|
Milli Olimpiya Komitəsinin və Azərbaycan Atletika
Federasiyasının dəstəyi ilə “LEAP-2017” (Leadership and
Excellence in Athletics Program - atletikada liderlik və
təkmilləşdirmə proqramı) layihəsi çərçivəsində Bakı
şəhərində yerləşən 189-190 nömrəli tam orta məktəbdə,
“Ankara məktəbi” məktəb-liseyində və Respublika Olimpiya
Mərkəzində şagirdlər üçün seminarlar təşkil olunub.
İdman vasitəsilə gənc liderlərin yetişdirilməsi
məqsədini daşıyan layihədə seminarlar peşəkar məşqçilər
tərəfindən aparılır. Bu layihə Londonda keçiriləcək
yüngül atletika üzrə dünya çempionatının sosial idman
irsi kimi təsdiqlənən “LEAP-2017”, “UK Sport” və
Britaniya Atletika Assosiasiyasının birgə proqramıdır.
Təlimin əsas məqsədi səkkizinci-onuncu sinif şagirdləri
arasında bədən tərbiyəsi və atletika idman növünə olan
marağın artırılmasından ibarətdir.
Tədbir təlimçilər tərəfindən aparılan atletika idman
növü haqqında seminarlar və praktiki hissə olan idman
oyunlarından ibarət olub.
“LEAP-2017” şagirdlərin davamlı idmanla məşğul olmasını
təşviq etmək və onların liderlik xüsusiyyətlərinin
artırılmasına yönəlib.
Rəşad RAMAZANOĞLU,
“Azərbaycan müəllimi” |
