|
 Azərbaycan-Rusiya
Universitetlərarası Forumunda iştirak edən Ufa Dövlət
Neft Texniki Universitetinin rektoru Ramil Baxtizin,
Samara Dövlət Texniki Universitetinin rektoru Dmitri
Bıkov və layihənin rəhbəri, professor Mariya
Dülyasovanın rəhbərlik etdiyi nümayəndə heyəti Sumqayıt
Dövlət Universitetində qonaq oldular.
Nümayəndə heyəti universitetin rektoru Elxan
Hüseynovla “dəyirmi masa” ətrafında elmin, təhsilin
inkişafına dair birgə əməkdaşlığın qarşılıqlı
faydaları və perspektivləri barədə fikir mübadiləsi
apardılar. Universitetin Heydər Əliyev Mərkəzində ulu
öndərin uşaqlıq, yeniyetməlik, tələbəlik, Dövlət
Təhlükəsizlik Komitəsində işlədiyi, hakimiyyətdə olduğu
illəri əks etdirən fotolar qonaqların marağına səbəb
oldu.
Rektor qonaqlara ali məktəbin yaranma tarixi, onun
fəaliyyət istiqamətləri, həyata keçirdiyi beynəlxalq
proqram və layihələr barədə məlumat verdi.
Görüşdə Ufa Dövlət Neft Texniki Universitetinin
rektoru Ramil Baxtizin Azərbaycanda, xüsusilə də
SDU-da qonaq olduğundan məmnunluğunu bildirdi, rəhbərlik
etdiyi universitet haqqında ətraflı məlumat verdi.
SDU-nun Azərbaycanda elm və texnikanın inkişafındakı
rolunu yüksək qiymətləndirərək gələcəkdə hər iki təhsil
ocağı arasında əlaqələrin daha da genişləndirilməsinin
əhəmiyyətini qeyd etdi.
Samara Dövlət Texniki Universitetinin rektoru
Dmitri Bıkov və layihənin rəhbəri, professor Mariya
Dülyasovanın belə görüşlərin keçirilməsinin hər iki
xalq arasında dostluq, qardaşlıq münasibətlərini daha
möhkəmləndirdiyini vurğuladılar. Onlar
universitetlərimiz arasında tələbə-müəllim mübadiləsinin
əməkdaşlığımızın inkişafına töhfə verəcəyini qeyd
etdilər.
Sumqayıt Dövlət Universiteti ilə Ufa Dövlət Neft
Texniki Universiteti və Samara Dövlət Texniki
Universiteti arasında əməkdaşlıq müqaviləsi imzalandı.
SDU-nun Mətbuat xidməti |
