üçüncü yeri tutublar.
Məşqçi Elnur İbrahimin rəhbərliyi ilə çıxış edən
idmançılarımız ümumilikdə beş qızıl, beş gümüş və üç
bürünc medal qazanıblar. Beləliklə, “Azərbaycan-1”
kollektivi böyüklər arasında komanda yarışlarında
birinci olub. “Azərbaycan-2” komandası isə üçüncü yerə
çıxıb.
Baş konsulluqda idmançılarımızla Aktau şəhərində yaşayan
azərbaycanlı gənclər arasında görüş keçirilib. Görüşdə
Azərbaycanda idmanın inkişafı istiqamətində görülən
işlərdən, Prezident İlham Əliyevin idmançılara diqqət və
qayğısından danışılıb. |
