|
 Artıq
bir neçə müddətdir ki, Ağababa İbrahimov Goranboy Rayon
Təhsil Şöbəsinin müdir müavini vəzifəsində çalışır. Öz
yüksək peşəkarlığı, idarəetmə sahəsindəki əldə etdiyi
uzunillik təcrübəsi onun rəhbərliyi ilə Goranboy
rayonunun təhsilində mühüm irəliləyişlərin olacağına
əminlik yaradır. Elə bu günlərdə Goranboy rayonunun
Qaradağlı kənd tam orta məktəbinin Azərbaycan dili və
ədəbiyyat müəllimi Ülkər Hümbətovanın qəzetimizə
göndərdiyi yazısında da adıçəkilən rayonun təhsili ilə
bağlı son vaxtlar canlanmanın hiss olunmasından, rayonun
təlim- tərbiyə müəssisələrində bir sıra müsbət işlərin
görülməsindən, orta ümumtəhsil məktəblərində təlimin
keyfiyyətinin yüksəldilməsi istiqamətində aparılan
işlərdən, məktəb-ictimaiyyət-valideyn münasibətlərinə
diqqətin artırılması məsələlərinə xüsusu önəm
verilməsindən söz açılır. Bir müəllimin qələmə aldığı
sətirlərdə bütövlükdə Goranboy təhsilində aparılan
əsaslı dəyişikliklərdən bəhs olunur. Yazının müəllifi
Goranboy Rayon Təhsil Şöbəsinin müdir müavini Ağababa
İbrahimovun məhz adıçəkilən rayonda fəaliyyətə başladığı
gündən ilk işinin bütün təlim-tərbiyə müəssisələrində
çalışan təhsil işçiləri ilə yaxından tanış olmasını,
onlarla səmimi ünsiyyətini, Azərbaycan təhsilinin
inkişafında bu rayonun təhsil işçilərinin öz töhfələrini
vermələri üçün bir sıra təkliflərini, tövsiyələrini
yüksək qiymətləndirir. Yazıda deyilir: “Ağababa müəllim
səmimiyyəti ilə bizləri özünə yaxın dost edib. Onun
Goranboyda təhsillə bağlı konkret mühüm addımların
atılması üçün bizimlə bölüşdüyü dəyərli fikirlər
müəllimlərin, bütövlükdə rayonun təhsil ictimaiyyətinin
qarşısında olduqca mühüm vəzifələr qoyur. Ağababa
müəllim rayonumuzun təhsilinin inkişafı, onun nüfuzunun
yüksəldilməsində olduqca qərarlıdır. Onun uzunillik
təhsil sahəsindəki səmərəli, peşəkar fəaliyyəti biz
müəllimlərdə rayonumuzun təhsil həyatında əsaslı
irəliləyişlərin olacağına, qısa bir müddət ərzində
təhsil sahəsində yeni-yeni uğurlara imza atacağımıza
əminlik yaradır”.
Biz də bu nikbin notlar üzərində qurulmuş yazının
müəllifinin əminlik ifadə edən fikirlərinə qoşularaq
yaxın vaxtlarda Goranboy rayonunun təhsilinin inkişaf
edəcəyindən, onun keyfiyyətinin yüksələcəyindən,
qazanacağı yeni-yeni nailiyyətləri ilə Azərbaycan
təhsilində özünəməxsus yer tutacağına ümid edirik və
bu yolda rayon təhsil şöbəsinin müdir müavini
Ağababa İbrahimova uğurlar arzulayırıq.
Samirə KƏRİMOVA,
“Azərbaycan müəllimi” |
