|
Lerikin daha bir kəndində yeni məktəb binası istifadəyə
verildi
 Oktyabrın
19-da Lerik rayonunun Pirəsora kənd tam orta məktəbi
üçün yeni inşa edilmiş 180 şagird yerlik ikimərtəbəli
məktəb binası istifadəyə verilib.
Təhsil şöbəsindən bildirilir ki, bu münasibətlə
məktəbin həyətində keçirilən mərasimdə çıxış edənlər
yeni təhsil ocağının müəllim və şagirdlərini, kənd
sakinlərini əlamətdar hadisə münasibətilə təbrik
ediblər. Yeni məktəb binasının regionların
sosial-iqtisadi inkişafına dair Dövlət Proqramında
müəyyən edilmiş tədbirlərə müvafiq olaraq ucqar dağ
kəndində inşa olunduğu vurğulanıb, bu il bu təhsil
ocağının 3 nəfər məzununun ali məktəblərə qəbul olunduğu
diqqətə çatdırılıb.
Qeyd olunub ki, dövlətimizin apardığı sosial siyasətin
təməlində Azərbaycan vətəndaşı durur. Prezident İlham
Əliyev tərəfindən təhsil sahəsinə göstərilən diqqət və
qayğı nəticəsində respublikanın hər yerində olduğu kimi,
Lerik rayonunda da hər il müasir inventar və
avadanlıqla, tədris ləvazimatları ilə təchiz olunmuş
yeni məktəb binaları tikilərək müəllim və şagirdlərin
istifadəsinə verilir.
Bildirilib ki, rayonun ən ucqar dağ kəndində belə gözəl,
əzəmətli binanın tikintisi Azərbaycan dövlətinin gücünü
bir daha təsdiq edir.
Mərasimdə kənd sakinləri Meyxos Hüseynov, Şükür Əhmədov
və gənc müəllim Tofiq Ağayev çıxış edərək ölkəmizdə
təhsilin inkişafına və onun maddi-texniki bazasının
möhkəmləndirilməsinə göstərilən diqqət və qayğıya görə
dövlətimizin başçısına minnətdarlıqlarını bildiriblər.
Sonra mərasim iştirakçıları məktəbdə yaradılan şəraitlə
tanış olublar.
Gəncə Dövlət Universitetində 
Tələbələr uşaq evində olublar
Gəncə Dövlət Universitetinin mətbuat xidmətindən
aldığımız məlumata görə, universitetin Tələbə Gənclər
Təşkilatının təşəbbüsü ilə tarix-coğrafiya və xarici
dillər fakültəsinin bir qrup tələbəsi uşaq evində
olmuşdur. Uşaq evinə növbəti gedişdən əvvəl tələbələr
topladıqları vəsait hesabına uşaqlara hədiyyələr
hazırlayıblar. İstər tələbələrin gəlişi, istərsə də
hədiyyələr uşaqlarda böyük sevinc və xoş hisslər
yaradıb, uşaqlar unudulmadıqlarını, həmişə yad
edildiklərini bir daha qeyd edərək təsəlli tapıblar.
Tələbə Yazıçılar Birliyinə üzv seçildi
Gəncə Dövlət Universitetinin filologiya fakültəsinin
III kurs tələbəsi Oğuz Hacıyevin şeirləri dəfələrlə
respublikanın nüfuzlu qəzetlərindən olan “Ədəbiyyat”
qəzetində dərc edilmiş və oxucu kütləsinin marağına
səbəb olub. Onun “Dəniz və qadın” adlı ilk şeirlər
kitabı 2015-ci ildə “Yazıçı” nəşriyyatı tərəfindən çap
olunub. Tanınmış qələm adamları gənc şairin
yaradıcılığına yüksək qiymət verərək, poeziyamıza
cəsarətli bir istedadın gəlişini bildiriblər.
Bu günlərdə isə Gəncə ədəbi mühitinin tarixində ilk dəfə
19 yaşlı bir gənc - Oğuz Hacıyev (Oğuz Aydın) Azərbaycan
Yazıçılar Birliyinin üzvlüyünə qəbul edilib. Azərbaycan
Yazıçılar Birliyinin Gəncə bölməsində xalq yazıçısı Anar
tərəfindən imzalanmış vəsiqənin təqdimat mərasimi
keçirilib.
Birliyin Gəncə bölməsinin sədri Xəzangül Hüseynova
Gəncəbasar yazarlarının iştirak etdiyi mərasimdə
üzvlük vəsiqəsini Oğuz Aydına təqdim edib, ona
nailiyyətlər arzulayıb.
ADMİU-nun müəllim və tələbə heyəti Ağsuda
 Agsu
Rayon Təhsil Şöbəsindən aldıgımız məlumata görə, 19-22
oktyabr tarixlərində Azərbaycan Dövlət Mədəniyyət və
İncəsənət Universiteti müəllim və tələbələrindən ibarət
25 nəfərlik heyətlə Orta əsr Ağsu şəhər Arxeoloji turizm
kompleksində II YOCOCU Ağsu Məktəbində təlimlər
keçirilib.
Orta əsr Ağsu şəhər Arxeoloji turizm kompleksində MİRAS
Mədəni İrsin Öyrənilməsinə Kömək İctimai Birliyi və
İtaliyanın YOCOCU Beynəlxalq Assosiasiyasının birgə
təşkilatçılığı ilə arxeoloji sahələrin konservasiyası,
bərpası və idarə olunması üzrə tələbə və gənc
mütəxəssislər üçün II YOCOCU (Mədəni İrsin
Konservasiyasında Gənclər) Ağsu Məktəbi öz işinə
başlayıb. Baş tutan birinci qrupda məhz Azərbaycan
Dövlət Mədəniyyət və İncəsənət Universitetinin tələbə,
magistr və müəllim heyəti təmsil olunub.
Tələbələr əvvəlcə Ağsu arxeoloji ekspedisiyasının
2013-2015-ci illərdə tədqiq etdiyi Şıxməzid orta əsr
abidəsi və ilk orta əsr Mehrəvan şəhər yerində olublar.
Onlar abidələrin arxeoloji tədqiqatlardan sonra
mühafizəsinin çətinləşməsi və təbii amillərin təsirindən
aşınmasını yerindəcə izləyiblər.
Orta əsr Ağsu şəhər Arxeoloji turizm kompleksindəki
konfrans zalında baş tutan dərsləri professor Qafar
Cəbiyev (Ağsu arxeoloji ekspedisiyasının rəisi),
Silvestro Antonio Ruffolo (Kalabriya Universitetinin
Bərpa Laboratoriyasının əməkdaşı, İtaliya), Uğur Genç
(Mədəniyyət və Turizm Nazirliyi Mərkəzi Bərpa və
Konservasiya Laboratoriyası, Türkiyə), Fariz Xəlilli (MİRAS
Mədəni İrsin Öyrənilməsinə Kömək İctimai Birliyinin
sədri) və Uğur Qiyasi (MİRAS Mədəni İrsin Öyrənilməsinə
Kömək İctimai Birliyinin bərpaçı-memarı) keçib. Kurs
müddətində bərpa və konservasiya prinsipləri, bərpa
laboratoriyası, daş materiallar, kimyəvi analizlərin
aparılması və arxeometriya, çiy kərpicin
konservasiyasında yeni nanotexnoloji metodlar və s.
mövzularda fikir və təcrübə mübadiləsi aparılıb.
Azərbaycan Dövlət Mədəniyyət və İncəsənət
Universitetinin sənətşünaslıq, turizm və otelçilik,
muzeyşünaslıq, arxiv işi və abidələrin qorunması,
rəssamlıq, dizayn, kulturologiya ixtisaslarına yiyələnən
tələbələri nəzəri və praktik işlər vasitəsilə ən
effektiv konservasiya üsulundan yararlanmaq üçün
kollektiv təcrübələrini bir araya gətiriblər.
Sonda kurs iştirakçılarına beynəlxalq sertifikatlar
təqdim olunub.
“Milli mənəvi dəyərlərimiz və erkən nikahlar” mövzusunda
maarifləndirici tədbir
 Ailə
məsələlərində ciddi problemlərdən biri də erkən
nikahlardır. Ailə quran tərəflərin bəzən yaşlarının
rəsmi nikah üçün müəyyən olunmuş yaş həddindən aşağı
olması ailədə bir sıra problemlərə gətirib çıxarır. Bu
kimi ailələrdə nikahın pozulması, xəstə uşaqların
dünyaya gətirilməsi, məişət zorakılığı, fiziki-psixoloji
çətinliklər kimi hallar daha çox müşahidə olunur. Erkən
nikahların pozulması zamanı qadınlar daha çətin
vəziyyətdə qalırlar.
Astara Pedaqoji Kollecindən redaksiyamıza daxil olan
məlumatda bildirilir ki, bu fikirlər kollecdə
keçirilən “Milli mənəvi dəyərlərimiz və erkən nikahlar”
mövzusunda maarifləndirici tədbirdə səsləndirilib.
Astara Rayon Gənclər və İdman İdarəsinin və təhsil
şöbəsinin birgə təşkilatçılığı ilə keçirilən tədbirdə
idarənin aparıcı məsləhətçisi Aysel Cəbiyevanın mövzu
ilə bağlı məruzəsi dinlənilib. Məruzə ətrafında
müəllimlərin və tələbələrin ətraflı çıxışları olub.
Toplantıda müzakirə edilən məsələ ilə bağlı tələbələr
həm də təkliflərini bildiriblər.
Tədbir diskussiya şəklində başa çatıb.
Lənkəranda “Ailə, məktəb və cəmiyyət” mövzusunda “telekörpü”
Azərbaycan Respublikasının Prezidenti yanında Bilik
Fondunun təşəbbüsü ilə “Ailə, məktəb və cəmiyyət” devizi
ilə növbəti “telekörpü” Lənkəranda reallaşıb.
Müəllimlərin də qatıldığı “telekörpü”də Bilik Fondunun
icraçı direktoru Oktay Səmədov, Azərbaycan Təhsil
Şurasının sədri Əjdər Ağayev və təhsil üzrə ekspertlər
mövzu ilə bağlı çıxış ediblər.
Çıxışlarda qeyd olunub ki, gənc nəsil ailə və məktəbdə
formalaşır. Qazandığı uğurları iş prosesində - peşədə,
sənətdə davam etdirərək xalqa, doğmalarına fayda verir.
Bildirilib ki, ictimaiyyət özü bir ailədir, ailənin
böyüdülmüş formasıdır. Ailəni də məktəb kimi qəbul etmək
vacibdir, çünki burada uşaqlar ailə və cəmiyyət
qarşısındakı vəzifələrini öyrənirlər.
Diqqətə çatdırılıb ki, cəmiyyətin inkişafına təkan verən
sosial proseslər şəxsiyyətin inkişafına da xüsusi təsir
göstərir və mühüm tələblər irəli sürür. Dəyişən dünyanın
reallıqlarından kənarda qalmamaq prinsipinə əsaslanmaqla
müasir tələblərə cavab verən yeni təlim və tərbiyə
metodlarının tətbiqi də öz aktuallığını daim qoruyub
saxlayır. Təlim və tərbiyə müasir şagirdi həyata
hazırlamalıdır.
Videobağlantıda müəllimlərin də mövzu ilə bağlı
fikirləri dinlənilib.
Şabranın təhsil müəssisələri qışa hazırdır
Şabran rayonundakı 47 ümumtəhsil məktəbində qışa
hazırlıq prosesi yekunlaşıb.
Şabran RayonTəhsil Şobəsindən məlumat verilib ki,
məktəblərdən birində mərkəzləşdirilmiş istilik sistemi
yaradılıb, 21 təhsil müəssisəsində isə fərdi qaz
sobaları və kombi sistemi quraşdırılıb. Qış fəslində bu
məktəblərin qızdırılmasında heç bir çətinlik
yaşanmayacaq.
25 təhsil ocağının qızdırılması üçün odundan istifadə
edilir. Bu məktəblərin hamısında sobalar quraşdırılıb.
Məktəblər üçün nəzərdə tutulan odun yanacağı əlaqədar
qurumlar tərəfindən təyinatı üzrə paylanılıb.
Soyuq hava şəraiti səbəbindən rayonun bəzi ucqar
kəndlərində yerləşən məktəblərdə sobalar artıq işə
salınıb. Lakin ümumilikdə təhsil müəssisələrinin qış
mövsümünə noyabr ayının ikinci ongünlüyündən keçməsi
nəzərdə tutulub.
Yeniyetmə şahmatçılar Balakən rayonunda qüvvələrini
sınayıblar
Təhsil Nazirliyinin “Təhsil” Respublika İdman Mərkəzinin
təşkilatçılığı ilə Balakəndə keçirilən yeniyetmələr
arasında şahmat üzrə respublika birinciliyinin seçmə
yarışlarına yekun vurulub.
Təhsil Nazirliyinin “Təhsil” Respublika İdman
Mərkəzindən redaksiyamıza daxil olan məlumata görə,
Balakən şəhərindəki Gənclər evində təşkil olunan
yarışlarda respublikamızın 10 şəhər və rayonunu təmsil
edən 100-dən çox şahmatçı oğlan və qız 6 yaş qrupunda
mübarizə aparıb.
Yarışların əsasnaməsinə görə, hər yaş qrupunda ilk üç
yeri tutan şahmatçılar respublika birinciliyinin
noyabrda Oğuz şəhərində keçiriləcək final mərhələsinə
vəsiqə qazanıb. Seçmə yarışlarda fərqlənən şahmatçılar
diplomlarla mükafatlandırılıblar.
Şakir CƏFƏROV,
“Azərbaycan müəllimi” |
