|
Respublika Şahmat Mərkəzinin ilk direktoru, tanınmış
məşqçi Fuad Cəfərovun xatirəsinə həsr olunan şahmat
festivalına start verilib.
AZƏRTAC xəbər verir ki, Respublika Şahmat Mərkəzində
keçirilən festival açıq (B), uşaq (C), rapid (D) və
blits (E) turnirlərindən ibarətdir.
Festivalda 84 zəka sahibinin mübarizə apardığı uşaq
turnirində 5 turdan sonra iki şahmatçı liderlik edir.
Yetmiş bir şahmatçının iştirak etdiyi açıq turnirdə isə
üçüncü turun oyunları yekunlaşıb. Yüz faizlik nəticəni
Samir Davidov, Elvin Bayramov, Fariz Əhmədov, Zaur
Bayramov və Andrey Mustafin toplayıblar.
İsveçrə sistemi üzrə 7 turdan ibarət keçirilən rapid
turniri artıq başa çatıb. Bu turnirdə 72 şahmatçı
mübarizə aparıb. Yeddi turdan sonra Nail Bəşirli, Xəyalə
Abdulla və Rəşad Zeynallı hərəyə 6 xal toplayaraq 1-3-cü
yerləri bölüşdürüblər. Nail Bəşirli əlavə göstəricilərə
görə yarışın qalibi adını qazanıb.
Fuad Cəfərov memorialına dekabrın 13-də yekun vurulacaq. |
