|
 Məlum
olduğu kimi, “Naxçıvan Muxtar Respublikası Ali Məclisi
Sədrinin “Kitabi-Dədə Qorqud”un alman dilində ilk
tərcüməsi və nəşrinin 200 illiyinin Naxçıvan Muxtar
Respublikasında qeyd edilməsi ilə bağlı “Tədbirlər
Planı”nın təsdiq edilməsi haqqında 25 iyul 2015-ci il
tarixli Sərəncamına əsasən, muxtar respublikada silsilə
tədbirlər keçirilməkdədir. Bu tədbirlərin davamı olaraq
“Naxçıvan” Universitetinin xarici dillər fakültəsinin
tələbələri tərəfindən ilk dəfə olaraq Dədə Qorqud
dastanındakı Uruzun dustaq olduğu, Qazan xanın onu xilas
etdiyi boydakı əsər səhnələşdirilmişdi.
Tamaşa başlamazdan əvvəl universitetin rektoru,
professor İsmayıl Əliyev çıxış edərək bildirmişdir ki,
“Kitabi Dədə-Qorqud” Azərbaycan xalq ədəbiyyatının ən
qədim və möhtəşəm abidələrindən biridir. “Kitabi
Dədə-Qorqud” Azərbaycan türkünün qədim tarixi,
adət-ənənəsi, etnik-estetik görüşləri, mifik baxışları,
bir sözlə, maddi və mənəvi dünyasını, türk xalqlarının
tarixi salnaməsini bütöv bir şəkildə əks etdirən tarixi
ədəbi bir əsərdir. Rektor onu da diqqətə çatdırmışdır
ki, Dədə Qorqud dastanları Azərbaycan dilində yazılmış
və azərbaycanlılara aid abidədir. Görkəmli dövlət xadimi
Heydər Əliyev dastanın dünya miqyasında təbliği və
Azərbaycanda adının əbədiləşdirilməsi, əks etdirdiyi
vətənpərvərlik ideyalarının genişləndirilməsi üçün
“Kitabi-Dədə Qorqud” dastanlarının 1300 illiyi haqqında
20 aprel 1997-ci ildə xüsusi fərman imzalamışdır. Ulu
öndərin layiqli davamçısı ölkə başçısı cənab İlham
Əliyevin “Kitabi-Dədə Qorqud”un alman dilində ilk
tərcüməsi və nəşrinin 200 illiyinin qeyd edilməsi
haqqında 20 fevral 2015-ci il tarixli sərəncamı da
mahiyyət etibarilə bu böyük azərbaycançılıq abidəsinin
dünya mədəniyyəti səviyyəsində dəyərləndirilməsinin
məntiqi davamıdır.
Sonra tədbir iştirakçıları tamaşaya baxmışlar.
Nuray ƏSGƏROVA |
