|
Bakının “Neftçi” klubu 201 nömrəli tam orta
məktəbin futbol meydançasında seleksiya xarakterli
təlim-məşq təşkil edib.
Klubdan AZƏRTAC-a bildiriblər ki, “Neftçi” Futbol
Akademiyasının məşqçiləri tərəfindən aparılan məşqlərə
Nizami rayonunun 201, 328, 227 və 312 nömrəli tam orta
məktəblərində təhsil alan uşaqlar cəlb olunub.
Əvvəlcə iştirak üçün qeydiyyatdan keçmiş uşaqlar
meydançada bacarıqlarını nümayiş etdiriblər. “Neftçi”nin
idman direktoru Vəli Qasımovun rəhbərliyi ilə keçirilən
seleksiya prosesində klubun mütəxəssisləri Bəxtiyar
Musayev, Səmədağa Şıxlarov, eləcə də Futbol
Akademiyasının məşqçiləri ümumilikdə 117 uşağın futbol
bacarığını yoxlayıblar.
Seleksiya xarakterli məşqi “Neftçi”nin icraçı
direktoru Elnur Məmmədovla yanaşı, Braziliyanın
“Fluminense” klubunun Bakıda səfərdə olan nümayəndəsi
Marselo Teşeyra da izləyib. Braziliyalı qonaq belə
tədbirlərin təşkil olunmasının futbolun inkişafında
mühüm rol oynadığını bildirib. O, Azərbaycanda futbola
böyük marağın olduğunu qeyd edib.
İki saatdan artıq davam edən seleksiya xarakterli
məşqin sonunda xatirə şəkli çəkdirilib. |
