|
 Lənkəran
Dövlət Universitetində Azərbaycan Demokratik
Respublikasının ilk hərbi naziri, general-leytenant
Səməd bəy Mehmandarovun anadan olmasının 160 illiyinə
həsr edilmiş konfrans keçirilib. Konfransı universitetin
rektoru, fizika-riyaziyyat elmləri doktoru, əməkdar elm
xadimi, professor Asəf İsgəndərov açaraq Səməd bəy
Mehmandarovun Azərbaycanın hərb salnaməsinə unudulmaz
səhifələr yazdığını, özünün sərkərdəlik məharəti və
şücaəti ilə böyük həyat yolu keçdiyini bildirib.
Universitetin tarix və fəlsəfə kafedrasının dosenti,
tarix üzrə fəlsəfə doktoru Əliağa Baxşıyev general Səməd
bəy Mehmandarovun həyat və fəaliyyəti haqqında məruzə
edib. Məruzədə qeyd olunub ki, Səməd bəy Mehmandarov
ilk təhsilini Lənkəranda atası Sadıqbəyin maddi yardımı
ilə fəaliyyət göstərən Mirzə İsmayıl Qasirin
“Üsuli-cədid” məktəbində, sonra isə Bakıda gimnaziyada
alıb.
Dil və ədəbiyyat kafedrasının dosenti, filologiya üzrə
fəlsəfə doktoru Mirhüseyn Abbas, mülki müdafiə və tibbi
biliklər kafedrasının müəllimi Arif Məmmədov,
tələbələrdən Pərviz Yadigaroğlu, Rəşad Paşayev,
universitetin mətbuat və informasiya xidmətinin rəhbəri
Hacı Etibar Əhədov Səməd bəy Mehmandarovun xatirəsinin
Lənkəranda da əziz tutulduğunu bildiriblər. Qeyd olunub
ki, qəhrəmanın adını əbədiləşdirmək məqsədilə Lənkəranda
küçələrdən birinə onun adı verilib, vaxtı ilə yaşamış
olduğu binaya xatirə lövhəsi vurulub.
Sonra konfrans işirakçıları universitetin Elmi
kitabxanasında general Səməd bəy Mehmandarovun 160
illiyinə həsr edilmiş guşəyə baxıblar.
Tədbirdə rayon ictimaiyyətinin nümayəndələri iştirak
ediblər.
Mətbuat və informasiya xidməti |
