|
 Dekabrın
25-də Bakı Dövlət Universitetinin kafedra müdiri,
biologiya elmləri doktoru, professor, Beynəlxalq
Pedaqoji Elmlər Akademiyasının və Beynəlxalq Ekoenerji
Akademiyasının akademiki, Prezident təqaüdçüsü, “Şöhrət”
ordenli Qara Teyfur oğlu Mustafayevin 84 yaşı tamam
olur.
Bu günlərdə Sabunçu rayonunun Bakıxanov qəsəbəsindəki
Nazim İsmayılov adına 80 nömrəli tam orta məktəbdə Qara
Mustafayevlə görüş keçirildi.
Məktəbə daxil olanda hər kəsin böyük sevinc və həyəcanla
qonağı gözlədiklərinin şahidi olduq. Hətta məktəbin
şagirdlərinin valideynləri də vaxtilə müəllimləri olmuş
Qara müəllimi səbirsizliklə gözləyirdilər.
Tədbiri giriş sözü ilə açan məktəbin direktoru Əlislam
Abasquliyev öz çıxışında vaxtilə Azərbaycan Televiziyası
ilə yayımlanan “Təbiəti sevənlər”, indi isə “Azərbaycan
təbiəti” adlı proqramların yaradıcısı və əvəzsiz
aparıcısı, ölkəmizin füsunkar təbiətinin cəfakeş
təbliğatçısı olan Qara müəllimin həyatının əsas
məqamlarına toxundu. O bildirdi ki, “Şöhrət” ordenli
Qara Mustafayev yarım əsrdən artıq elmi-pedaqoji
fəaliyyəti dövründə çoxlu sayda alim-mütəxəssis
yetişdirib. Bunların arasında qonşu dövlətlərin
nümayəndələri də var. Qara müəllimin saysız yetirmələri
ölkəmizin ali və orta məktəblərində biologiyanın
müxtəlif sahələrini tədris edirlər. Olduqca sadə və
təvazökar insan olan Qara müəllimin biblioqrafiyası
geniş və zəngindir (onlarla monoqrafiya, dərslik və dərs
vəsaiti, metodik göstəriş, bədii-publisistik kitab,
500-dən çox elmi və populyar əsər və s.). Bu əsərlər
dünyanın 20-yə yaxın ölkəsində müxtəlif dillərə tərcümə
edilib.
Tədbirdə Bakı Şəhəri üzrə Təhsil İdarəsinin əməkdaşi
Fərman Abdullayev, Sabunçu Rayon İcra Hakimiyyətinin
ictimai-siyasi və humanitar məsələlər şöbəsinin baş
məsləhətçisi Məhəmməd Əsədov, “AZƏRTAC”ın müxbiri,
şairə-publisist Zərəngiz Mansurova və başqaları fədakar
alimin elmimiz qarşısındakı xidmətlərindən danışdılar.
Pedaqoq-alimin yetirmələri - Bakı Dövlət Universitetinin
dosent əvəzi, biologiya üzrə fəlsəfə doktoru Anar
Məmmədov və 80 nömrəli tam orta məktəbin biologiya
müəllimi Zülfiyyə Mehdiyeva Qara müəllimin maraqla
keçən, unudulmaz dərslərindən xatirələrini bölüşdülər.
Tədbirdə məktəblilər şair-publisist və təbiətşünas alim
Anar Məmmədovun ustadı Qara Mustafayevə həsr olunan,
eləcə də təbiəti vəsf edən şeirlərindən ibarət
ədəbi-bədii kompozisiya nümayiş etdirdilər. Alimin ömür
yoluna aid foto-slayd təqdim olundu.
Daha sonra məktəbin direktoru Ə.Abasquliyev Qara
müəllimə məktəbin fəxri üzvü seçilməsi münasibətilə
fəxri diplom təqdim etdi.
Tədbirin keçirilməsində əməyi və iştirakı olanlara dərin
təşəkkürünü bildirən Qara Mustafayev öz uşaqlıq və
gənclik illərindən xatirələrini danışdı, müəllimlik
peşəsinin nə qədər şərəfli bir peşə olduğunu, bu peşəni
canından artıq sevdiyini vurğuladı və məktəblilərə
dərslərində uğur dilədi. Sonda məktəbin müəllim-şagird
heyəti, qonaqlar və məktəblilərin Qara müəllimin vaxtilə
tələbəsi olmuş valideynləri alimlə xatirə şəkli
çəkdirdilər.
Zülfiyyə MEHDİYEVA,
Bakı şəhəri 80 nömrəli tam orta məktəbin biologiya
müəllimi |
