|
 Noyabrın
6-da Təhsil Problemləri İnstitutunda (ARTPİ) “İnnovativ
təlim metodologiyasının və müvafiq resursların
hazırlanması” mövzusunda seminar-treninqin yekunu və
sertifikatların təqdim edilməsi ilə bağlı tədbir
keçirildi.
Tədbiri giriş sözü ilə açan institutun direktoru, hüquq
üzrə fəlsəfə doktoru Qulu Novruzov bildirdi ki,
“Azərbaycan Respublikasında təhsilin inkişafı üzrə
Dövlət Strategiyası”na uyğun “Fəaliyyət Planı”nın icrası
üzrə Təhsil Nazirliyinin “Tədbirlər Plan”ında öz əksini
tapmış onlarla tədbirin əsas icraçısı ARTPİ-dir. Bu
tədbirlərdən biri də təhsilin bütün pillələri üzrə milli
mənəvi və ümumbəşəri dəyərləri qoruyan və inkişaf
etdirən, geniş dünyagörüşünə malik olan, təşəbbüsləri və
yenilikləri qiymətləndirməyi bacaran, nəzəri və praktik
biliklərə yiyələnən, müasir təfəkkürlü və rəqabət
qabiliyyətli kadrlar hazırlamaqdır.
Q.Novruzov diqqətə çatdırdı ki, seminar-treninqin
gerçəkləşdirilməsi üçün, peşəkar təlimçi heyəti
yaradılmışdır. “İnnovativ təlim metodologiyasının və
müvafiq resursların hazırlanması” mövzusunda
seminar-treninqin proqramı bütün təhsil pillələri üzrə
seçilmiş pedaqoji kadrlar üçün innovativ təlim
metodologiyasının, təlimin məzmununun və müvafiq
resursların yaradılması sahəsində bilik və bacarıqların
formalaşdırılmasını təmin edəcək 60 saatlıq
seminar-treninqin ümumi məzmununu özündə əks etdirir. Bu
proqrama əsasən, hər bir təhsil pilləsi üzrə müvafiq
məzmun nəzərdə tutulur.
Seminar-treninqin birinci ongünlük kursu 26 oktyabr - 6
noyabr tarixlərində keçirilmişdir. Noyabr və dekabr
aylarında isə peşə, orta ixtisas və ali təhsil
müəssisələrinin pedaqoji kadrları üçün
seminar-treninqlər planlaşdırılır. Birinci ongünlükdə
məktəbəqədər və ümumtəhsil pilləsinin pedaqoji kadrları
üçün təşkil olunan seminar-treninqin məzmununa təhsil
sistemində innovativ proseslərin idarə olunması
metodologiyası, pedaqoji innovasiyalar, innovasiyaların
tətbiqi zamanı yaranan pedaqoji və psixoloji
problemlərin aradan qaldırılması üçün yeni metodik
vəsaitlərin hazırlanması, müasir təlim
texnologiyalarından istifadənin metod və vasitələri,
innovativ metodiki resursların, elektron dərsliklərin
yaradılması və vəsaitlərin hazırlanmasına verilən
tələblər, müəllimlər, valideynlər, şagirdlər üçün
informativ və maarifləndirici vəsaitlərin hazırlanması
və s. daxil edilmiş və sonda yüksək təlim nəticələrinin
əldə olunmasına zəmin yaratmışdır.
Tədbirdə seminar-treninqin təşkil edilməsi məqsədilə
respublikamızda ilk dəfə olaraq yalnız institutun
nüfuzlu alim, professor heyətindən ibarət geniş tərkibdə
təlimçi heyəti yaradılması və treninqlərin bü günə qədər
təşkil olunan təlimlərdən məzmun müxtəlifliyinə görə
tamamilə fərqlənməsi məktəbəqədər və ümumi təhsil
müəssisələrinin pedaqoji heyətinin treninqdə birgə
iştirakı diqqətçəkən məqamlar kimi qeyd olunmuşdur.
Tədbirdə Təhsil Nazirliyinin Pilot layihələrlə iş
sektorunun müdiri Rüfət Əliyev, Məktəbəqədər təhsil
sektorunun müdiri Nərminə Alnağıyeva iştirak edirdilər.
Xətai rayonu 240 nömrəli uşaq bağçasının müdiri Sədaqət
Rəhimova, Yasamal rayonu 11 nömrəli uşaq bağçasının
müdiri Azadə Əhmədova, Bakı şəhəri Suraxanı rayonu 279
nömrəli tam orta məktəbin direktoru Oqtay Səmədov, Gəncə
şəhəri 21 nömrəli tam orta məktəbin müəllimi Xumar
Qurbanova, Şamaxı rayonu Laləzar kənd ümumi orta
məktəbinin müəllimi Xamid Kərimov, seminar-treninqin
təlimçi heyəti və b. çıxış edərək, seminarın
səmərəliliyini qeyd etdilər və bunun üçün Təhsil
Nazirliyinə, Təhsil Problemləri İnstitutuna
təşəkkürlərini bildirdilər.
Tədbirin yekununda müdavimlərə sertifikatlar verildi.
Mətbuat xidməti
foto R.ZİYADOVUNDUR |
