|
 Nəzərə
alsaq ki, dərslik problemi hətta bütün ailələrdə
müzakirə olunan bir məsələdir, onda 13-22 noyabr 2015-ci
il tarixdə Xəzər Universitetində Təhsil Nazirliyinin
keçirdiyi “Dərsliklərin hazırlanması və
qiymətləndirilməsi” təliminin nə qədər aktual olduğu
aydın görünər. Təlim iştirakçısı kimi bəzi fikirlərimi
həmkarlarımla bölüşmək istəyirəm.
Müəllim baxımından həmişə şanslı olmuşam. Bakı Dövlət
Universitetinin, Moskva Dövlət Universitetinin ən
nüfuzlu müəllimlərindən dərs almışam. Xətai rayon 147
nömrəli texniki-humanitar liseyində isə dünya şöhrətli
alim, akademik Azad Mirzəcanzadədən öyrənmək nəsibim
olub. Sözügedən təlimdə isə mən Türkiyədən gəlmiş Ankara
Qazi Universitetinin müəllimi, dosent doktor Salih
Şahinlə tanış oldum. 25 illik bir təcrübəyə malik olan
çox məsuliyyətli, dərin bilik sahibi, öz peşəsini sevən
bu insan “İdeal dərsliklər necə olmalıdır?”,
“Şagirdlərdə bacarıqların formalaşması üçün hansı
üsullar daha çox effekt verir?”, “Şagirdi təlim
prosesinin komponentinə necə çevirmək olar?” kimi
məsələləri bizə öyrətməyə çalışdı. Yorulmadan, həvəslə
bizimlə məşğul oldu. Nəzərə alsaq ki, təlim gündə 5 saat
davam edirdi, bu bizi yormadı, zövq aldıq, təlimin
sonunda isə hamımız kədərləndik.
Salih hocadan “Qiymətləndirmə üçün ekspertdən əsasən nə
tələb olunur?” sorğuma - “Vicdan”, deyə cavab verən bu
müəllim təkcə peşəsinin aşiqi deyil, həm də hansı əqidə
sahibi olduğunu sübut etdi.
Təlimdə hamımızın ən çox maraqlandığı sahələrdən biri də
dərsliklərimizin Avropa-Türkiyə dərslikləri ilə
müqayisəsi oldu. Yeri gəlmişkən, bu arada Yaponiya
dərslikləri ilə də tanış ola bildik. Səmimi olaraq qeyd
edim ki, son dövrlər dərsliklərimizdəki irəliləyişlər
danılmazdır, amma problemlərimiz də var.
Mən Azərbaycanımla fəxr edirəm və arzulayıram ki, bizim
övladlarımız da məhz belə sadə, rəngarəng,
inkişafetdirici dərsliklərə sahib olsunlar. Düzdür, bu,
çətindir, amma mümkündür. Çətinliklərimizi anlayıram,
lakin bu təlimdən bəhrələnən müəllimlər problemlərin
öhdəsindən gəlmək iqtidarındadırlar. Mən inanıram ki,
biz qarşımıza qoyulan məqsədə - dünyanın ən inkişaf
etmiş dövlətlərində istifadə olunan dərsliklər
nümunəsində dərsliklər hazırlanmasına nail olacağıq,
cünki bu sahədə bizi dəstəkləyən dövlətimiz və öz işini
bilən müəllimlərimiz var.
Sonda bütün təlim iştrakçıları adından layihəni
hazırlayan Təhsil Nazirliyinə və Xəzər Universitetinə
dərin təşəkkür edirik. Ankara Qazi Universiteti egitim
fakültəsinə, Coğrafiya Egitimi rəhbərliyinə Salih hoca
kimi bir insanla tanış olmağımıza şərait yaratdıqlarına
görə sonsuz minnətdarlığımızı bildiririk.
Güntəkin MƏMMƏDOVA,
Bakı şəhər 147 nömrəli texniki-humanitar liseyin tarix
müəllimi,
“Ən yaxşı müəllim” müsabiqəsinin qalibi |
