|
Konfransda Şuranın dəstəyi ilə hazırlanmış “Yaradıcılıq
axtarışları” kitabının təqdimatı olub.
Noyabrn 7-də Azərbaycan Təhsil Şurası Qafqaz
Universitetində “Müasir təhsil təcrübəsi və onun təlimin
səmərəliliyinə təsiri (Qafqaz Universitetinin
bazasında)” mövzusunda konfrans keçirib. Konfransda
Azərbaycan Təhsil Şurasının sədri, pedaqoji elmlər
doktoru, professor Əjdər Ağayev, Qafqaz Universitetinin
pedaqogika fakültəsinin dekanı, professor Erdal Karaman,
Şuranın idarə heyətinin üzvləri və fəalları-qabaqcıl
məktəb direktorları və müəllimlər iştirak ediblər.
Konfransı professor Əjdər Ağayev açaraq bildirib ki,
Qafqaz Universiteti Azərbaycanın ali təhsil müəssisələri
arasında öz dəst-xətti ilə seçilir. Bu dəst-xətt özündə
müasirliyi, dünya təhsil məkanına inteqrasiyanı,
mükəmməl maddi-texniki bazanı, keyfiyyətli təhsili,
səmimi müəllim-tələbə münasibətlərinin mövcud olduğu
yaradıcı təhsil mühitini, milli-mənəvi dəyərləri,
halallığı ehtiva edir.
Qafqaz Universitetinin fəaliyyətini əks etdirən
videoçarxın nümayişi deyilənləri əyani şəkildə təsdiq
etməklə bu ali təhsil ocağı haqqında konfrans
iştirakçılarında dolğun təəssürat yaradıb.
Universitetin pedaqogika fakültəsinin dekanı, professor
Erdal Karaman çıxışında rəhbərlik etdiyi fakültənin
fəaliyyət prinsiplərindən bəhs edib. Söyləyib ki, bu gün
Qafqaz Universitetində yaradılmış təlim-tərbiyə mühiti,
universitetin məzunlarının 80 faizindən çoxunun işlə
təmin olunması istedadlı azərbaycanlı gənclərin ali
təhsil almaq üçün buranı seçməsinə stimul yaradır.
Qafqaz Universiteti gənclərin xaricdə magistr təhsili
almaq arzularının da reallaşmasına imkan yaradır.
Konfransda jurnalist, yazıçı - publisist, “Təhsil və
zaman” qəzetinin redaktoru Böyükağa Mikayıllının yenicə
çapdan çıxmış "Yaradıcılıq axtarışları" kitabının
təqdimatı olub. Kitabı təqdim edən professor Əjdər
Ağayev bildirib ki, fəal direktor və müəllimlərin
fəaliyyətindən, qabaqcıl təcrübəsindən bəhs
olunan“Yaradıcılıq axtarışları” müəllifin ikiillik
gərgin zəhməti hesabına başa gəlib. Böyükağa Mikayıllı
kitabda yer alan müəllimlərin hər birinin dərslərini,
ictimai fəaliyyətini mütəmadi olaraq izləmiş, əgər belə
demək mümkünsə, zəngin təcrübəni damla-damla toplamış və
nəhayət, tədqiqatlarını bir kitab halında
ümumiləşdirmişdir. Bu kitab həm müəllifin, həm də onun
qəhrəmanları olan qabaqcıl müəllimlərin yaradıcılıq
axtarışlarını özündə ehtiva edir.
Lənkəran Rayon Təhsil Şöbəsinin müdir müavini Güloğlan
Bağırov, Bakı şəhər 230 nömrəli tam orta məktəbin
direktoru Elşən Qafarov, Xarici Dillər Təmayüllü
Gimnaziyanın müəllimi Şəcahan Ramazanova, Şirvan şəhər 9
nömrəli tam orta məktəbin müəllimi Sevinc Niftiyeva,
Bakı şəhər 95 nömrəli tam orta məktəbin müəllimi Zümrüd
Hüseynova, əməkdar müəllim Həqiqə Məmmədova, İsmayıllı
şəhər 6 nömrəli tam orta məktəbin müəllimi Əsgər Manafov,
Bakı şəhər 164 nömrəli tam orta məktəbin müəllimləri
Sevinc Məcidova və Turan Hüseynova kitabı müəllimlər
üçün dəyərli vəsait kimi səciyyələndiriblər.
Konfransın sonunda 6-7 mart 2015-ci il tarixində
Azərbaycan Təhsil Şurasının ABŞ-ın Qarabağ Fondu və Bakı
Pedaqoji Kadrların İxtisasartırma və Yenidənhazırlanma
İnstitutu ilə birgə keçirdiyi beynəlxalq konfransın
sertifikatları həmin konfransın iştirakçılarına təqdim
olunub.
Yusif ƏLİYEV,
“Azərbaycan müəllimi” |
