|
Havar
MƏMMƏDOV,
Azərbaycan
Texniki
Universitetinin
rektoru,
əməkdar
elm
xadimi,
texnika
elmləri
doktoru,
professor
 Universitetlərin
akkreditasiyasında
beynəlxalq
təcrübə
və
təmayüllər
Dünya
universitetlərinin,
ali
təhsilin
inkişaf
tarixi
göstərir ki, ali məktəblərin, ali təhsilin
göstəricilərinin inkişafı ilə cəmiyyətin bütün
sahələrində əsaslı inkişaf müşahidə edilir. Əksinə bu
sahədə baş verən çatışmazlıqlar və geriqalmalar sonradan
cəmiyyətdə müxtəlif kataklizmlərin yaranmasına səbəb
olur. Tarixi mənbələrdə göstərilir ki, hələ XI-XVII
əsrlərdə Avropanın siyasi, iqtisadi və mədəni cəhətdən
çiçəklənməsi məhz həmin dövrlərdə Avropanın müxtəlif
ölkələrində ali təhsil cəmiyyətinin formalaşması, yəni
universitetlərin yaradılması ilə əlaqədar olmuşdur. Bu
baxımdan, ölkəmizdə son illər ali təhsil sahəsində
aparılan islahatlar respublikamızın davamlı inkişafına,
insan kapitalının formalaşmasına öz müsbət təsirini
göstərməkdədir.
Azərbaycan Respublikasının Prezidenti İlham Əliyev
tərəfindən 29 noyabr 2011-ci il tarixdə təsdiqlənən
“Azərbaycan 2020: gələcəyə baxış” İnkişaf
Konsepsiyasında müasir təhsil sisteminin
formalaşdırılmasının prioritet istiqamətləri müəyyən
edilmişdir. Şəxsə hərtərəfli bilik və bacarıqların
verilməsinə nail olmaq üçün təhsil sisteminin
institusional əsaslarının, infrastrukturunun və insan
resurslarının inkişafı vəzifəsi qarşıya qoyulmuşdur.
Odur ki, respublikamızda ali təhsil sistemində həyata
keçirilən islahatların müsbət nəticələr verməsi üçün
yeni yanaşmalar tələb edilir. Xüsusilə, keyfiyyətin
idarə olunması məsələsi ali təhsil sistemində prioritet
təşkil etməlidir. Bu mənada keyfiyyətin idarə olunması,
təhsilin qiymətləndirilməsi məsələsi nəticələrin
qiymətləndirilməsində müstəsna əhəmiyyət kəsb edir.
Biz bu istiqamətdə beynəlxalq təmayülləri öyrənmək və
təhlil etməklə müsbət çalarları Azərbaycan ali təhsil
sistemində tətbiq etməli və yüksək ixtisaslı kadrların
hazırlığına nail olmaq istiqamətində ciddi addımlar
atmalıyıq. Beynəlxalq təcrübədə əsas məqamlardan biri
ali təhsildə keyfiyyətin təminatı və qiymətləndirilmənin
aparılmasıdır ki, bu da akkreditasiya vasitəsilə həyata
keçirilir. Ali təhsil sistemində akkreditasiya sahəsində
ən böyük təcrübə ABŞ-a məxsusdur. ABŞ bu sahədə təxminən
yüz illlik təcrübəyə malikdir. Digər ölkələr, o cümlədən
Avropa ölkələri yalnız XX əsrin 90-cı illərindən
başlayaraq ABŞ-ın təcrübəsini tətbiq etməyə başlamışlar.
Akkreditasiya prosesində əsaslı canlanma Avropa İttifaqı
ölkələrinin təşəbbüsü ilə ali təhsildə ümumavropa
məkanının yaradılması məqsədilə baş vermişdir. Burada da
əsas məqsəd və öndə duran amil keyfiyyətin
qiymətləndirilməsi proseduruna söykənir.
Avropa ali təhsil sistemində keyfiyyətin
qiymətləndirilməsi və təminatı vacib əhəmiyyət kəsb edir.
Odur ki, Azərbaycan ali təhsil sistemində, xüsusilə
mühəndis kadrların hazırlığı zamanı kadr hazırlığının və
kadr hazırlığı üçün tədris-metodiki kompleksin keyfiyyət
göstəricilərinin qiymətləndirilməsi bu gün xüsusilə
aktualdır. Ali təhsilin beynəlmiləlləşməsi kontekstində
təhsil proqramlarının beynəlxalq akkreditasiyasının
aparılması həm beynəlxalq əməkdaşlıq, həm də müxtəlif
sistemlərin qarşılıqlı olaraq tanınması və uyğunlaşması
üçün böyük əhəmiyyətə malikdir. Bu baxımdan beynəlxalq
praktikanın ölkəmizin ali təhsil müəssisələrində
mənimsənilməsi və Azərbaycan reallıqlarını nəzərə
almaqla tətbiq olunması vacib məsələlərdən biridir.
Mühəndis kadrların hazırlığında bu amil daha qabarıq
olaraq özünü göstərir. Akkreditasiya bir qayda olaraq:
- təhsil proqramına və ya təhsil müəsssisəsinə müəyyən
status verir;
- mütəxəssislərə verilən akademik dərəcələrin
tanınmasını təmin edir;
- birbaşa və ya dolayısı ilə maliyyələşmə üçün əsas
təşkil edir;
- qazanılan kreditlərin digər ali təhsil müəssisələri
tərəfindən qəbul olunmasına şərait yaradır və mobilliyi
təmin edir.
Avropa ölkələrində ali təhsildə akkreditasiya prosesi
sərbəst təşkilatlar tərəfindən həyata keçirilir və əsas
etibarilə təhsil proqramının və ya təhsil müəssisəsinin
onlar tərəfindən müəyyən edilmiş standarta uyğun
olub-olmamasına cavab almaq məqsədilə aparılır. Bu zaman
akkreditasiya təşkilatı tələbələrin, valideynlərin, əmək
bazarının üzvlərinin, təhsil cəmiyyətinin və nəhayət,
dövlətin maraqlarını və hüquqlarını qoruyur. Ona görə də
akkreditasiya agentlikləri Avropada, o cümlədən
Almaniyada sərbəst təşkilat olsalar da, bu
təşkilatların, agentliklərin fəaliyyətinə lisenziya
verilməsi, onların fəaliyyətinə nəzarət dövlətin, yəni
Təhsil Nazirliyinin səlahiyyətində qalır. Həmin
agentliklərin fəaliyyəti üçün standartları Təhsil
Nazirliyi müəyyən edir. Avropada akkreditasiya prosesi
zamanı əsas rolu Avropa Universitetlər Assosiasiyası,
Ali Məktəblərdə Keyfiyyətin təminatı üzrə Avropa
Şəbəkəsi, Avropa Komissiyası, Avropa Milli Tələbə
İttifaqı və s. kimi təşkilatlar oynayır. Amerikada isə
əsas rol universitetin daxilində olan sərbəst
özünüqiymətləndirmə təşkilatlarına məxsusdur.
Beləliklə, təhsil sistemi mərkəzləşmiş qaydada idarə
olunan ölkələrdə qiymətləndirmə və akkreditasiya
prosesinə nəzarət dövlət orqanları tərəfindən, digər
hallarda isə bu məsələ universitetlərin daxilində
fəaliyyət göstərən təşkilatlar və ya sərbəst ekspertlər
qrupu tərəfindən həyata keçirilir.
Bu prinsipə uyğun olaraq Amerika sistemində
özünüqiymətləndirmə daha çox inkişaf etmişdir.
Ümumilikdə ştatların administrasiyası tərəfindən
universitetlərin tədris prosesinə nəzarət mexanizmi
zəifdir. Buna baxmayaraq, Amerika ali məktəbləri təhsil
sistemində keyfiyyətin artırılması üçün
özünüqiymətləndirmə metodundan səmərəli istifadə
edirlər. Son illər bir sıra Avropa ölkələrində də
özünüqiymətləndirmə metodikası inkişaf etməkdədir.
Məsələn, belə ölkələrdən biri olaraq Norveçi göstərmək
olar. Norveçdə son onilliklərdə öz təhsil proqramlarını
qiymətləndirən universitetlərin sayı əsaslı şəkildə
artmışdır.
Ekspertlərin qiymətləndirməsinə gəldikdə isə ABŞ-da
müxtəlif peşələr üzrə təşkil edilmiş assosiasiyalardan
universitetlərin təhsil proqramlarının
qiymətləndirilməsi praktikasından geniş istifadə olunur.
Avropada belə assosiasiyalar bir qədər sonralar
yaradılmağa başlamışdır, lakin hazırda onların sayı
kifayət qədərdir və onlar da ayrı-ayrı universitetlərin
proqramlarının qiymətləndirilməsində yaxından iştirak
edirlər. Həmin assosiasiyalarda uyğun sahənin görkəmli
mütəxəssisləri təmsil olunurlar ki, həmin şəxslər də öz
peşələrinin prestijini qorumaq üçün qiymətləndirmə
zamanı maksimum dərəcədə obyektivlik və tələbkarlıq
göstərirlər.
Göründüyü kimi, ümumiləşdirmə aparsaq, Amerika təhsil
sistemində ali təhsil proqramlarının qiymətləndirilməsi
əsasən professional ekspertlər tərəfindən
özünüqiymətləndirmə yolu ilə aparılırsa, Avropa təhsil
sistemində isə bu məqsədlə yaradılmış agentliklər
tərəfindən aparılır. Məsələn, Qiymətləndirmə üzrə Fransa
Milli Komitəsi (Comite Nationale d’Evaluation), İsveç
Ali Təhsil Agentliyi (National Agency for Higher
Education (Hogskoleverket), Almaniya Elmi Şurası
(Wissenschaftsrat), Ali Təhsilin Qiymətləndirilməsi
üzrə Finlandiya Şurası (Finnish Higher Education
Evaluation Council) təşkilatları tərəfindən həyata
keçirilir.
Sürətlə qloballaşan dünyada Azərbaycan təhsil sisteminin
Avropa təhsil sisteminə inteqrasiya prosesi labüddür.
Ölkəmizdə təhsil islahatları milli mənafelər nəzərə
alınmaqla həyata keçirilməlidir. Təlim məsələlərində
(ayrı-ayrı fənlərin tədrisinin plan və proqramlarında,
yeni metodların yaradılmasında) inkişaf etmiş ölkələrin
əldə etdikləri müsbət təcrübə müəyyən araşdırmalardan
sonra ölkəmizin təhsil sisteminə tətbiq olunmalıdır. Ali
təhsil müəssisələrində milli özünüdərk və dövlətçilik
prinsiplərinin aşılanması ön plana çəkilməlidir. Bu
kontekstdən yanaşmaqla Azərbaycan Texniki Universiteti
də Avropada mövcud olan akkreditasiya prosesini
öyrənmək, xüsusilə, qiymətləndirmə və keyfiyyətin
təminatı üçün metodik hazırlığı artırmaq, tədrisin
keyfiyyətinin yüksəldilməsi, optimal biliyin verilməsi
imkanlarını axtarmaq üçün beynəlxalq proqramlarda
iştirakı prioritet hesab etmişdir. Odur ki, 2001-ci
ildən başlayaraq AzTU TEMPUS proqramı çərçivəsində
layihələrdə aktiv tərəfdaşlardan birinə çevrilmişdir.
AzTU-da bir sıra ixtisasların beynəlxalq
akkreditasiyasına aparan yol
Azərbaycan Texniki Universiteti ölkəmizin digər tərəfdaş
universitetlərilə birgə 2001-ci ildən indiyədək 4 TEMPUS
layihəsi həyata keçirmişdir. Bu layihələrin yerinə
yetirilməsində əsas məqsəd Azərbaycanda mühəndis
hazırlığının Avropa təhsil sisteminə inteqrasiyası və
tədris prosesinin keyfiyyətinin yüksəldilməsindən ibarət
olmuşdur.
Avropa Birliyi Təhsil və Mədəniyyət üzrə Komissiyasının
verdiyi ilkin layihələrdən biri 2001-2003-cü illərdə
Azərbaycan Texniki Universitetində yerinə yetirilmişdir.
Bu layihə Almaniyanın Köln və Hollandiyanın Heerlen
Tətbiqi Elmlər universitetləri ilə birgə həyata
keçirilmişdir. Layihə AzTU-da “Elektrotexnika
fakültəsində tədrisin müasirləşdirilməsi” olmuşdur. Bu
layihə çərçivəsində bir sıra ixtisasların tədris
metodiki materialları Avropa təhsil sisteminə, xüsusilə
Almaniya təhsil sisteminə uyğunlaşdırılmış və 3 yeni
bakalavr və magistr ixtisasının “Elektroenergetika”,
“Avtomatika və informasiya texnikası” və “Avtomobillərin
elektrik və elektron avadanlıqları” ixtisasları üzrə
kadr hazırlığı həyata keçirilmişdir.
Bu məqsədlə Azərbaycan Texniki Universitetində TEMPUS
Bürosu Mərkəzi yaradılmışdır. Layihənin yerinə
yetrilməsi dövründə 20-dək əməkdaş Almaniyanın Köln və
Hollandiyanın Heerlen Tətbiqi Elmlər universitetlərində
təcrübə mübadiləsində olmuşlar. Eyni zamanda həmin
universitetlərin təcrübəli professorları AzTU-da müasir
laboratoriyaların qurulmasında və tədris prosesinin
optimallaşdırılmasında yaxından iştirak etmişlər. Birgə
hazırlanan tədris planları Təhsil Nazirliyi tərəfindən
təsdiq edilmişdir. 2002-2013-cü illərdə TEMPUS proqramı
ilə təhsil alan 150 tələbə məzun olmuşdur.
Yuxarıda göstərilən layihələrin həyata keçirilməsi
dövründə Azərbaycan Texniki Universitetində beynəlxalq
konfranslar təşkil edilmişdir. Konfranslarda Azərbaycan
Respublikasının təhsil naziri, Almaniyanın
Azərbaycandakı fövqəladə və səlahiyyətli səfiri və digər
rəsmi şəxslər iştirak etmişlər. Əldə olunan nəticələr
və qarşıda duran perspektiv planlar müzakirə edilmişdir.
Avropa Komissiyasının monitorinq qrupu bu layihələrdə
görülmüş işləri müsbət qiymətləndirmiş və alınmış
nəticələrin Azərbaycanın digər ali məktəblərində tətbiq
olunmasını tövsiyə etmişdir.
Hazırda Azərbaycan Texniki Universitetində yerinə
yetirilən TEMPUS layihəsi üzrə bakalavr səviyyəsində 2
ixtisasda 60 bakalavr və 4 magistrant təhsil alır.
Layihənin yerinə yetirilməsi zamanı tələbələrin təhsili
üçün tədris planlarının optimallaşdırılması; praktiki
məşğələlərin, kurs və layihə işlərinin
təkmilləşdirilməsi; laboratoriya avadanlıqları ilə
təchizat; tədris planlarına uyğun olaraq
akkreditasiyanın şərtlərinə cavab verən formada modul
kitabları və s. işlənib hazırlanmışdır.
Sonuncu layihə üzrə 2013-2014-cü tədris ilində
aparılan tələbə qəbulu zamanı yüksək nəticələr əldə
olunmuşdur. Proseslərin avtomatlaşdırılması mühəndisliyi
ixtisasları üzrə 15 tələbə daxil olmuş, onların
universitetə qəbul balları 400-494 bal həddində
olmuşdur. “Elektroenergetika mühəndisliyi” ixtisasına da
15 nəfər tələbə qəbul olunmuşdur və qəbul balı 370 - 411
bal həddində olmuşdur. Bu qruplarda dərs aparan
müəllimlər əsasən əvvəlcə TEMPUS layihəsində iştirak
etmiş təcrübəli müəllimlər arasından seçilmişdir və daim
diqqət mərkəzində olmuşlar.
Hazırda yerinə yetirilən TEMPUS proqramının
əvvəlki layihələrdən əsas fərqi ondan ibarət olmuşdur
ki, bu layihədə bakalavr səviyyəsində “Proseslərin
avtomatlaşdırılması” və “Elektroenergetika
mühəndisliyi”, magistr səviyyəsində “Proseslərin
avtomatlaşdırılması” və “Elektrik mühəndisliyi”
ixtisaslarının akkreditasiyasının həyata keçirilməsi
üçün lazımi işlər görülmüş və nəticədə bu proses uğurla
başa çatdırılmışdır. Bundan ötrü hər üç universitetdə
Avropa ali məktəbləri üçün vacib əhəmiyyət kəsb edən
Qiymətləndirmə və Keyfiyyət menecmenti üzrə mərkəzlər
yaradılmışdır. Bu mərkəzlərin hər 3 universitetdən olan
rəhbərləri Köln Tətbiqi Elmlər və Varşava Texnologiya
universitetlərində lazımi proqram təminatını öyrənməklə
universitetlərdə həmin qiymətləndirmə mərkəzlərini
qurmuş və tətbiq etmişlər. Akkreditasiyanın keçirilməsi
zamanı bu parametr xüsusi diqqət mərkəzində olmuşdur.
Avropada akkreditasiyanın keçirilməsi sahəsində nüfuzlu
təşkilat olan ASİİN-in əməkdaşları AzTU, ADNSU, SDU-nun
əməkdaşları üçün Vork-Shoplar təşkil etmişdir. Nəhayət,
bu il mart ayının 30-dan aprelin 2-nə qədər ASİİN-in
təşkil etdiyi səlahiyyətli akkreditasiya komissiyası
universitetlərdə olmuş və akkrediyasiya prosesini
aparmışdır. Akkreditasiya yüksək tələbkarlıqla,
konstruktiv müzakirələr şəraitində keçmişdir. Sözsüz ki,
bu proses bir və ya bir neçə gündə deyil, tədris
prosesinin ilkin mərhələsindən başlanmışdır və son
mərhələdə avropalı ekspertlər görülən işlərin və alınan
nəticələrin qiymətləndirilməsini həyata keçirmişlər.
Layihənin tərəfdaşı olan Avropa akkreditasiya təşkilatı
ASİİN tərəfindən Azərbaycan Texniki Universitetində üç
tərəfdaş ali məktəbin əlaqələndirici şəxsləri, ixtisas
rəhbərləri və qiymətləndirmə və keyfiyyətə təminat üzrə
məsul şəxslər üçün “Tədrisdə keyfiyyətin təminatı“
mövzusunda seminar keçirilmişdir. Bütün bu tədbirlər
Azərbaycan Texniki Universitetinin göstərilən
ixtisaslarının beynəlxalq akkreditasiyadan uğurla
keçərək müvafiq beynəlxalq sertifikat almasına şərait
yaratmışdır.
Azərbaycan Texniki Universitetində 23 sentyabr
2015-ci il tarixdə 2013-cü ildən başlayan növbəti TEMPUS
layihəsinin uğurla başa çatması ilə əlaqədar olaraq
tərəfdaş təşkilatlarla - Azərbaycan Respublikası Təhsil
Nazirliyi, ADNSU, SDU, Almaniyanın Köln Texniki
Universiteti, Avstriyanın Qraç Universiteti, Varşava
Texnologiya Universiteti, akkreditasiya agentliyi
ASİİN-lə birgə beynəlxalq konfrans keçirilmişdir.
Azərbaycan Respublikası təhsil nazirinin müavini
Ceyhun Bayramov konfransda çıxış edərək bildirmişdir ki,
Azərbaycan Respublikasının Prezidenti İlham Əliyev
tərəfindən təsdiq edilmiş “Azərbaycan 2020: gələcəyə
baxış” İnkişaf Konsepsiyası və “Azərbaycan
Respublikasında təhsilin inkişafı üzrə Dövlət
Strategiyası” kimi proqram sənədlərində Azərbaycan
təhsilinin dünya və Avropa təhsil məkanına
inteqrasiyasının gücləndirilməsi, təhsil standartlarının
unifikasiyası və Bolonya prosesinin dərinləşdirilməsi
ilə yanaşı, Azərbaycan ali təhsil müəssisələrinin
beynəlxalq əlaqələrinin genişləndirilməsi, onların
təhsil sahəsində həyata keçirilən beynəlxalq proqramlara
cəlb olunması mühüm yer tutur. Avropa İttifaqının
nümayəndə heyətinin rəhbəri xanım Malena Mard, Almaniya
Federativ Respublikasının Azərbaycandakı səfirinin
müavini Schoenfeld, layihənin koordinatoru, Köln Texniki
Universitetinin professoru Reza Talebi-Dəryani,
Azərbaycanda “Erasmus+proqramlar” ofisinin rəhbəri
Pərviz Bağırov konfransda çıxış edərək Azərbaycan
Respublikası ali məktəblərində Avropa Komissiyasının
TEMPUS layihəsi ilə bağlı görülmüş işlərin
əhəmiyyətindən danışmışlar. Köln Texniki Universitetinin
sabiq prezidenti, professor Joachim Metsner çıxışında
AzTU ilə Köln Texniki Universiteti arasındakı
uzunmüddətli səmərəli əməkdaşlıqdan danışaraq, bu
əməkdaşlıqda xüsusi xidmətlərini nəzərə alaraq və
Avropa Komissiyasının TEMPUS layihəsinin həyata
keçirilməsi istiqamətində göstərdiyi xidmətlərə görə
Azərbaycan Texniki Universitetinin rektoru, professor
Havar Məmmədova təmsil etdiyi Köln Texniki
Universitetinin Senatı tərəfindən təsis edilmiş Qızıl
Xatirə Medalını təqdim etmişdir.
AzTU-da beynəlxalq akkreditasiyanın nəticələri və
gələcək gözləntilər
Bəzi ixtisasların beynəlxalq akkreditasiyadan
keçməsi bizə nə vəd edir? Aydındır ki, bu prosesin
aparılması AzTU-nun bu işə məsul əməkdaşlarının lazımi
bilik və bacarıqlar qazanmasına şərait yaratmışdır.
Akkreditasiyanın uğurla başa çatdırılması üçün
universitetlərdə qiymətləndirmə və keyfiyyətin təminatı
üzrə mərkəzlər fəaliyyət göstərmişdir ki, bu Azərbaycan
ali təhsil sistemi üçün, bir növ, yeni bir yanaşma idi.
Akkreditasiya komissiyası bu sistemin AzTU-da çox yaxşı
səviyyədə təşkil edildiyini bildirmişdir. Digər vacib
məqamlardan biri qiymətləndirmə və keyfiyyətin təminatı
prosesində əsas komponent olaraq tələbələrin təhsilin
aparılma keyfiyyətinə birbaşa qiymət vermə imkanlarının
olmasından ibarətdir. Bu proses universitetin həmin
mərkəzi tərəfindən tələbə nümayəndələri ilə birgə anonim
olaraq aparılmış və Köln Texniki Universitetində
fəaliyyət göstərən mərkəzə birbaşa bağlanmaqla nəticələr
emal olunmuşdur. Nəticələri aşağı olan təhsilverənlərin
nə üçün belə nəticələr göstərməsinin nəticələri müzakirə
olunmuşdur. Bütün bunlar tələbə və müəllimlərin
qarşılıqlı olaraq bir-birlərinə yaxşı mənada nəzarətinə
və münasibətlərin sağlam aspektdə qurulmasına imkan
yaradacaq amil hesab edilə bilər.
Ənənəvi olaraq biz belə düşünürük ki,
qiymətləndirmə dedikdə, yalnız tələbənin biliyinin
qiymətləndirilməsi başa düşülürsə, bu sistemdə isə
təhsilalanların, yəni tələbələrin həm müəllimin, həm də
tədris prosesində metodiki indikatorların tələbələr
tərəfindən qiymətləndirilməsi ön plana çıxır. Sual oluna
bilər ki, nə üçün bu məsələdə tələbələrə daha çox
üstünlük verilir? Avropa, xüsusilə, Almaniya ali
məktəblərində belə hesab edirlər ki, əmək bazarının ən
maraqlı tərəfi tələbə kontingentidir. Odur ki, əmək
bazarının daha çox nəyə tələbi varsa, onu tələbə daha
dərindən öyrənir və onu tədris prosesi zamanı qazanmağa
çalışır. Bu mənada tələbə amili ön plana keçir.
Təsadüfi deyil ki, industrial cəmiyyət üçün əsas
nəzarətetmə və qiymətləndirmə missiyası pedaqoqlar
tərəfindən yerinə yetirilirdisə, postindustrial
cəmiyyət üçün nəzarət və qiymətləndirmə öyrənənlərin
özününəzarət və özünüqiymətləndirmə yolu ilə həyata
keçirilməsi vurğulanır.
Belə beynəlxalq layihələrdə iştirak və
akkreditasiyanın keçirilməsi bizə mühəndis kadrların
hazırlığında, keyfiyyətin təmin olunmasında innovativ
təlim texnologiyalarının tətbiqi üçün yeni imkanlar
yaradacaqdır. Bütün bunlar sübut edir ki, Azərbaycan
Respublikasının Prezidenti möhtərəm cənab İlham Əliyevin
iqtisadi kapitalın insan kapitalına çevrilməsi ilə bilik
iqtisadiyyatının yaradılması istiqamətində apardığı
siyasətə uyğun olaraq son zamanlar ali təhsil sahəsində
Təhsil Nazirliyi tərəfindən həyata keçirilən islahatlar
öz müsbət bəhrəsini verəcəkdir. Azərbaycan Respublikası
Təhsil Nazirliyi tərəfindən təhsildə keyfiyyətin
yüksəldilməsi, peşə ixtisası təhsilinin və regionlarda
təhsilin inkişafı üçün atılan addımlar, müəllim
peşəsinin nüfuzunun artırılması istiqamətində həyata
keçirilən layihələr sübut edir ki, təhsil sferası
Azərbaycanın strateji platformasıdır. Bu strateji
platformanın həyata keçirilməsində biz ali təhsil
ictimaiyyətinin üzvləri olaraq əlimizdən gələni
əsirgəməməliyik. |
