|
 Bayırda
yağışlı, küləkli, soyuq noyabr günüdür. Qəzli kənd tam
orta məktəbinin akt zalına toplaşan müəllim və
şagirdlərə bu darıxdırıcı hava heç təsir etmir. Onlar
bütün həyatını yana-yana yaşamış bir şəxsiyyətin, odlu
misraları ilə qəlblərə hərarət gətirən bir söz ustasının
- xalq şairi Bəxtiyar Vahabzadənin sözünün işığında
isinirdilər.
Divarlarda şairin dillər əzbəri olan şeirlərindən
misraların və tanınmış şəxsiyyətlərin B.Vahabzadə
haqqındakı fikirlərinin əks olunduğu plakatlar
asılmışdı. Öncə videolent vasitəsilə şairin səsi zala
yayıldı. Sonra məktəbin təlim-tərbiyə işləri üzrə
direktor müavini Zəka Cabbarov yığıncağı açıq elan etdi.
O, tədbirin əhəmiyyətindən, şairin ədəbiyyatımızın və
ədəbi dilimizin inkişafındakı rolundan söz açdı, qazax
xalqının tanınmış şairi Oljas Süleymenovun B.Vahabzadə
haqqında söylədiyi fikri xatırlatdı: “Bəxtiyar Vahabzadə
kimi şairi, ziyalısı, müəllimi, nəhayət, şəxsiyyəti olan
millət xoşbəxtdir”.
Sonra söz digər natiqlərə verildi. Hər kəs sevimli şair
haqqında söz demək istəyirdi. Təşkilatçı müavin Süleyman
Süleymanov, dil-ədəbiyyat muəllimləri Firəngiz Ağayeva,
Tünzalə Mustafayeva və başqaları B.Vahabzadə
yaradıcılığının müxtəlif istiqamətlərindən -
şairliyindən, alimliyindən, pedaqoqluğundan,
publisistikasından danışdılar.
Təqaüddə olan müəllim Dadaş Rüstəmov B.Vahabzadə
yaradıcılığının pərəstişkarı və gözəl bilicisidir. Onun
şairin poeziyasından hərarətlə əzbərdən söylədiyi
müxtəlif nümunələr zaldakıları ovsunlamışdı.
Söz şagirdlərə verildi. Onlar şairin çoxşaxəli
yaradıcılığını əks etdirən vətən, ana dili, azadlıq,
sevgi ruhlu şeirlərini həvəslə söylədilər. Şairin “Muğam”,
“Gülüstan”, “Şəhidlər” və s. poemalarından parçalar
səsləndirildi. Şagirdlərdən Simarə Rəhimovanın, Vəzifə
Mustafayevanın, Şəbnəm Bağırovanın, Xədicə Həsənlinin,
Nəzrin Şirvanlının, Simarə Mustafalının, İlahə
Məmmədlinin, Hikmət Abdullayevin və başqalarının
çıxışları maraqla qarşılandı. Yuxarı sinif
şagirdlərinin ifasında “Özümüzü kəsən qılınc” pyesindən
kiçik bir parça oynanıldı. Bəxtiyar Vahabzadə
yaradıcılığına həsr olunmuş yarışma tədbirə rəng qatdı.
Sonda iştirakçılar videogörüntü vasitəsilə Türkiyə
prezidenti R.T.Ərdoğanın ifasında B.Vahabzadənin
“Azərbaycan, Türkiyə” şeirini dinlədilər.
Firəngiz İSKƏNDƏRQIZI,
Sabirabad rayonu,
Babək Rəhimov adına Qəzli kənd tam orta məktəbinin
dil-ədəbiyyat müəllimi |
