|
Dekabrın 7-də Azərbaycan Təhsil İşçiləri Azad
Həmkarlar İttifaqı Respublika Komitəsinin V məclisi
keçirilib. Azərbaycan Həmkarlar İttifaqları
Konfederasiyasının konfrans zalında keçirilən yığıncaqda
respublikanın müxtəlif bölgələrinin, eləcə də paytaxt
rayonlarının TİAHİ komitələrinin, ali və orta ixtisas
təhsili müəssisələrinin müəllim və tələbə həmkarlar
ittifaqı təşkilatlarının sədrləri iştirak ediblər.
Tədbir iştirakçıları öncə “Günəşli” yatağının 10
saylı stasionar dərin dəniz özülündə baş verən qəza
nəticəsində həlak olanların xatirəsini bir dəqiqəlik
sükutla yad ediblər.
Yığıncaqda ilk olaraq ATİAHİ Respublika
Komitəsinin V məclisinin gündəliyi və reqlamenti təsdiq
olunub. Azərbaycan Həmkarlar İttifaqları
Konfederasiyasının sədri, Milli Məclisin deputatı Səttar
Mehbalıyev ATİAHİ Respublika Komitəsi tərəfindən görülən
işlərdən danışıb. Qeyd olunub ki, təhsil sahəsində
çalışanların istər iqtisadi, sosial rifahının
yaxşılaşdırılması, hüquqlarının müdafiəsinə köməklik
göstərmək, təhsil müəssisələrində əməyin mühafizəsi,
təhlükəsizlik texnikası, sağlam və təhlükəsiz təhsil və
iş şəraitinin yaradılması, istərsə də onların asudə
vaxtlarının səmərəli təşkili ATİAHİ Respublika
Komitəsinin diqqət yetirdiyi ən mühüm məsələlərdəndir.
Respublika Komitəsinin öz fəaliyyətində tələbə gənclərlə
aparılan işlərə xüsusi önəm verdiyini bildirən sədr,
gələcəkdə bu işlərə diqqətin daha da artırılması ilə
bağlı müəyyən məsələlərə toxunub.
Sonra ATİAHİ Respublika Komitəsinin sədr müavini
Mirzə Cəfərzadə “İş yerlərində əməyin mühafizəsini
tənzim edən qanunvericiliyə, istehsalat zədələri
nəticəsində əmək xəsarətinə görə zərərin ödənilməsinə,
əmək şəraiti, istehsalat sanitariyası normalarına
işəgötürənlər tərəfindən əməl edilməsinə ATİAHİ-nin üzv
təşkilatlarının nəzarətləri barədə” hazırlanmış arayışı
məclis iştirakçılarının diqqətinə çatdırıb.
Daha sonra ATİAHİ Respublika Komitəsinin katibi,
şöbə müdiri Mübariz Eyvazovun komitənin 2016-cı il büdcə
və ümumi büdcəsi, ştat cədvəli ilə bağlı təqdim etdiyi
məlumatlar müzakirə olunaraq təsdiq edilib. V Məclisdə
həmçinin ATİAHİ Respublika Komitəsinin Məclis və Rəyasət
Heyəti üzvləri arasında qismən dəyişiklik edilməsi
barədə məsələ də müzakirə edilərək müvafiq qərar qəbul
olunub.
Samirə KƏRİMOVA,
“Azərbaycan müəllimi” |
