|
 Noyabrın 12-də Təhsil Nazirliyinin birbaşa
tabeliyindəki “Ankara məktəbi” məktəb-liseyində
Azərbaycan Akademik Milli Dram Teatrı səhnəsində
oynanılan “Əmir Teymur” tamaşasının yaradıcı heyəti ilə
görüş keçirildi. Görüşdə tamaşanın quruluşçu rejissoru,
əməkdar incəsənət xadimi Mehriban Ələkbərzadə,
aktyorlar - Azərbaycan Respublikasının xalq artisti
Nurəddin Mehdixanlı, İlahə Həsənova, Anar Heybətov,
əməkdar artist Kazım Abdullayev, eləcə də qonaqlar -
Təhsil Nazirliyi Pilot layihələrlə iş sektorunun müdiri
Rüfət Əliyev, həmin şöbənin böyük məsləhətçisi Hüseyn
Mirzəyev iştirak edirdilər. Görüşü məktəb-liseyin
direktoru Səmayə Eynullayeva açaraq qonaqları salamladı,
dəvəti qəbul edib gəldikləri üçün onlara minnətdarlığını
bildirdi.
Diqqətə çatdırıldı ki, oktyabrın 26-da dahi şair,
görkəmli dramaturq Hüseyn Cavidin anadan olmasının
133-cü ildönümü geniş qeyd olunub. Bununla bağlı Hüseyn
Cavid parkında şairin anım günü keçirilib, şeirləri,
şeirlərinə yazılmış mahnılar səsləndirilib, abidəsi
önünə əklillər qoyulub. Məktəb-liseyin yuxarı sinif
şagirdləri bu günlərdə Azərbaycan Akademik Milli Dram
Teatrında ədibin “Topal Teymur” dramı əsasında
hazırlanmış “Əmir Teymur” tamaşasına baxıb, aktyorların
məharətli oyunundan böyük zövq alıblar. Tamaşadan sonra
yaradıcı heyət tədris ocağına dəvət olunub.
Sonra şagirdlər məktəb-liseyin Azərbaycan dili və
ədəbiyyat müəllimi, bu fənlər üzrə metodbirləşmənin
sədri Aida Arabskayanın rəhbərliyi altında
hazırladıqları ədəbi-bədii kompozisiyanı təqdim etdilər.
Öncə Yasin Quliyevin şairin həyat və yaradıcılığı
mövzusunda hazırladığı təqdimat diqqətə çatdırıldı.
Sonra şagirdlərdən Fidan Mədətova, Fərid Əliyev, Gülşən
Cavadova, Sədaqət Qasımova və b. Hüseyn Cavidin “Qız
məktəbində”, “Mənim tanrım”, “Qadın” adlı şeirlərini,
“Kor ərəbin nahnısı”nı, “İblis” faciəsindən Arifin
monoloqunu ifa etdilər, “Ana” dramından kiçik bir səhnə
göstərdilər. Səhnəni təqdim edən məktəb-liseyin 8 “b”
sinif şagirdləri Şəms Məmmədzadə (Səlma ana), Həsən
Həsənli (Murad) və Nəzrin Qocayevanın (İsmət) məharəti
görüş iştirakçıları tərəfindən alqışlarla
qiymətləndirildi.
Daha sonra şagirdlər tərəfindən rejissor və
aktyorlara onların tamaşadakı rolları, yaradıcılıq
qayələri, sənət müəllimləri və s. məsələlərlə bağlı
ünvanlanan çoxsaylı suallar cavablandırıldı. Sənət
adamları şagirdlərə öz tövsiyələrini verdilər.
Sonda “Ankara məktəbi” məktəb-liseyinin direktoru
Səmayə Eynullayeva maraqlı keçən görüş üçün qonaqlara,
tədbiri hazırlayan və təqdim edən müəllim və şagirdlərə
təşəkkür etdi.
Yusif ƏLİYEV,
“Azərbaycan müəllimi” |
