|
 Noyabrın
11-də Azərbaycan Dövlət İqtisad Universitetində (UNEC)
“Ümumdünya Elm Günü”nə və Azərbaycan Milli Elmlər
Akademiyasının (AMEA) 70 illiyinə həsr olunan “Elm
günləri”nə start verilib.
Universitetin rektoru, professor Ədalət Muradov bildirib
ki, “Elm günləri” UNEC-də elmi tədqiqatların
stimullaşdırılması məqsədi ilə atılan addımlardan
biridir. Tədbirin həmçinin AMEA-nın 70 illik yubileyinə
həsr edildiyini vurğulayan rektor əlavə edib ki, bu
münasibətlə UNEC-in gənc tədqiqatçı, magistrant və
tələbələri arasında elmi məqalə müsabiqəsi elan edilib.
Tədbirin sonuncu günü müsabiqəyə yekun vurulacağını qeyd
edən rektor, qaliblərin mükafatlandırılacaqlarını
bildirib.
Ə.Muradov ötən dövr ərzində UNEC-də elmi tədqiqat
infrastrukturunun yaradılması istiqamətində atılan
addımlardan danışıb.
UNEC-də elmi fəaliyyətin stimullaşdırılması yönündə
atılan addımlardan söz açan rektor, ölkənin ali təhsil
müəssisələri arasında ilk dəfə diferensial əməkhaqqı
sisteminə keçiddən danışıb.
AMEA-nın vitse-prezidenti, əməkdar elm xadimi, akademik
İsa Həbibbəyli ulu öndər Heydər Əliyevin Azərbaycan
elminin inkişafındakı rolundan danışıb. Bildirib ki,
Heydər Əliyev hələ Azərbaycana ilk rəhbərliyi dövründə
xalqın ümumi intellektual səviyyəsini yüksəltmək üçün
böyük işlər görüb. “Əminliklə deyə bilərəm ki,
Azərbaycan elminin qızıl dövrü ulu öndərin rəhbərlik
etdiyi dövrə təsadüf edib” deyən akademik, bu gün
Azərbaycan Prezidenti İlham Əliyevin həmin siyasəti
uğurla həyata keçirdiyini vurğulayıb. Dövlət başçısının
AMEA-nın 70 illik yubileyindəki çıxışı ölkənin bütün elm
adamlarına göstərilən yüksək dövlət qayğısının nümunəsi
idi.
AMEA-nın tarixinə qısa nəzər salan İ.Həbibbəyli
akademiyanın inkişafında rolu olan alimlərdən danışıb.
Qeyd edib ki, elm tarix boyu cəmiyyətin inkişafında
böyük rol oynayıb. Hansı ölkədə elm yüksək səviyyədə
inkişaf edibsə, orada dövlətçilik də, cəmiyət həyatının
digər sahələri də həmişə öndə olub. Elmin öyrənilməsində
müəllimlərin rolu əvəzsizdir - deyən akademik, UNEC-də
güclü professor-müəllim heyətinin olduğuna diqqət çəkib.
Akademik, UNEC-də gənc nəslin təlim və tərbiyəsi üçün
yüksək səviyyədə mühit qurulduğunu bildirib.
Sonra UNEC-in İqtisadi Araşdırmalar Elmi-Tədqiqat
İnstitutunun direktor müavini, professor Rövşən Quliyev
“Elmin iqtisadi inkişafda rolu” mövzusunda məruzə edib.
“Elm günləri” müasir cəmiyyətdə iqtisad elminin
əhəmiyyəti barədə plenar iclaslarla davam etdiriləcək.
İxtisas kafedralarında tematik “dəyirmi masa”lar,
həmçinin tanınmış alimlərlə görüşlər və elmi mühazirələr
də təşkil ediləcək. |
