|
 Noyabrın 16-da Azərbaycan Dövlət Pedaqoji
Universitetində “Beynəlxalq Tolerantlıq Günü” münasibəti
ilə tədbir keçirildi. Tədbirdə universitetin
professor-müəllim kollektivi, əcnəbi tələbələr və digər
şəxslər iştirak edirdilər.
Tədbiri giriş sözü ilə açan ADPU-nun beynəlxalq
əlaqələr üzrə prorektoru, dosent Mehdi Abdullayev
iştirakçıları salamlayaraq bu günün yaranma tarixi,
tolerantlıq və multikulturalizm anlayışlarının mahiyyəti
barədə ətraflı məlumat verdi. Prorektor M.Abdullayev
bildirdi ki, UNESCO-nun 1995-ci il noyabr ayının 16-da
keçirilən 28-ci sessiyasında 185 dövlətin iştirakı ilə
tolerantlıq prinsipləri haqqında Bəyannamə qəbul edilib.
BMT Baş Assambleyasının 1996-cı ildə qəbul etdiyi qərara
əsasən quruma üzv ölkələrə hər il noyabrın 16-nı
Beynəlxalq Tolerantlıq Günü kimi qeyd etmək və bununla
bağlı təhsil müəssisələrində, eləcə də geniş ictimaiyyət
arasında müvafiq tədbirlər keçirmək tövsiyə olunub.
Azərbaycanda bu gün 1999-cu ildən qeyd olunur.
M.Abdullayev qeyd etdi ki, müstəqil Azərbaycan
dövlətinin memarı və qurucusu, ulu öndərimiz Heydər
Əliyev tolerantlılığı və multikulturalizmi dövlət
siyasətinin əsas istiqamətlərindən biri elan etmiş,
ölkəmizdə olan bütün xalqların, milli azlıqların, etnik
qrupların bərabər hüquqlar əsasında yaşamaları üçün
səmərəli əməli fəaliyyət göstərmişdir. Azərbaycan
Respublikasının Prezidenti cənab İlham Əliyevin siyasi
iradəsi və mütərəqqi siyasəti sayəsində bu gün ölkəmiz
tolerantlıq və multikulturalizm baxımından bütün dünya
üçün nümunədir. Azərbaycanda bütün xalqlar və milli
azlıqlar dini mənsubiyyətlərindən asılı olmayaraq, azad
və müstəqil yaşayırlar. Onların dini etiqad azadlığı
yüksək səviyyədə təmin edilmişdir. M.Abdullayev
universitetdə təhsil alan əcnəbi tələbələrə də daim
xüsusi diqqət və qayğı göstərildiyini nəzərə çatdırdı.
Dövlət tərəfindən aparılan siyasətin universitetdə də
uğurla davam etdiyini bildirdi.
Tədbirdə Bakı Slavyan Universitetinin Azərbaycan
multikulturalizmi kafedrasının dosenti, tarix üzrə
fəlsəfə doktoru Rauf Hacı çıxış etdi.
Tədbirdə çıxış edən ADPU-nun tələbələri Türkiyə
vətəndaşları Mehmet Demirhan, Gündüz Aylin universitetdə
onlara yaradılan şəraitdən danışaraq Azərbaycanda öz
vətənlərində olduqları kimi rahat olduqlarını diqqətə
çatdırdılar.
Niyazi RƏHİMOV,
“Azərbaycan müəllimi”
foto Rəşad ZİYADOV |
