|
Oruc MUSTAFAYEV,
“Azərbaycan müəllimi”
Böyük Britaniyanın Quacquarelli Symonds şirkəti
oktyabrın 22-də Şərqi Avropa və Orta Asiyanın inkişaf
etməkdə olan ölkələrinin ən yaxşı ali məktəblərinin
reytinq cədvəlini (Emerging Europe & Central Asia 2015)
hazırlayıb. Tərtibçilər adıçəkilən regionlardan 500
universitetin fəaliyyətini təhlil ediblər. Nəticədə
sıralamada 20 ölkədən 150 ən yaxşı ali məktəb yer ala
bilib. Sevindirici haldır ki, reytinq cədvəlinin ilk
100-lüyündə Azərbaycandan 3 universitet - Xəzər,
Qafqaz və Bakı Dövlət universitetləri yer alıb.
Azərbaycan Dillər Universitetini isə ilk 100-lükdən cəmi
bir xana ayırır - ADU sıralamada 101-ci yerdədir. 100
ən yaxşı universitet siyahısına Rusiyadan 25, Türkiyədən
16, Qazaxıstandan 14, Polşadan 12, Çexiya
Respublikasından 10, Ukraynadan 9 ali məktəb daxil olub.
Reytinq tərtib olunarkən ali məktəblərin elmi,
işəgötürənlər arasında nüfuzu, professor-müəllim
heyətinin tələbələrin ümumi sayına nisbəti, akademik
birliyin rəyi, professor heyətinin beynəlmiləl tərkibi,
universitetdə təhsil alan xarici tələbələrin sayı,
müəllimlərin elmi məqalələrinin sayı, elmi
məqalələrdən sitatgətirilmə kimi göstəricilər nəzərə
alınıb. Reytinq cədvəli ilə daha ətraflı
www.topuniversities.com/university-rankings/eeca-rankings/2015
səhifəsindən tanış olmaq olar.
|
