|
 Azərbaycan Respublikasının Prezidenti yanında
Bilik Fondu və “Azərbaycan müəllimi” qəzetinin birgə
təşkilatçılığı ilə oktyabrın 20-də Rabitə və Yüksək
Texnologiyalar Nazirliyinin “Elektron hökumət”
təlim-tədris mərkəzində ölkənin müxtəlif bölgələrindən
müəllim, şagird və valideyn təmsilçilərinin iştirakı ilə
“Ailə, məktəb, cəmiyyət” mövzusunda videokonfrans
keçirilib. Videokonfransda Bilik Fondunun təşkilatçılığı
ilə Gəncə, Sumqayıt, Qəbələ, Şamaxı, Bərdə, Lənkəranda
dinləyicilərin toplaşdıqları auditoriyalarla
videobağlantı yaradılıb.
Videokonfransı Azərbaycan Respublikasının
Prezidenti yanında Bilik Fondunun icraçı direktoru Oktay
Səmədov açaraq iştirakçıları rəhbərlik etdiyi qurum
adından salamlayıb, olduqca maraqlı bir mövzunun onları
bir araya gətirdiyini bildirib. Qonaqları təqdim edən
Fond rəhbəri müzakirə üçün müəyyənləşdirilmiş “Ailə,
məktəb, cəmiyyət” mövzusunun aktuallığını, cəmiyyətin
hər bir üzvünü düşündürdüyünü qeyd edib. Bildirib ki,
insan ailədə tərbiyə alır, püxtələşir, formalaşır, onun
etik baxışları ailədə yaranır, davranış qaydalarına
burada yiyələnir, sonra bunlar məktəbdə daha da
təkmilləşir, cilalanır və cəmiyyətə inteqrasiya olunur.
Ailə, məktəb, cəmiyyət pedaqoji üçlüyünün bu baxımdan
təlim-tərbiyədə mühüm rol oynadığını deyən O.Səmədov
iştirakçıları fəal dialoqa, mövzu ətrafında aparılan
müzakirədə yaxından iştiraka dəvət edib.
“Azərbaycan müəllimi” qəzetinin baş redaktoru,
siyasi elmlər üzrə fəlsəfə doktoru, əməkdar jurnalist
Bayram Hüseynzadə də konfrans iştirakçılarını
salamlayıb, videokonfransı uğurlu, eyni zamanda fərqli
bir tədbir kimi dəyərləndirib, mövzu ətrafında fəal,
səmimi bir müzakirənin aparılacağına əminliyini
söyləyib.
Hazırda ölkədə təhsil sisteminin Azərbaycan
Prezidenti İlham Əliyevin diqqətində və himayəsində
olduğunu və uğurla inkişaf etdiyini vurğulayan
B.Hüseynzadə müzakirələrdə bu inkişafda ailə, məktəb və
cəmiyyətin hansı rolu oynamalı olması, hər kəsin bu işə
öz fəaliyyəti ilə necə töhfə verə bilməsi məsələlərinə
toxunulacağına, səmərəli fikir mübadiləsi aparılacağına
inandığını söyləyib və konfransın işinə uğurlar
arzulayıb.
Sonra videokonfrans öz işinə başlayıb. Mövzu üzrə
məruzəçi, tanınmış pedaqoq alim, Azərbaycan Təhsil
Şurasının sədri, əməkdar müəllim, professor Əjdər Ağayev
öncə iştirakçıları salamlayıb, şagirdlərin şəxsiyyət
kimi formalaşmasında ailə, məktəb və cəmiyyətin rolu və
yeri məsələsinə toxunub, problemə ənənəvi və müasir
pedaqoji yanaşmaları diqqətə çatdırıb. Mövzunun
aktuallığını xüsusi qeyd edən Ə.Ağayev bunu bu gün
məktəb işinin yalnız pedaqoji iş deyil, böyük sosial,
iqtisadi, mənəvi əhəmiyyətli bir məsələ olması və
cəmiyyətlə sıx bağlılığı ilə əlaqələndirib.
Çıxışında ailənin təlim-tərbiyə məsələsində roluna
diqqət çəkən Ə.Ağayev uşağın 6 yaşa qədər məhz ailədə
formalaşdığını, psixoloqların qənaətinə görə,
əvvəllərdə deyildiyi kimi 5 yaşda deyil, artıq 3
yaşında uşaqda gələcək formalaşmanın özülünün
qoyulduğunu söyləyib. Bildirib ki, bu, cəmiyyətlə,
həyatla, ailə ilə bağlıdır. Ona görə də bu gün
məktəb-ailə tarazlığı cəmiyyət tarazlığı ilə ekvivalent,
bərabər olmalıdır. Məktəbdə pedaqoji kollektiv, ailədə
valideynlər, eləcə də cəmiyyətin hər bir üzvü olaraq hər
kəs işlədiyi sahədə, vəzifədə, elədiyi əməlində, öz
nümunələri, sağlam fikirli düşüncələri ilə tərbiyəvi
təsir göstərir. Bu gün həmin təsirlər əvvəlki kimi deyil.
İndi elektron vasitələr çox güclüdür, cəmiyyət həyatı
tamamilə elektronlaşıb. Ölkəmizdə Prezident İlham Əliyev
cənablarının rəhbərliyi ilə geniş texnoloji islahatlar
həyata keçirilir. Qloballaşmada böyük yer tutan
elektronlaşma bilik, öyrənmə sərhədlərini, tanışlıq
baryerlərini artıq çoxdan aşıb.
Ailə, məktəb, cəmiyyət əlaqələrində məktəbin
xüsusi çəkisinin daha çox olduğunu deyən Ə.Ağayev
bildirib ki, bu gün məktəbin funksiyası sosial mənada
çox genişlənib və güclənib. İndi məktəb bilik, tərbiyə
mərkəzi olmaqla həm də şagirdlərin dünyagörüşünü, həyata
baxışlarını, insanlara münasibətini formalaşdırır.
Təlimin məzmunu yenilənib, ona çoxlu xarici təcrübədən
gələn müəyyən nüanslar daxil olub. Təlim metodlarında
da xeyli təkmilləşmələr, yeniləşmələr var. Müəllimin
bilməli olduğu və bildiyi bu məsələlərin valideynlərə
çatdırılmasında, cəmiyyətin diqqət obyektinə
çəkilməsində məktəbin rolunun böyük olduğunu, onun
üzərinə ciddi vəzifələr düşdüyünü deyən professor bu
məsələyə müəllimlərin, məktəb rəhbərlərinin diqqət
yetirməsinin vacibliyini vurğulayıb.
Professor Əjdər Ağayev çıxışında habelə
şagirdlərin peşəyönümü, bu işdə valideynlərin, məktəbin
rolu, şagirdlərin ilk peşə-ixtisas təhsili
müəssisələrinə marağının az olması, valideynlərin bu
məktəblərə lazımınca dəyər verməməsi, məzunların ali
məktəblərə gediş cəhdinin çox olması, təlim prosesində
daha çox şagirdlərin müstəqil işinə yer verilən bugünkü
məktəbdə qavrama və tərbiyədə mühüm amil olan
təhsilalanların hiss və duyğularını qaldırmaq
məsələsinin zəruriliyi, şəxsiyyətin formalaşmasında
mütaliənin rolu, mütaliənin təşkilində ailə və məktəbin
işi, müəllimlərin özünütəhsili, mütaliəsi, pedaqoji
mətbuatı müntəzəm izləməli olması və s. kimi məsələlərə
də toxunub, öz fikir və mülahizələrini söyləyib.
Sonra Ə.Ağayev dinləyici auditoriyalarından
mövzunun müxtəlif aspektləri ilə bağlı verilən sualları
cavablandırıb, irəli sürülən təkliflərə münasibətini
bildirib.
Yusif ƏLİYEV,
“Azərbaycan müəllimi” |
