|
Böyük Britaniyanın London İmperial Kollecinin tələbəsi
Nərmin Talıbova ilə söhbət
Oruc MUSTAFAYEV,
“Azərbaycan müəllimi”
o.mustafayev@muallim.edu.az
 Nərmin
Talıbova 1986-cı il avqustun 23-də Bakıda anadan olub.
Bakıdakı Xarici Dillər Təmayüllü Gimnaziyada oxuyub.
2004-cü ildə Azərbaycan Tibb Universitetinin pediatriya
fakültəsinə daxil olub. 2010-cu ildə universiteti
pediatr -neonatoloq ixtisası üzrə bitirib və həkim -intern
kimi fəaliyyətə başlayıb. İnternatura pilləsini
bitirdikdən sonra Mərkəzi Klinik Xəstəxananın Uşaq
Mərkəzində yenidoğulmuşların reanimasiyası və intensiv
terapiyası şöbəsində assistent-neonatoloq kimi
fəaliyyətini davam etdirib. 2014-cü ildən etibarən
“2007-2015-ci illərdə Azərbaycan gənclərinin xarici
ölkələrdə təhsili üzrə Dövlət Proqramı” çərçivəsində
Böyük Britaniyanın London İmperial Kollecinin Tibb
Məktəbində magistr dərəcəsi üzrə təhsil alır. Nərmin
Talıbova ilə söhbətimizə orta məktəb illəri ilə körpü
saldıq.
“Fənlər arasında heç bir fərq qoymamışam”
- Məktəb illərimi, müəllimlərimi sevə-sevə xatırlayıram.
İlk müəllimlərimlə bağlı şanslı olduğumu düşünürəm. Orta
məktəbdə oxuyarkən bütün fənləri eyni dərəcədə öyrənməyə
çalışmışam, fənlər arasında heç bir fərq qoymamışam və
bunun qəti əleyhinəyəm. Deyə bilərəm ki, insanın
dünyagörüşünün düzgün inkişafı üçün hər bir fənnin öz
rolu var. Bunun faydasını isə şəxsi təcrübəmdə gördüm.
Hazırda ingilisdilli ölkədə magistr təhsili alıram və
eyni vaxtda fransızdilli ölkədə təcrübə keçirəm.
Xarici dilləri bilməyim həm xaricdə təhsil imkanımı
genişləndirdi, həm də avropalı həmkarlarımla ünsiyyət
qurmaqda üstünlüyüm oldu. Qeyd edim ki, məktəbimiz
humanitar yönümlü idi və rayon üzrə hər zaman ən yaxşı
abituriyent göstəricilərinə malik idi. İxtisas seçimimə
gəlincə nə qədər təəccüblü olsa da, heç vaxt həkim
olmağı arzulamamışam. XI sinifdə qərarımı ani dəyişib
texniki profilli fənlər üzrə hazırlığa başladım. Bu
qərarımın səbəbi ailə yaxınlarımızdan birinin
xəstələnməsi və bizim də çarəsiz qalmağımız idi. “Gec
olmadan həkim olmalıyam” dedim və çox qısa müddət
ərzində böyük əzm, qətiyyətlə hazırlaşdım və hədəfimə
çatdım. Nəticədə, Azərbaycan Tibb Universitetinin
pediatriya fakültəsinə daxil oldum.
“Xaricdə
təhsil almaq hər zaman arzum olub”
- Müxtəlif illərdə Türkiyənin universitet
xəstəxanalarında qısamüddətli treninqlərdə olmuşam. Bu
da sonrakı illərdə həm ixtisas seçimində, həm də xaricdə
tibbi təhsil almaq ideyamın formalaşmasında müstəsna
rol oynayıb. Xaricdə təhsil almaq hər zaman arzum olub,
lakin Dövlət Proqramına müraciət edənə qədər bu, ancaq
arzu idi. Qeyd etdiyim kimi, qısamüddətli kurslar və
yerli imkanlar ilə müəyyən bir inkişafı əldə etdim, amma
hədəfini yüksək tutan və qazandıqları ilə heç vaxt qane
olmayan bir insan olaraq, təcrübədən keçmiş,professional
tibbi təhsilə ehtiyacım olduğunu hiss etdim.
Valideynlərim ən böyük dəstəyimdir, onların güvəni
məni dayanmadan çalışmağa və ən yaxşılardan olmağa
həvəsləndirib. Qeyd edim ki, ölkəmizdə gənclərə
göstərilən yüksək diqqət və qayğının bariz nümunəsi kimi
Dövlət Proqramının əhəmiyyəti böyükdür. Dövlət
Proqramının potensiallı gənclərimizin gələcək karyera
uğrunda çox mühüm layihə olduğunu düşünürəm və şəxsi
təcrübəmə dayanaraq bundan tam əminəm. Xüsusilə, bir
tibb təhsili alan tələbə üçün bunun vacibliyini ifadə
etmək mümkün deyil. Düşünürəm ki, Dövlət Proqramının
ölkəmizə qazandırdığı gənc kadrları gələcəkdə
ayrı-ayrı sektorlarda əldə olunmuş uğurları ilə görə
biləcəyik. Dövlət Proqramından müsbət rəy almağımı
akademik karyeram yolunda atılan ən uğurlu
addımlarımdan biri kimi dəyərləndirirəm.
“Kitab
oxumaq ən sevdiyim məşğuliyyətimdir”
- Yaşadığım və təhsil aldığım London beynəlmiləl
şəhərdir. Burada dünyanın müxtəlif ölkələrindən
insanların olduğunu nəzərə alsaq, özünü yad hiss etmək
çətindir. Londonun insanları da səmimidi,
yardimsevərdir. Tələbə yoldaşlarımın bir çoxu
əcnəbilərdir və onlarla da kifayət qədər səmimi
münasibətimiz var. Əvvəllər də başqa ölkələrdə yaşamaq
təcrübəm olduğundan Londona, buranın insanlarına
alışmaq mənim üçün çətin olmadı.
Tələbə həyatımdan da çox məmnunam, çünki inkişaf
etdiyimi hiss edirəm. Ölkələrin tarixi ilə çox
maraqlanıram və xosbəxtlikdən İngiltərədə bir çox
muzeylər ödənişsizdir və çox zəngindir, mən də bu
fürsətdən istifadə edib boş vaxtlarımda muzeyləri
kəşf edirəm və dincələ-dincələ Avropa tarixini
öyrənirəm. Həftəsonları Temza çayının sahilində kitab
oxumaq ən sevdiyim məşğuliyyətimdir. Şəxsi təcrübəmə
dayanaraq deyə bilərəm ki, dünyagörüşümün
formalaşmasında mütaliə etmək çox əhəmiyyətlidir və
hətta bir çox hallarda əsər qəhrəmanlarından cəsarət
aldığımı belə xatırlayıram.
“Seçdiyim
ixtisas ən önəmli sahə hesab olunur”
- London İmperial Kolleci həm dünyanın, həm də Böyük
Britaniyanın ən yaxşı ali təhsil müəssisələrindən
biridir. Kollec dünya universitetləri reytinqində (Times
Higher Education World University Rankings 2015-2016)
8-ci yerdədir.
Düşündüm kü, bir halda ki xaricdə təhsil almaq
istəyirəm, o zaman bu ali məktəb ən yaxşılardan biri
olmalıdır. İxtisasıma gəlincə, mən pediatr-neonatoloqam
və hazırda pediatriya üzrə magistr təhsili alıram. İşimi,
körpələri sevirəm, bu da mənə yorulmadan, bezmədən
çalışmağa, oxumağa stimul verir.
Hələ Ankara Universitetində keçdiyim kurs zamanı
yenidoğulmuşların reanimasiyası və intensiv
terapiyasının nə qədər çətin və aktual olduğunu gördüm.
Təəssüf ki, o körpələrin həyat mücadiləsi yetkin
insanlar kimi deyil, elə ilk doğulduqları andan, ana
qucağında deyil, küvezdən və ventilyasiya cihazından
başlayır və onların bu savaşda professional köməyə
ehtiyacları var. Məncə, dünyada hər 30 saniyədən bir
yarımçıqdoğulmuş körpəni itirmək gerçəkliyi bu ixtisasın
nə qədər qlobal olduğunu ifadə etməyə kifayət edir.
Buna görə də seçdiyim ixtisas dünyada ən önəmli sahə
hesab olunur. Qeyd edim ki, bir ölkənin sağlamlıq
göstəricisi nə qədər önəmlidisə, mənim peşəm də ən azı
o qədər vacibdir. “Körpələr gələcəyimizdir” deyirik,
mən də sağlam gələcəyimiz üçün çalışıram.
Yenidoğulmuşlar və körpələr, eləcə də analar arasında
ölüm hallarının azalıb və ya çoxalması bilavasitə biz
pediatrların məsuliyyətindədir. Hərçənd ki, artıq
inkişafını izləmək mümkün olmayan tibb elminin yeni
nailiyyətləri bu göstəriciləri azaltmaqda bizə dəstək
ola bilər. Təbii ki, ixtisaslaşmış kadrlara və
mərkəzlərə ehtiyacımızın vacibliyini inkar etmirəm.
Əminəm ki, xaricdə təhsil alan həkim həmkarlarımla
birlikdə Avropa tibb təcrübəsinin Azərbaycan səhiyyə
sisteminə inteqrasiyasını reallaşdıra bilərik.
“Professorlarımızla
sərbəst görüşə bilirik”
- Təhsil ocağının professor-müəllim heyəti ilə
münasibətlərimiz çox səmimi və işgüzarlığı ilə seçilir.
Əslində biz tələbələrlə, həkim olduğumuzdan, daha çox
həmkar, əməkdaş kimi davranırlar və hər hansı
çətinliklərlə üzləşdiyimizdə bizə çəkinmədən öz
dəstəklərini təklif edirlər. Diqqətimi çəkən ən
maraqlı məqamlardan biri professorlarımızla çox rahat
görüş təyin edib, onların məsləhətlərini ala bilməkdir.
Dünyanın fərqli ölkələrindən çox sayda əcnəbi tələbə
qəbul etdiklərindən problemlərimizi bizdən də yaxşı
bilirlər və qeyri-adi motivasiya etmək qabiliyyətləri
var. Konkret bir mövzü üzərində diskussiyadan sonra
görməli olduğum işin modelini artıq canlandırmış oluram
və keçilən mövzu və ya problemli məsələ artıq mənə
əvvəlki kimi çətin gəlmir, məni öz səylərimdə uğurlu
olacağıma inandıra bilirlər.
Kollecdə dərslər interaktiv mühazirələr üzərində
proqramlaşdırılıb. Bütün mühazirə materialları eyni
zamanda universitetin qruplar üçün nəzərdə tutulmuş
mövzular lövhələrdə (“blackboard”) yerləşdirirlir və
tələbənin istədiyi zaman təkrar dinləmə şansı olur.
Digər tərəfdən, yazılı imtahanlar üçün universitet
bütün tibbi materiallara çıxış imkanı verir ki, bu da
yazılı imtahanlara hazırlaşmağı xeyli asanlaşdırır.
“Təhsilə
qoyulan investisiyaların ən uğurlusu”
- Britaniyada akademik təhsil alıram və deyə bilərəm ki,
Britaniya bu kurslarla özünün PhD tələbələrini,
alimlərini və elmə yenilik gətirəcək kadrlarını seçir.
Odur ki, gələcək həmkarlarımın da belə bir şansa malik
olmasını istərdim.
Məncə, təhsilə qoyulan investisiyaların ən uğurlusu
xaricdə təhsildir. Hər bir tələbə oxuduğu və ya
araşdırdığı mövzu üzrə mütəxəssis olur və nəzərə alsaq
ki, Dövlət Proqramı bütün prioritet ixtisaslar üzrə
tələbələri qəbul edir, bunun ölkənin iqtisadi-mədəni
inkişafı, konkret ixtisasım üzrə desəm, sağlam
genofondumuzun yaranması və qorunması naminə böyük
əhəmiyyət kəsb etdiyini deyə bilərəm. Tələbənin xarici
ölkə mühitində yaşaması, oxuması, qazandığı təcrübə,
problemlərə professional yanaşma strategiyası, komanda
ruhu, uğuruna inam və s. yalnız avropalıların yaşadığı
mühitdə elə avropalılardan öyrənməklə təcrübəyə çevrilə
bilər. Yeni dostluqların, münasibətlərin tələbələrin
istər gələcək karyerasında, istərsə də akademik
təhsilinin davamı üçün müəyyən prespektivlər vəd
etdiyini düşünürəm.
Azərbaycanın elmi uğurları ilə tanınmasını istəyirəm
- Gənclərimizin dünyanın reytinqli universitetlərində
təhsil almasına, şübhəsiz ki, müsbət yanaşıram və bu
mövzuda gənc həkimlərimizə əlimdən gəldiyi qədər dəstək
olmağa hazıram. Əmin olduğum bir şey var - insan nə
qədər intellektual olursa, bir o qədər də alicənab,
sadə olur və bildiklərini, təcrübəsini insanlarla
paylaşmaqdan çəkinmir.
Qeyd edim ki, Dövlət Proqramı xətti ilə İngiltərədə
təhsil alan azərbaycanlı tələbələrin sayı kifayət qədər
çoxdur, təbii ki, bu, diasporanın sərhədlərini
genişləndirən faktorlardandır və mən də İngiltərədəki
səfirliyimizdə Təhsil Nazirliyinin nümayəndələrinin
təşkil etdiyi görüşlərdə iştirak edirəm, onlarla
qayğılarımızı paylaşırıq və onlar da mümkün olduğu
qədər bizə böyük dəstək olurlar. Xüsusilə, bayramlarda
doğma insanları görmək çox xoş olur və tələbələrimiz də
bu görüşlərin təşkilində aktiv iştirak edirlər. Qeyd
etdiyim kimi, İngiltərədə təhsil alan potensiallı
tələbələrimiz özlüyündə Azərbaycanın xaricdə təbliği
üçün ən uyğun faktordur. Belə ki, dövlətimizin
təhsilə diqqət və qayğısı, geniş miqyasda investisiya
ayırması professorlar və tələbə yoldaşlarım tərəfindən
təqdirəlayiq qarşılanır. Heç bir sərvət elmdən
üstün deyil və Azərbaycanın gənc mütəxəssislərinin öz
elm və bacarıqları ilə ölkəmizi ən layiqli şəkildə
təmsil edə biləcəyini düşünürəm. Avropanın Azərbaycanı
elmi uğurları ilə tanımasını istəyirəm!
Gələcək planlarıma gəlincə, hər zaman kliniki
karyeram ilə yanaşı, akademik karyeramın olmasını da
arzulamışam. Dövlət Proqramı sayəsində bunu
gerçəkləşdirə bildim, amma tibb elminin sərhədləri hər
gün daha da genişlənir və mənim də gənc həkim olaraq
borcum bununla ayaqlaşmaq, Azərbaycanda sağlam
gələcəyimiz naminə əlimdən gələni əsirgəməmək və
təhsilimi davam etdirməkdir. |
