|
Azərbaycan Respublikasının Prezidenti yanında Dövlət
İdarəçilik Akademiyasının tələbəsi Lalə Novruzova ilə
söhbət
Sifai SƏFƏROVA,
“Azərbaycan müəllimi”
s.seferova@muallim.edu.az
 Onunla
Azərbaycan Respublikasının Prezidenti yanında Dövlət
İdarəçilik Akademiyasının 1 nömrəli qızlar
yataqxanasında görüşdüm. Gəlişimin məqsədini biləndə çox
sevindi. Məni də axtarıb tapdığınıza görə təşəkkür
edirəm, - dedi. Sonra özü haqda qısaca da olsa
məlumat verdi. 1998- ci ildə Saatlı rayonunda
anadan olub. Məcburi köçkün ailəsində dünyaya gələn
Lalə Novruzova Biləsuvar rayonunda onlar üçün salınan
9 nömrəli qəsəbədə yaşayıb və həmin qəsəbədəki 15
nömrəli tam orta məktəbi əla qiymətlərlə bitirib.
Dəfələrlə Respublika fənn olimpiadalarında Azərbaycan
dili və ədəbiyyat fənlərindən II yerlin qalibi olub.
Tələbə Qəbulu üzrə Dövlət Komissiyasının III ixtisas
qrupu üzrə keçirdiyi qəbul imtahanlarında 700 bal
toplayaraq Azərbaycan Respublikasının Prezidenti
yanında Dövlət İdarəçilik Akademiyasının siyasi
idarəetmə fakültəsinin hüquqşünaslıq ixtisasına daxil
olub. Lalə ilə söhbət edərkən onun çoxlu bədii ədəbiyyat
oxuduğu hiss olunurdu. Sualları cavablandıran zaman söz
axtarışına çıxmırdı. Bir az da dilli-dilavər idi...
- Lalə, yuxarı siniflərə keçdikcə, yəni yaş artdıqca
şagirdin maraq və dünyagörüşü də dəyişir. Bu məqamlar
səndə necə, yaşanıbmı?
- Şübhəsiz. Uşaqlıq illərinin arzuları ilə sonrakı
illərin arzuları bir-birindən çox fərqlənir. Mən yuxarı
siniflərdə oxuyanda artıq özümü bir vətəndaş olaraq hiss
edirdim və gələcəkdə layiqli vətəndaş olmağın vacibliyi
barədə düşünürdüm. Elə bu arzu da məni seçdiyim
hüquqşünas ixtisasına doğru yönəltdi. Məzunu olduğum
məktəbi yüksək göstəricilərlə başa vurub ali məktəb
tələbəsi adını daşımaq üçün çox çalışmalı oldum.
Çalışqan olmasaydım, bu balı heç vaxt qazana bilməzdim.
- Yayın istisində, qışın soyuğunda repetitor yanına
getmək çətin deyildi ki?
- Əlbəttə, çox çətin idi. Yolum uzaq olduğundan çox
əziyyət çəkirdim. Xeyli piyada yol gedirdim. İki il
repetitorların köməyindən istifadə etmişəm. 10-cu
sinifdən riyaziyyat və ingilis dili fənlərindən, 11-ci
sinifdə isə 5 fəndən kompleks şəkildə hazırlaşmışam.
Zəhmətim hədər getmədi. Seçimimdə də yanılmadım,
arzuladığım ixtisasa qəbul oldum.
- Telefondan, sosial şəbəkələrdən istifadə etmisənmi?
- Müəllim yanına gedəndə telefonum olub. Sosial
şəbəkələrdə heç vaxt olmamışam, televizora nadir
hallarda baxmışam, internetdən isə yalnız dərs üçün
lazım olan məlumatlar əldə etmək məqsədilə istifadə
etmişəm.
- Tələbə Qəbulu üzrə Dövlət Komissiyasının keçirdiyi
sınaq imtahanlarında 700 bal toplaya bilirdinmi?
- Mən orta məktəbdə daim yaxşı oxumuşam və yüksək
nəticələrimlə fərqlənmişəm. Ancaq qatıldığım sınaq
imtahanlarında mexaniki səhvlər etdiyim üçün heç vaxt
700 bal toplaya bilmirdim. Buna görə də nəticəm aşağı
olurdu. Amma müəllimlərim mənim savadıma güvənirdilər
və deyirdilər ki, heç bir mexaniki səhv etməsəm 700 bal
toplaya bilərəm. Mən də onları aradan qaldırdım. Ən
əsası odur ki, özümə güvənci artırdım, imtahan
həyəcanını özümdən qovdum.
- Maddi vəziyyətiniz təhsil almaq üçün çətinlik
yaratmırdı ki?
- Xeyr! Valideynlərim mənə çoxlu kitablar və testlər
alırdılar. Məncə maddi vəziyyətin yaxşı və ya pis
olmasının oxumaqla heç bir əlaqəsi yoxdur. Mən belə
düşünürəm.
- Qaçqınlıq həyatı dərslərinə mane olmurdu ki?
- Biz əslən Cəbrayıl rayonunun Çullu kəndindənik.
Əvvəlcə Saatlı rayonunda məskunlaşmışdıq, sonra isə
Biləsuvar rayonunda məcburi köçkünlər üçün salınmış 9
nömrəli qəsəbədə məskunlaşdıq. Orada fəaliyyət
göstərən Cəbrayıl rayonunun 15 nömrəli tam orta
məktəbində oxudum. Çətinliklərə baxmayaraq dərslərimə
hər gün sistemli şəkildə vaxt ayırırdım. Düşünürsən ki,
insan bütün çətinliklərə dözməyi bacarmalıdır.
- İmtahanda maksimum nəticə göstərəcəyinə tam
əmindinmi?
- Açığını deyim ki, nə qədər hazırlıqlı olsam da
həyəcan keçirirdim. Çünki məhz həmin gün mənim, necə
deyərlər, gələcək taleyim həll olunacaqdı. Yanlız
rəsmi cavablar açıqlanandan sonra 700 bal topladığıma
əmin oldum. Heç bilirsiniz necə sevinirdim?! Elə
bilirdim ki, bütün dünya 700 bal topladığımdan
xəbərdardır. Bax, arzularım belə reallaşdı.
Azərbaycan Respublikasının Prezidenti yanında Dövlət
İdarəçilik Akademiyasının hüquqşünaslıq ixtisasına daxil
oldum.
- Asudə vaxtlarında hansı işlə məşğul olursan?
- Cəbrayıl rayonundakı Böyük Mərcanlı kənd musiqi
məktəbinin fortepiano şöbəsini bitirmişəm. Yorulduğum
zaman pianino arxasına keçib bacardığım mahnıları ifa
edirəm. Klassik musiqini dinləməyi çox xoşlayıram.
Sanki onda rahatlıq tapıram. İdmanla da məşğul oluram.
Voleybol, tennis oynamağı çox sevirəm.
- Yüksək nəticə göstərən abituriyentlərlə görüşlər
keçirilən zaman hansı xoş anları yaşayırdın?
- Fəxarət və qürur hissi keçirirdim. Oxuduğum məktəbin,
müəllimlərimin, ən başlıcası mənə mənəvi dəstək olan,
imtahan ərəfəsində çox böyük narahatçılıq hissləri
yaşayan valideynlərimin etimadını doğrultduğuma çox
sevinirdim. Həm də mən Cəbrayıl rayonunun tarixində
ilk dəfə olaraq maksimum nəticə göstərərək 700 bal
toplamışdım. İllərlə çəkdiyim zəhməti ölkə başçısı
İlham Əliyev Prezident təqaüdü ilə mükafatlandırdı. Bu,
mənim üçün yalnız qazanılan uğurumun deyil, həm də
nailiyyətlərimin davamlı olmasına stimul verdi. Bundan
sonra da tələbəlik illərində fəal olmağa, uğurlarımı
davam etdirməyə və Prezident təqaüdçüsü adını
doğrultmağa çalışacağam.
- Ev işlərində anana kömək edirdinmi?
- Anam məni bütün ev işlərindən azad etmişdi. Mənim
diqqətimi yalnız dərslərimə yönəltmişdi. Ancaq buna
baxmayaraq az da olsa kömək edirdim. Çünki ev işləri
görəndə mənim beynim dincəlirdi. Nə qədər oxumaq
olardı?!
- Təbriklər çox oldumu?
- Cəbrayıl Rayon Təhsil Şöbəsinin müdiri Validə
Həsənova, məktəbimizin direktoru Şamo Şamoyev eşidəndə
ki, 700 bal toplamışam, çox sevindilər. Sinif rəhbərim -
kimya-biologiya müəllimim Töhfə Quliyeva məni təbrik
etdi və bağrına basıb öpdü.
- İki aya yaxındır ki, artıq tələbəsən, çətin deyil ki,
tələbə həyatı yaşamaq?
- Dərslərimiz o qədər maraqlı keçir ki, günlərin nə
vaxt ötdüyünü hiss etmirəm. M.F.Axundov adına Milli
Kitabxananın üzvüyəm. Keçirilən dərsləri yüksək
səviyyədə mənimsəməyə çalışıram. 700 ballıq uğurumu
davam etdirirəm. Ən çox akademiyanın kitabxanasından
istifadə edirəm. Çalışıram ki, müəllimlərimin rəğbətini
qazanan istedadlı tələbə kimi yadda qalım.
Akademiyanın “Hüquq”, “Debat” klublarında iştirak
edirəm. Tələbə Gənclər Təşkilatının üzvüyəm.
- Seminarlarda fəallıq göstərə bilirsənmi?
- Mühazirələrə qulaq asdıqca dərsləri daha yaxşı
mənimsəyirəm. Seminarlarda isə fəal iştirak edirəm.
Müəllimlərim biliyimi ən yüksək sayılan 10 balla
qiymətləndirirlər. Ümumiyyətlə, dərslərimiz çox
maraqlı keçir. Elə gün olur ki, sual-cavab edirik,
zəngin vurulduğunu eşitmirik.
- Qış semestrində əlaçı olacağına əminsənmi?
- Əlbəttə, əminəm. Tək bu semestri deyil,
akademiyanı əla qiymətlərlə bitirməyə, barmaqla
göstərilən hüquqşünas olmağa çalışacağam.
- Gələcək abituriyentlərə tövsiyən.
- Demək istəyirəm ki, 700 bal toplamaq mümkünsüz
deyildir. İnsan çox səylə çalışdığı zaman arzusuna,
qarşısına qoyduğu hədəfə nail olur. Heç nədən
qorxmasınlar, mükəmməl çalışsınlar ki, arzularına
çatsınlar.
- İlk Prezident təqaüdünə nə alacaqsan?
- Bacımla birlikdə xərcləməyi düşünürəm və ailə
üzvlərimə hədiyyələr alacağam. Bacım 8-ci sinifdə oxuyur.
O da dərs əlaçısıdır. Mənim 700 bal toplamağım onu da
çox həvəsləndirib, məsuliyyəti birə-beş artıb.
- Gələcək planların.
- Dövlət Proqramı çərçivəsində xaricdə magistr təhsilimi
davam etdirmək istərdim. Azərbaycan dövlətinə savadlı,
zəkalı, ixtisasını gözəl bilən mütəxəssis lazımdır və
mən onlardan biri olmağa çalışacağam.
Lalə Novruzova ilə söhbətdən doymaq olmurdu. Onunla
dialoqa girmək həm rahat idi, həm də maraqlı. Verdiyim
suallara cavabları isə tam əminlik yaradırdı ki, bu
gün mən gələcəyin ən gözəl bir hüquqşünası ilə
həmsöhbət oldum. |
