|
“İstək” liseyi “Kembric məktəbi” (“Cambridge school”)
statusu qazanıb. “Kembric məktəbi” statusu liseyin
şagirdlərinə fənləri Kembric Universitetinin
standartlarına uyğun öyrənərək beynəlxalq sertifikat
əldə etməyə imkan yaradacaq. Liseyin şagirdlərinin bu
fənlər üzrə sertifikatları ABŞ, Kanada, Rusiya, Fransa,
İngiltərə, Türkiyə ilə yanaşı dünyanın 160 ölkəsində də
tanınacaq.
“Kembric məktəbi” statusu Kembric Universiteti
tərəfindən müvafiq beynəlxalq standartlara cavab verən
məktəblərə verilir. “Kembric məktəb”ləri 4 səviyyə (“Cambridge
Primary”, “Cambridge Secondary”, “Cambdridge Secondary
2”, “Cambridge Advanced”) üzrə ibtidai, orta və yuxarı
sinif şagirdlərinin beynəlxalq dərəcəli hazırlığı və
sertifikatlaşdırılmasını təmin edir. Hazırda “Kembric
məktəbi”nin imkanlarından liseyin orta sinif şagirdləri
faydalanmaq imkanına malik olsa da, lisey yaxın
gələcəkdə ibtidai və yuxarı sinif şagirdlərinin də bu
istiqamətdə hazırlığı və sertifikatlaşdırılmasını təmin
etməyi planlaşdırır.
Xatırladaq ki, 2015-ci ilin sentyabrında “Cambridge
English Language Authorised Centre” statusu qazanmış
“İstək” liseyi ümumtəhsil müəssisəsidir. Lisey
Azərbaycan Respublikası Təhsil Nazirliyinin müvafiq
lisenziyası əsasında Bakı, Quba, Şirvan, Lənkəran,
Ağdaş, Mingəçevir və Gəncə şəhərlərində fəaliyyət
göstərir. “İstək” liseyi IB (International
Baccalaureate/Beynəlxalq Bakalavriat) Diplom Proqramı
(DP) üzrə namizəd məktəb, rəsmi olaraq nəticələri 175
ölkənin universitetlərində qəbul olunan SAT imtahanı
mərkəzidir. |
