|
 Dekabrın
10-da 2015-ci ilin Nobel mükafatı laureatlarının
mükafatlandırılması mərasimi keçirilib. Mərasim 1896-cı
il dekabrın 10-da vəfat edən Alfred Nobelin anım günündə
baş tutub. İlk olaraq Norveçin paytaxtı Osloda 2015-ci
ilin Sülh mükafatları sahiblərinə təqdim olunub.
Mükafat İsveç kralı V Haraldın iştirakı ilə “Tunis milli
dialoq Kvarteti” təşkilatının fəallarına verilib.
İsveçin paytaxtı Stokholmda isə fizika, kimya,
fiziologiya və təbabət, ədəbiyyat və iqtisadiyyat
sahələrində mükafatların təqdim edilməsi mərasimi olub.
Builki 11 Nobel mükafatı laureatından 10-u Stokholm
Filarmoniyasında keçirilən mərasimdə İsveç Kralı XVI
Karl Qustavın əlindən üzərində Nobelin təsvir edildiyi
qızıl medal, diplom və pul mükafatlarını alıblar.
Mükafatlandırma mərasimində bütün laureatlara çıxış
etmək imkanı da verilib. Sonda Nobel mükafatı
laureatları və qonaqları üçün rəsmi bayram ziyafəti
təşkil olunub.
Xatırladaq ki, fizika sahəsində 2015-ci ilin Nobel
mükafatı neytrinonun kütləsinin mövcud olmasını təsdiq
edən neytrino ossilyasiyalarının kəşfinə görə iki alimə
- yaponiyalı Takaaki Kodzitaya və kanadalı Artur
Makdonalda, kimya üzrə Nobel mükafatı müvafiq olaraq üç
alimə - britaniyalı Tomas Lindal, Pol Modriç və əslən
türkiyəli olan amerikalı alim, ABŞ-ın Şimali Karolina
Universitetinin biokimya və biofizika fakültəsinin
professoru Əziz Səncərə verilib. Tibb sahəsi üzrə Nobel
mükafatlarına amerikalı Uilyam Kempbell, yaponiyalı
Satosi Omura və çinli qadın Yuyu Tu layiq görülüblər.
Ədəbiyyat sahəsində Nobel mükafatına isə görkəmli
əsərlərinə görə Belarus yazıçısı Svetlana Aleksiyeviç
layiq görülüb. İqtisadiyyat üzrə Nobel mükafatı
mikroiqtisadi proseslərin və istehlakçıların davranışı
sahəsində tədqiqatlara görə britaniyalı alim Enqus
Ditona verilib. Qeyd edək ki, 2015-ci ildə də Nobel
mükafatı laureatlarının pul mükafatı formal olaraq
dəyişməyib və əvvəlki iki ildə olduğu kimi yenə də 8
milyon İsveç kronu təşkil edib.
Oruc MUSTAFAYEV,
“Azərbaycan müəllimi” |
