|
 Dekabrın
9-da Bakı Şəhəri üzrə Təhsil İdarəsi məktəblərdə “Kiçik
Akademiya”ların fəaliyyətinin təkmilləşdirilməsilə bağlı
“dəyirmi masa” keçirib. “Dəyirmi masa”da “Kiçik
Akademiya” yaratmaq mərhələsində olan 80 məktəb rəhbəri
iştirak edib. “Dəyirmi masa”da gənc alim Rüfət Əzizov,
Bakı Şəhəri üzrə Təhsil İdarəsinin müdir müavini
Məhəbbət Vəliyeva, İnkişaf layihələri sektorunun müdiri
Lamiyə Şərəfxanova, Azərbaycan Futuroloqlar Cəmiyyətinin
nümayəndəsi təqdimatlar ediblər. Hədəf 2015–2016-cı
tədris ilində təşəbbüs göstərən 105 məktəbdə “Kiçik
Akademiya”nın fəaliyyətinə düzgün istiqamət vermək olub.
Çıxış edənlər “Kiçik Akademiya”ların təşkilində əsas
məqsədin yuxarı sinif şagirdlərinin elmi axtarışlara
sövq edilməsi, onların müasir tədqiqat metodlarına
yiyələnməsi, ali təhsil müəssisələri ilə ümumtəhsil
müəssisələri arasında əlaqələrin genişləndirilməsindən
ibarət olduğunu bildiriblər. Bundan başqa, elmi tədqiqat
fəaliyyətinə meyli olan istedadlı şagirdlərin vaxtında
aşkara çıxarılması və onların fəaliyyətlərinin
stimullaşdırılması da “Kiçik Akademiya”ların əsas
məqsədlərindəndir.
Qeyd edək ki, məktəblərdə “Kiçik Akademiya”ların
fəaliyyətinin genişləndirilməsi istiqamətində Təhsil
Nazirliyi ilə Azərbaycan Milli Elmlər Akademiyası (AMEA)
arasında əldə olunmuş razılığa əsasən, AMEA-da çalışan
alimlər 26 tam orta məktəbdə nümunəvi dərslər tədris
edəcəklər.
Nümunəvi dərslər təhsil naziri Mikayıl Cabbarovun
AMEA-nın 70 illik yubileyi mərasimində “Elmdən Təhsilə”
adlı məqsədli proqramı ilə bağlı irəli sürdüyü təşəbbüsə
uyğun olaraq təşkil ediləcəkdir. Nümunəvi dərslər
dekabrın 10-dan etibarən başlayacaqdır.
AMEA alimlərinin elmi və elmi-populyar mövzular üzrə
tədris edəcəkləri dərslər elmlə təhsil arasında əlaqənin
genişləndirilməsi, məktəblilərin elmə marağının
artırılması və tanınmış alimlərin ardıcıllarının
yetişdirilməsi məqsədlərinə xidmət edir.
www.bakuedu.gov.az |
