|
 Dekadrın
1-də Bakı şəhəri 245 nömrəli tam orta məktəbdə
Respublika Gənc Turistlər və Diyarşünaslıq Mərkəzinin
təşəbbüsü ilə görkəmli hərbi xadim, Azərbaycan Xalq
Cümhuriyyətinin hərbi naziri, general Səməd bəy
Mehmandarovun 160 illik yubileyinə həsr olunmuş tədbir
keçirilib. Azərbaycanın Dövlət himni ilə başlayan
tədbiri məktəbin dil-ədəbiyyat müəllimi İlhamə
Həsənova açaraq qonaqları salamlayıb.
Sonra söz yazıçı-publisist Şəmistan Nəzərliyə verilib.
Bildirilib ki, 1918-ci il dekabrın 26-da Xalq
Cümhuriyyətinin hərbi naziri təyin olunan, rus ordusunda
xidmət etmiş artilleriya general-leytenantı Səməd bəy
Mehmandarov qısa müddətdə 30 minlik ordu yaratmağa nail
olub, ölkəmizin ərazi bütövlüyünün qorunmasında, hərbi
təhlükəsizliyin təmin olunmasında mühüm tarixi rol
oynayıb.
Çıxış edənlər Səməd bəy Mehmandarovun keçdiyi şərəfli
həyat yolundan bəhs ediblər. Vurğulanıb ki, general
döyüş meydanlarındakı yüksək peşəkarlığı və zabit
şərəfinə hədsiz sədaqəti ilə Azərbaycan xalqının hərb
salnaməsinə unudulmaz səhifələr yazıb.
Sonra VI “d” və IX “d” sinif şagirdlərinin ifasında
vətənpərvərlik mövzusunda şeirlər, mahnılar səslənib,
ədəbi-bədii kompozisiya nümayiş olunub.
Məktəbin direktoru Ülviyyə İsmayılova tədbirin təşkilati
işlərində və keçirilməsində əməyi olan Respublika Gənc
Turistlər və Diyarşünaslıq Mərkəzinin metodiki
şöbəsinin müdiri Vəsilə Əhmədovaya, metodist Nəzakət
İbrahimovaya təşəkkürünü bildirib.
Sonda mərkəzin rəhbərliyi tərəfindən fəal şagirdlərə
diplomlar təqdim olunub.
Sifai SƏFƏROVA,
“Azərbaycan müəllimi” |
