|
 Bakıdakı
295 nömrəli orta məktəbdə “Beynəlxalq qızlar günü”
münasibətilə geniş tədbir keçirildi. Görkəmli
dramaturqumuz Hüseyin Cavidin aşağıdakı misraları
tədbirin ana xəttini təşkil edirdi:
- Qadın gülərsə şu issız mühitimiz güləcək,
Sürüklənən bəşəriyyət qadınla yüksələcək.
Tədbirdə müxtəlif dövlət qurumlarının nümayəndələri,
valideynlər, məktəbin 8-11-ci siniflərində oxuyan qızlar
iştirak edirdilər. Tədbiri məktəbin direktoru Dilarə
Cəbrayılova açaraq Azərbaycan Prezidenti İlham Əliyevin
son illər təhsil sahəsinə göstərdiyi diqqət və qayğıdan,
təhsilin keyfiyyətinin yüksəldilməsi yönündə aparılan
islahatlardan danışdı. Məktəbin əldə etdiyi uğurlara
toxunan direktor bildirdi ki, ötən dərs ilində təhsil
ocağını bitirən məzunlardan 77 faizi müxtəlif ali
məktəblərə qəbul olunub. O qeyd etdi ki, “Şagirdlərdə
ifadəli oxu və nitq mədəniyyətinin formalaşması”
mövzusunda məktəbdə “dəyirmi masa”lar təşkil edilir,
“Narkomaniyaya yox deyək” adlı tədbirlər keçirilir.
Ailə, Qadın və Uşaq Problemləri üzrə Dövlət Komitəsinin
sədr müavini Sədaqət Qəhrəmanova bildirdi ki, başqa
xalqlarda olduğu kimi, Azərbaycanda da bəzi kənd
məktəblərində qızların orta təhsildən yayınması, erkən
nikah halları mövcuddur. Bizim vəzifəmiz belə halların
qarşısını almaq üçün maarifləndirici tədbirləri
gücləndirmək, yerlərdə əhali ilə mütəmadi iş aparmaqdır.
O, çıxışının sonunda şagirdlərə, onların valideynlərinə
öz arzu və istəklərini, tövsiyələrini çatdırdı.
 Məktəbin
şagirdləri çıxışlarında ümummilli lider Heydər Əliyevin
Azərbaycan qadınının cəmiyyətdəki mövqeyini həmişə
yüksək qiymətləndirdiyini bildirdilər. Vurğulandı ki,
Azərbaycan qızının, qadınının mərd, qeyrətli, ağıllı və
mədəni nümunəsi xalqımızın simasıdır. Qadın dünyaya yeni
nəsillər gətirir, onu böyüdür və tərbiyə edir.
Məktəblilər qeyd etdilər ki, klassik Azərbaycan
ədiblərindən Nizami Gəncəvi, Məhəmməd Füzuli, Mirzə
Ələkbər Sabir, Cəlil Məmmədquluzadə, Cəfər Cabbarlı və
başqaları əsərlərində qadın azadlığı, qızların təhsili,
onların erkən nikaha sürüklənməsi, sosial hüquqlarının
pozulmasını əks etdirən mövzulara toxunublar. Məktəbin
şagirdi Məsumə Əliyeva C.Cabbarlının “Ana” şerini
söylədi. Mədinə Babazadə, Aytac Əhmədzadə və İlham
Nuriyev N.Gəncəvinin “İsgəndərnamə” əsərindən İsgəndərlə
Nüşabənin qarşılaşdığı səhnəni təqdim etdilər. Asiman
Mirzəyeva və Məsumə Əliyeva N.Gəncəvinin “Leyli və
Məcnun” poemasından anasının qızına nəsihətini
söylədilər. X sinif şagirdi Kənan Dadaşov, IX sinif
şagirdi Nərminə Bağırzadə və VIII sinif şagirdi Səbinə
Hacılı C.Məmmədquluzadənin “Ölülər” əsərindən kiçik
səhnəcik nümayiş etdirdilər. Rəhiməxanım Balağazadə isə
M.Ə.Sabirin “Qoyma gəldi” şeirini xüsusi məharətlə ifa
etdi. Bədii hissənin sonunda slayd təqdim edildi.
Slaydda qızlarımızın fədakarlığı, müharibə zamanı istər
ön cəbhədə, istərsə də arxa cəbhədə göstərdikləri
şücaətlər nümayiş etdirildi. Azərbaycanın birinci
xanımı, YUNESKO və İSESKO-nun xoşməramlı səfiri Mehriban
Əliyevanın fəaliyyəti gənc qızlara örnək kimi təqdim
edildi.
Sonda çıxış edənlər bir daha valideynləri qızlarına
dəstək olmağa, onları təhsilə, elmə həvəsləndirməyə,
erkən nikahdan uzaq olmağa səslədilər.
Tədbirə məktəbin direktoru D.Cəbrayılova yekun vuraraq
gələn qonaqlara minnətdarlıq etdi, təşkilatçılara,
şagirdlərə və valideynlərə təşəkkürünü bildirdi.
Tədbirdə Sabunçu Rayon İcra Hakimiyyəti başçısının
müavini Arzu Məmmədova, YAP Sabunçu rayon təşkilatının
sədri Mehriban Abbasquliyeva da iştirak edirdilər.
Qabil ƏLİYEV |
