|
 Noyabrın
16-da Naxçıvan Dövlət Universitetində Naxçıvan Muxtar
Respublikası Təhsil Nazirliyi ilə birgə muxtar
respublikanın ümumtəhsil məktəblərində çalışan biologiya,
kimya və fizika müəllimləri üçün həftə sonuna qədər
davam edəcək seminar öz işinə başlayıb.
Tədbiri universitetin rektoru, AMEA-nın müxbir üzvü
Saleh Məhərrəmov açaraq Azərbaycanda təhsilin inkişaf
strategiyasından, ümummilli lider Heydər Əliyevin təhsil
siyasətinin uğurlu davamından danışıb. Rektor keçirilən
seminarların müəllimlərin biliklərinin
təkmilləşdirilməsi baxımından böyük rolu olacağını,
birgə seminar və kursların bundan sonra da davam
etdiriləcəyini bildirib.
Naxçıvan Muxtar Respublikasının təhsil naziri Piri
Nağıyev tədbirdə çıxış edərək vurğulayıb ki, bu gün
muxtar respublikamızda təhsilə diqqət və qayğı ən yüksək
səviyyədədir. Yeni məktəb binalarının tikilib istifadəyə
verilməsi, məktəblərin tədris imkanlarının müasir
tələblərə uyğunlaşdırılması, onların yüksək
maddi-texniki baza və ən müasir
informasiya-kommunikasiya texnologiyaları ilə təchiz
olunması və eyni zamanda müəllimlərin fəaliyyəti üçün
hərtərəfli şəraitin yaradılması, onların əməkhaqlarının
artırılması muxtar respublikada təhsilə göstərilən
qayğının bariz nümunəsidir. Nazir ölkəmizin gələcəyi
olan gənclərin dövlətçiliyimizə sədaqət ruhunda
böyümələri, yaxşı təhsil alaraq ölkəmizə və xalqımıza
layiqli vətəndaş kimi yetişmələri üçün müəllimlərin
üzərinə düşən böyük öhdəlikdən danışıb. Vurğulanıb ki,
ümumtəhsil məktəblərində kimya, biologiya, fizika
laboratoriyalarında müasir tədris və təcrübə
avadanlıqlarının qoyulması
şagirdlərin dəqiq elmlərə olan marağını artırır. Bu
laboratoriyalardan düzgün istifadə isə həmin fənləri
tədris edən müəllimlərdən asılıdır. Nazir həmçinin
texniki fənlər üzrə şagirdlərin istedad və
bacarıqlarının aşkara çıxarılması üçün Naxçıvan Muxtar
Respublikası Ali Məclisi Sədrinin sərəncamına əsasən
Şərur Şəhər Fizika-Riyaziyyat Təmayüllü Liseyin də
yaradıldığını nəzərə çatdırıb.
Naxçıvan Dövlət Universitetinin tədris işləri üzrə
prorektoru, filologiya üzrə fəlsəfə doktoru, dosent Surə
Seyid çıxış edərək hər il keçirilməsi ənənə halını almış
seminarların müəllimlərin nəzəri biliklərinin
artırılmasına xidmət etdiyini, ali və orta ümumtəhsil
məktəb müəllimləri arasında elmi mübadilə baxımından
faydalı olduğunu bildirib. Surə Seyid seminarın
qrafikini və mühazirə mövzularını dinləyicilərə təqdim
edib, seminarla bağlı tövsiyələrini verib.
Sonra seminarın ilk dərsi öz işinə başlayıb. Öncə
müəllimlər Naxçıvan Dövlət Universitetinin fizika, kimya
və biologiya laboratoriyalarında əyani tədris vasitələri
və elektron təcrübə avadanlıqları ilə tanış olublar.
Qeyd edək ki, həftə sonuna qədər davam edəcək seminarda
biologiya, kimya və fizika müəllimləri üçün müxtəlif
mövzular keçiləcək.
Mina QASIMOVA |
