|
 Noyabrın 19-da Azərbaycan Respublikası Təhsil
Problemləri İnstitutu (ARTPİ) və “Autizm Defektoloji və
Psixoloji Yardım Mərkəzi” İctimai Birliyi (ADPYM), ali
və xüsusi təhsil müəssisələrinin təhsil işçiləri və KİV
nümayəndələrinin iştirakı ilə “Autizmli uşaqların
cəmiyyətə inteqrasiyası” mövzusunda “dəyirmi masa”
keçirildi.
“Dəyirmi masa”nı giriş sözü ilə açan ARTPİ-nin
direktoru, hüquq üzrə fəlsəfə doktoru Qulu Novruzov
XXI əsrin qlobal problemi hesab edilən autizmin
ölkəmizdə də aktual məsələlərdən biri olduğunu, dünya
əhalisinin 1 faizinin, yəni 70 milyon nəfərin autizmin
qurbanı olduğunu, qeyri-rəsmi stastistikaya görə
respublikamızda təxminən 4000-ə yaxın uşağın autizm
sindromundan əziyyət çəkdiyini söylədi. Tədbirin 20
noyabr Uşaq Hüquqlarının Müdafiəsi günü ərəfəsində
keçirilməsinin təsadüfi olmadığını qeyd edən Q.Novruzov
autizm sindromlu uşaqların müəyyənləşdirilməsi, onların
cəmiyyətə inteqrasiyası və s. bu kimi məsələlərə
toxunaraq bu sahədə qanunvericiliyin
təkmilləşdirilməsinin vacibliyini qeyd etdi. “Dəyirmi
masa”nın keçirilməsində məqsədin cəmiyyətin diqqətini
autizmli uşaqların problemlərinə cəlb etmək, mövcud
çətinlikləri aradan qaldırmaq üçün yollar axtarmaq,
onların ictimai həyatda tamhüquqlu iştirakını təmin
etməkdən ibarət olduğunu söylədi.
Tədbirdə millət vəkili Qənirə Paşayeva “Autizm
probleminin qanunvericilikdə öz əksini tapması”
mövzusunda çıxış etdi.
Milli Məclisin üzvləri Hadı Rəcəbli, Fazil Mustafa
mövzu ətrafında çıxış edərək autizm sindromlu uşaqların
cəmiyyətə inteqrasiyasının qanunvericiliklə
tənzimlənməsinin vacibliyini vurğuladılar.
Tədbirdə autizmli uşaqlar və onların
valideynlərinin qarşılaşdıqları çətinliklər,
diaqnostikanın bir çox hallarda düzgün aparılmaması,
ümumtəhsil və inklüziv təlim-tərbiyə müəssisələrinin
autizmli uşaqları qəbul etməkdən çəkinmələri, təhsil
müəssisəsinə qəbul üçün heç bir normativ sənəddə autizm
sindromunun qeyd olunmaması, autizmli uşaqların sosial
reabilitasiyasının düzgün təşkil edilməməsi,
cəmiyyətimizin və valideynlərin autizm sindromu
haqqında məlumatlarının az və ya təhrif olunmuş formada
olması, habelə autizm sindromlu uşaqların
qarşılaşdıqları problemlər, onların həlli yollarının
müəyyənləşdirilməsi, bütün bu kimi məsələlərin
qanunvericilikdə öz əksini tapması müzakirə olundu.
Niyazi RƏHİMOV,
“Azərbaycan müəllimi”
foto Rəşad ZİYADOV |
