|
Hər bir pedaqoq tədris prosesini planlaşdırarkən
şagirdlərin təhsili, tərbiyəsi, bir şəxsiyyət kimi
formalaşması üçün bütün vəzifələrin kompleks həllinə
çalışmalıdır.
Bu baxmdan şagirdlərdə təlimə marağın artırılması hər
bir müəllim üçün prioritet məsələdir. Hər bir iş ona
maraq yaranana qədər çətindir. Əgər işə hər bir kəsdə -
istər müəllim olsun, istərsə də şagird, maraq yaranarsa,
o çox asanlıqla və yüksək səviyyədə icra ediləcək.
Maraqlı iş həm də hər bir insanda xoş ovqat yaradar.
Məktəblərdə təhsilə marağın artırılması sahəsində
“Öyrənməyi öyrən” adlı aylıq tədbirlər kompleksinin
keçirilməsi faydalıdır. Aylıq zamanı şagirdlər arasında
müxtəlif mövzularda bilik yarışmaları, “dəyirmi masa”lar
və s. təşkil etmək mümkündür.
Müəyyən sistemlə aparılan iş öz müsbət nəticəsini
verir. Şagirdlərdə təhsilə, təlimə maraq hissi artır,
onlar öz məsuliyyətlərini dərk edir, həvəslə oxuyurlar.
Bunu mən öz təcrübəmdə dəfələrlə sınamışam. Bu yazıda
məhz həmin istiqamətdə keçirdiyim tədbirlərin birindən
- “Tərəqqi” intellektual yarışından söz açmaq istəyirəm
Mən 2014-cü ilin oktyabr ayından başlayaraq
“Tərəqqi” liseyinin fəal şagirdlərinin təşəbbüsü ilə
onların çoxdan arzuladıqları layihəni həyata keçirməyə
başladım. Layihənin məqsədi şagirdlərin intellektual
qabiliyyətini, bilik və bacarıqlarını üzə çıxarmaq üçün
onların arasında bilik yarışları təşkil etməkdir.
Biz “Tərəqqi” intellektual oyunlarını aşağıdakı
qaydada keçiririk: suallar üç bölmə üzrə bölüşdürülür.
1)“Günün mövzusu”, 2)“Humanitar” və 3)“Təbiət”. Oyunun
özünəməxsus cəhəti ondadır ki, I bölmənin sualları hər
həftənin əlamətdar hadisələrinə həsr olunur. Bunun üçün
oyun iştirakçıları daim öz üzərlərində çalışmalı və
ölkəmizdə, həm də dünyada baş vermiş ictimai-siyasi
hadisələri nəzərdən qaçırmamalıdırlar. Bu yarış
şagirdlər arasında sağlam rəqabət yaradır, əməkdaşlıq
etmək, qalib olmaq istəyini artırır.
“Tərəqqi” intellektual oyunlarının hazırlanmasında
İKT-dən geniş istifadə edirik. Təhsildə İKT-nin bir
faydalı cəhəti də var ki, istedadlı şagirdlər kompüter
vasitəsilə öz tədris işlərini və yaradıcılıq
fəaliyyətlərinin nəticələrini fərdiləşdirə bilirlər.
Müasir pedaqoq da standart dərsliklərdə olmayan, özü
tərəfindən düşünülmüş maraqlı məsələ və tapşırıqları
kompüterdə təqdimat şəklində hazırlaya bilir.
Sevda YARMETOVA,
Bakı şəhəri, İ.Hacıyev adına “Tərəqqi” liseyinin tarix
müəllimi |
