|
 Naxçıvan Dövlət Universitetində Azərbaycan
Respublikasının Konstitusiyasının qəbul edilməsinin 20
illiyinə həsr olunmuş “Heydər Əliyev və müstəqil
Azərbaycan Respublikasının Konstitusiyası” movzusunda
elmi konfrans keçirilib. Yeni Azərbaycan Partiyası
Universitet şəhərciyi ərazi ilk təşkilatının
reallaşdırdığı konfransı universitetin rektoru, AMEA-nın
müxbir üzvü Saleh Məhərrəmov açaraq bildirib ki,
ümummilli lider Heydər Əliyevin müəllifi olduğu,
müstəqil Azərbaycanın dövlət quruculuğunun əsasını
təşkil edən Azərbaycan Respublikasının Konstitusiyası
demokratik, hüquqi, dünyəvi dövlət quruluşuna təminat
verən ali hüquqi sənəddir. Hər bir Azərbaycan vətəndaşı
əsas dövlət atributlarından biri olan Konstitusiyanın
müddəa və prinsiplərinə əməl etməyə borcludur.
Yeni Azərbaycan Partiyası Naxçıvan Şəhər
Təşkilatının sədri, Ali Məclisin deputatı, universitetin
hüquq kafedrasının dosenti Elman Cəfərli “Naxçıvan
Muxtar Respublikasının konstitusiya təcrübəsi tarixi”
mövzusunda məruzə edərək 1926-cı ildə qəbul edilən ilk,
1937 və 1978-ci ildə qəbul edilən sonrakı
konstitusiyaları müqayisəli şəkildə təhlil edib. Qeyd
olunub ki, milli müstəqillik əldə edildikdən sonra
1998-ci il aprelin 28-də Naxçıvan Muxtar Respublikasının
Azərbaycan Konstitusiyası əsasında hazırlanmış yeni
Konstitusiyası muxtar respublikanın Ali Məclisində qəbul
edilib və həmin il dekabrın 29-da Azərbaycan
Respublikasının Milli Məclisi tərəfindən təsdiq olunub.
Azərbaycan Respublikası Konstitusiyası ilə üzvi surətdə
bağlı olan bu Konstitusiya Azərbaycan dövlətinin
müstəqilliyini, suverenliyini, qanunun aliliyini
qorumaqla Naxçıvan Muxtar Respublikasının ərazi
bütövlüyünü, idarəetmə mexanizmini, əhalinin hüquqi
statuslarını müəyyənləşdirir. Naxçıvanın muxtariyyat
statusunun da əks olunduğu, 6 fəsildən və 50 maddədən
ibarət Konstitusiya muxtar respublikanın əvvəlki
konstitusiyalarından demokratikliyi və lakonikliyi ilə
fərqlənir. Bu, 1997-ci ildə Venesiya Komissiyasının
Naxçıvan Muxtar Respublikasının Konstitusiya layihəsinə
verdiyi rəydə də öz əksini tapıb.
Universitetin sosial idarəetmə və hüquq
fakültəsinin tyutoru, YAP fakültə sədri Beyrək Cəfərov
“Konstitusiyanın beynəlxalq əhəmiyyəti” mövzulu
məruzəsində vurğulayıb ki, Azərbaycan Respublikasının
Konstitusiyası 1994-cü ildə müstəqil Azərbaycanın
qurucusu və memarı, ümummilli lider Heydər Əliyevin
rəhbərliyi ilə hazırlanmış, 1995-ci il noyabrın 12-də
ümumxalq referendumu yolu ilə qəbul edilmişdir. Ən son
nailiyyətlərə, dünyəvi təcrübəyə əsasən hazırlanan bu
Konstitusiya müasir dünya konstitusiyaları içərisində
quruluşca ən mükəmməl və məzmunca ən demokratiki olmaqla
Azərbaycanın dövlət müstəqilliyinin, ölkədəki insan
hüquq və azadlıqlarının qarantıdır.
Mehriban SULTAN |
